Read Khumi Chin SAM 68 Bible Online

SAM 68 - Khumi Chin bible

SAM 68

¹[67] Tameuh ly ang thau iy mymy i paleung ka-echi ai ahei hai; mymy ai niu ngai y nai khumichi ly sum iy preang pawn bo.

²Mymy ly nichi ai ali theung y ajang nai maikhyh kamta, ajang hai pawn bo; phajeaungdeng ly mai kabi y tlawn nai kamta, khumi hawi y naichi ly Tameuh i mo y dei naimy phra u ai.

³Khumi kahawichi ly mymy i mo y amo theu u bo; nichi ly khrikhri pa-rei amo theu u iy, amo theu naimy aeu u bo.

⁴Tameuh ai khulym thui pi u; mymy i amyn y palo nai khulym thui u; tamai tleaung y atang[68]nai keung i vui lam so pi u; mymy i amyn ly ARENG ne; mymy i mo y amo theu u.

⁵Achura yhm kachai y awm nai Tameuh ly nurochochi ai kry iy, neampachy lumaichi ai ama hai nai ne.

⁶Mymy ly bengtlairei awm nai khumichi ai yhmtheaung sa ai nai pei iy, theaung tla nai khumichi ai kawm cheng naira i lawi hai bo; na i py mymy ai tiu nai khumichi ly tui by y nai meingtym y awm u ai nai tla ai.

⁷Aw Tameuh, nang ly nangmy i khumichi ai pahawi iy daichi ka-vym tako prei nai khala py,

⁸khaileaung ly amchyh i, kani mang dengdairei kani nai bo; ati mana nai mo nabaly Sinai mawi i Tameuh, napi nai Israela chengchi i Tameuh ly ang jeu nai deaungkho y ne.

⁹Nang ly khri pa-rei kani taawi hai nai deaungkho y, atho bai nai pri ai khesere hai ali teang bo.

¹⁰Nang i khumichi ly huni meingtym y awm u bo; ngari kamtang avum nai khumichi ly nang i nang parai naira molam y, cha nei takang u y nai ne.

¹¹ARENG my leu pei nai deaungkho y, neampachy neangneangchi ly,

¹²“Samrangchi hawi nichi i tavaimichi ly anaw u pawn veng bo,” nanai satang ahei u ai; neampachychi ly mychi i yhm y, lawmra i nga nai vawnsaichi amji u ai.

¹³Huni vawnsaichi ly muku sadi iy, pakhi muichi awm nai tangka hawi mym nai buhu mynchi ne. (Nangchi phyrei ly tavai atiu nai kani y, ati mana nai beram hai theung y awm u mo?)

¹⁴Ati cheaungkhang sa thai nai Tameuh ly Zalmon mawi salo y samrangchi ai ahei hai nai khala, huni mawi salo y kadamchi tla hai bo.

¹⁵Bashan mawi ly khri pa-rei len na ly! mawi saleung kamsuichi neangneang awm nai mawi ne.

¹⁶Mawi aheung len parai naichira i dengdairei nang ly ati mana nai Tameuh awm ai nai vawi takhra nai mawi ai, mei aniu y nai paleung hawi khen lawh mo? ARENG ly huni mawi salo y deungtasarei awm jojo ai!

¹⁷ARENG ly atho awm parai nai tavai ka-ri sang neangneangchi hawi, Sinai mawi i nai chai parai nai meingtymra y ang jeu bo.

¹⁸Mymy ly langheng hawi naichi ai hawi iy, asang nai meingtym mang y lyn kalau bo; mymy ly tiu nai khumichi teng i langseaungchi nga bo. ARENG Tameuh ly huni meingtym y awm ai.

¹⁹Kaichi i myn kajichi ai kani tleirei pho pi nai keung Areng ai palo u; mymy ly achi ai atleu nai Tameuh ne.

²⁰Achi i Tameuh ly atleu nai keung Tameuh ne; mymy ly ARENG, deira i nai atleu nai, achi i Areng ne.

²¹Tameuh ly mymy i paleung ka-echi hawi, kamngo sa veangveang nai khumichi i lu tameang angchi khyp ai.

²²Areng my, “Nangchi ly paleung ka-echi i thi y aleaung u pajau ai nai hawi, nangchi i uichi ly nichi i thi ngai nai ryrei palei u ai nai,

²³nichi ai Bashan pri dengdairei, kaimy kapahawi ali teang ai. Suida pangli tui thiu parai nai theung i dengdairei, kapahawi ali teang ai,” nanai leu pei bo.

²⁴Aw Tameuh, nang i tavai eaung ai nai amsa nai kai i Tameuh ly kachai meingtym mang y kun nai khumi bawibawichi my niu u nai ne.

²⁵Khulym thui nai khumichi ly mo mang abang iy, katyn kapau beu nai khumichi ly nithun mang abang u bo. Atym beu nai neampachy deaungdichi ly sala mang abang u nai ne.

²⁶“Mymy i khumichi achu naira y, Tameuh ai palo u; Jakob i katu chanau bawibawichi awi, ARENG ai palo u!

²⁷Tako nai huni khumichi theung y theang keh nai Benjamin theaungchi, huni bo y Juda lu sa naichi hawi cheng theaungchi, nichi nithun y Zebulon hawi Naphtali lu sa naichi hawi cheng theaungchi abang u nai ne.

²⁸Aw Tameuh, samrangchi my nang teng y langseaungchi talam naira y,

²⁹Jerusalem mary Achura yhm i nai, kaichi i vui teaung ai nai sa thai naira patei pi kyh ba.

³⁰Samji theung i daichi mawi kasi, napi nai Aikupta pri ai parip kyh ba. Si katai beaungjeaungchi hawi, nithun mang abang nai si nu tanglochi, napi nai khumi chengchi ly nang teng y lu meung iy langseaung talam nai pa-rei nichi ai parip ba. Tavai atiu ai ngai nai khumichi ai ahei hai ba.

³¹Aikupta pri i savaichi ly nang teng y ang jeu u ai; Ethiopia pri khumichi ly kiu pheu iy, Tameuh teng y chiu sa hnei takeng u ai.

³²Khaileaung pri bawibawichi awi, Tameuh ai khulym thui naimy palo u; Areng ai khulym thui naimy palo u.

³³Jangni dengdairei awm yb nai kani mang i awm nai Tameuh ai palo nai khulym thui pi u. Tao pajeng parai naimy leu pei nai raawi tangai u.

³⁴Tameuh i sa thai naira amthang hai u; mymy i nang parai nai ly Israela chengchi tlang tleaung y khiu iy, mymy i phum-ang ly kani khusang mang y amteng bo.

³⁵Kachai meingtym i dengdairei ang jeu nai, Israela chengchi i Tameuh ly tahm khai naimy jei ai nai hawi parai na! Mymy ly mymy i khumichi ai sa thai naira hawi, ham naira pei nai ne. Tameuh ai ly palo u!