Read Khumi Chin SAM 71 Bible Online

SAM 71 - Khumi Chin bible

SAM 71

¹Aw ARENG, nang teng y abyh ai nai kai ly ahihawi nai ne; kai ai mana khala py, sum hai moh kyh jemjem ba!

²Nang ly leu meitang adyh adawi nai deaungkho y, kai ai sabawm kyh ba, atleu kyh ba. Kai i hnei takeng nai ai tangai pi iy atleu kyh ba!

³Nang ly kai i abyhra lengseaung pui ne; kai ai ama hai ai nai molam y, khaw parai nai lengseaung apai lawm ba; nang ly ai i abyhra, kai ai ama hai nai keung ne.

⁴Kai i Tameuh, kai ai khumi hawi y naichi teng i nai atleu kyh ba; pahyp y naimy ana nai khumichi kiu i nai atleu kyh ba.

⁵Ati cheaungkhang sa thai nai keung aw ARENG, kai ly nang ai angdeang nai ne; deaungdichy khala i dengdairei, nang ai kang ym bo.

⁶Kai ly kaimy deungrei nang teng y abyh nai ne; kai ai tapen khyp khala i dengdairei, nang ly kai ai ama hai bo. Kai ly nang ai avawrei palo ai.

⁷Nang ly kai i vui khaw parai nai abyhra ne nai deaungkho y, kai ly khumichi mo y atiura lawm bo.

⁸Kai ly kani khengrei nang ai palo iy, nang i nang parai nai amthang hai bo.

⁹Vai i neng y kai ly miteaung cheang nai deaungkho y, kai ai khai su moh ba. Vai ly kho bai bo i, kai ai khai su moh kyh ba.

¹⁰Kai i paleung ka-echi ly kai ai padei ai nai ngai u nai deaungkho y, arum pasym u bo.

¹¹“Ni i Tameuh ly ni ai khai su bo; ni ai atleu ai nai khumi leaungrei py by y nai deaungkho y, ni ai patiu u sina,” nanai thui u bo.

¹²Aw Tameuh, kamlora y awm pi veng moh ba; kai i Tameuh, kai ai sabawm ai nai jeu kaliki kyh ba.

¹³Kai ai tiu nai khumichi ly sum iy phra u sy. Kai tamo kalem nga pa-rei atho sa u nai khumichi ly kangji nga iy tahm anem u sy.

¹⁴Kai ly nang ai ajeng jojo ai; nang ai avaw avawrei kang palo ai.

¹⁵Kai ly nang i hawi nai sai kathui ai; nang i atleu nai ly kai i pany nai tleaung y thiu parai nai ne; na i py huni pahen nai satang ai kai ly kani khengrei thui ai.

¹⁶ARENG Tameuh i sa thai naira saho y kachei ai; nang naini hawi, nanai satang kai ly amthang hai ai.

¹⁷Nang ly kai ai deaungdichy khala i dengdairei parip nai ne i, kai ly nang i sa nai lyh ai hawi parai naichi, vaini khrairei kathui jo nai ne.

¹⁸Vai i neng y kai ly miteaung cheang bo i, sam py pau bo; aw kai i Tameuh, kai ai khai su moh kyh ba! Kai ly mo mang i katu chanau kangpreang bawibawichi teng y, nang i sa thai naira nang parai nai satang amthang hai nai khala, kai hawi vanrei awm kyh ba.

¹⁹Aw Tameuh, nang i leu meitang adyh adawi nai ly kani mang y khrairei tym nai ne; ati mana nai mo nabaly nang ly nang parai nairachi sa nai deaungkho y ne. Nang hawi atawm nai khumi leaungrei py by y.

²⁰Nang ly kai ai khri pa-rei patang nairachi avum hai teu i py, nang ly kai ai atho awm hai teang iy, deira i nai atleu pi bo.

²¹Kai ai jangni i tleaung y nang tleaung nang hai ra iy, awmnem naira pei ali teang bo.

²²Kai ly meitang khyp, nang ai taro beu naimy kang palo ai; aw kai i Tameuh, kai ly nang i ka-ym awm nai sai ai palo ai. Israela chengchi i nang parai nai keung ne nai nang ai taro beu iy khulymchi hawi palo ai.

²³Nang i vui taro beu nai thym khala y kai ly amo theu naimy khulym thui ai; nang ly kai ai atleu nai deaungkho y, kai ly paleung hawi verei khulym kathui ai.

²⁴Kai ai phra hai ai naira hau nai khumichi ly sum iy, tahm anem u nai deaungkho y, nang i hawi naira satang kani khengrei kathui ai.