Read Khumi Chin SAM 59 Bible Online

SAM 59 - Khumi Chin bible

SAM 59

¹[58] Kai i Tameuh, kai ai paleung ka-echi kiu i nai atleu kyh ba; kai ai ang tiu nai khumichi teng i nai amo hai ly kry kyh ba!

²Khumi hawi y naichi kiu i nai kai ai atleu kyh ba; khumi ai padei nai keungchi teng i nai atleu kyh ba.

³Kai ai huni khumichi my tiu ai nai ajeng u nai ly khen cham ba! pahyp y naimy ana nai khumichi ly kai ai ang tiu ai nai akachu u bo. Aw ARENG, huni khumichi ly kai ai tiu ai nai meingtym la u kaliki nai ly

⁴kai i tamang nai sai sairei molam y ny y leang; kai i sa nai kamngo hawi tamang nai molam py ny y leang.

⁵Aw ati cheaungkhang sa thai nai ARENG Tameuh, ang thau iy kai ai sabawm ai nai jeu kyh ba; Israela chengchi i Tameuh, nangmy kypkyp khen kyh ba! Angthau iy tameuh pany y nai khumichi ai kamngo pajeng kyh ba; hawi y iy ka-ym by y nai khumichi ai pahen moh ba.

⁶Nichi ly mary theung y dym tengsa vawi u iy, uichi kamta hmyh naimy aki aleaung u bo.

⁷Nichi i mei aniu y naimy pajei nai leu ai ly tangai ba. Nichi i palai ly haisau kamta ne; na i py nichi my, “Kaichi i leu ai amimy thai ai mo?,” nanai katheu u bo.

⁸Na i py awi ARENG, nang ly nichi ai khen iy panui um ba; Tameuh ai pany y nai khumi bawibawichi ai ly panui hai nai ne.

⁹Kai ly nang i sa thai naira ai ym; aw Tameuh, nang ly kai i abyhra ne.

¹⁰Kai i Tameuh ly kai ai tamen iy, kai teng y ang jeu ai; kai i paleung ka-echi sum u nai ly kai ai niu ai nai ang pei ai.

¹¹Aw Tameuh, nichi ai padei moh ba; padei lawh baly kai i chengchi ly pany jo y ai i, tami veng ai. Kaichi ai ama hai iy kry nai keung aw ARENG, nang i sa thai naira hawimy huni khumichi ai ahei hai phro iy, sum hai ba.

¹²Nichi i labeaung, nichi i katheu nai leu ngierei molam y, kamngo sa u teang bo; nichi ly mychi i paleung len maimy patlai teang sy! nichi ly pasawi iy ka-chawi leu katheu u reng nai deaungkho y,

¹³nang ly kado theu iy, nichi ai tamyh pawn ba; myh kang na pa-rei taphra pawn ba. Huna nai khala Tameuh ly Israela chengchi ai peang naimy awm, nanai py, mymy i phum-ang ly khaileaung pri verei y ahei naimy awm, nanai py khumi bawibawichi my pany u ai.

¹⁴Kai i paleung ka-echi ly mary theung y dym tengsa vawi u iy, uichi kamta hmyh naimy aki aleaung u bo.

¹⁵Nichi ly uichi kamta aki aleaung iy, teicha teinei hau u bo; teicha teinei bym pa-rei ngo u y baly hmyh u nai ne.

¹⁶Na i py kai ly nang i sa thai naira satang khulym thui ai; nang i khaw parai nai tamen naira satang ai, khawn tleirei khulym thui ai. Nang ly kai i abyhra khengsi apai, patang naira avum nai khala y kai i abyhra ne.

¹⁷Kai mang y ama hai nai keung, kai ly nang ai kang palo ai; Tameuh ly kai i abyhra, kai ai tamen nai keung Tameuh ne.