Read Khumi Chin SAM 72 Bible Online

SAM 72 - Khumi Chin bible

SAM 72

¹[71] Aw Tameuh, nang i leu meitang hawi kamlau tara chih pajau ai nai samrang ai patiu pi kyh ba.

²Nang i khumichi ai leu meitang adyh adawi naimy peang pajau ai nai py, khumi kamawnchi ai reita hawi kamlau peang pajau ai nai py, nang i leu meitang adyh adawi nai kamta tara chih pajau ai nai samrang ai pei pi ba.

³Pri theung y tlamsa iy, leu meitang adyh adawi naimy peang sy.

⁴Samrang ly khumi kamawnchi ai adyh adawi naimy tara chih pi sy; khumi kamawnchi ai sabawm pi sy; ana pumpi nai khumichi ai pasum pi sy.

⁵Kanito angvang iy, lo ly kangvang pei nai ryrei, nang i khumichi ly nang ai deungtasarei jei kaji naimy, tahm khai u sy.

⁶Samrang ly li, hlauchi salo y nai pi nai kanitui kamta py, khaileaung salo y tla nai kani amaichi kamta py lawm sy.

⁷Samrang i deung y leu meitang adyh adawi naimy peang hai sy; lo my kangvang pei nai ryrei ly tlamsa naira awm sy.

⁸Samrang ly pangli katem y tym pa-rei py, Euphrat tavo dengdai khaileaung katem khrairei py peang ai.

⁹Khutaha daichi ka-vymra i khumi bawibawichi ly samrang i mo y lu meung u sy; samrang i paleung ka-echi ly my i kheu keung y angbeu u ai.

¹⁰Spain pri hawi tlawnchira i samrangchi ly kahm pei u ai; Arabia pri hawi Ethiopia pri i samrangchi ly langseaungchi syn u ai.

¹¹Samrang bawibawichi ly mymy i mo y ambeu u ai; khumi cheng cheaungkhangchi py, samrang i miseaung lawn u ai.

¹²Samrang ly my teng y aeu u nai khumi kamawnchi ai py, patang palai iy jeaungmang nai khumichi ai py atleu bo.

¹³Patang palai nai khumichi ai tamen iy, nichi i tlang ai atleu bo.

¹⁴Nichi i hengra ly samrang i mo y vang teng nai molam, ana naira hawi khrukhra nairachi ra i nai, nichi ai atleu bo.

¹⁵Samrang ly heng sau sy! Arabia pri i mukuchi langseaung ngo sy; khumichi ly samrang i vui y avawrei chiu so pi u sy; Tameuh ly samrang ai amtheaung naira pei jojo sy.

¹⁶Pri theung y teicha teinei awm ma mang sy; Lebanon mawi y ly dengkeaung thengreungchi hawi, vengkhiu naimy awm nai kamta, mawichi ly amti amjangchi hawi kawi na naimy awm sy; mary kalenchira y awm nai khumi vuikanai ly adym angdengra y prau nai acha kamta peung sy.

¹⁷Samrang i amyn ly awm jojo sy; amyn amthang nai ly kanito kamta awm jojo sy. Tameuh ly samrang ai amtheaung naira pei nai kamta, khumi cheng cheaungkhangchi ly mychi ai py, amtheaung naira pei ai nai Tameuh teng y hnei u sy.

¹⁸Israela chengchi i Tameuh napi nai ARENG ai ly palo u! Mymy naini hina nai lyh ai hawi parai naichi sa nai ne.

¹⁹Amyn nang parai nai ai avawrei palo u! khaileaung pri verei y nang parai nai kawi hai sy. Amen! Amen!

²⁰Hini ly Jese i chapo Davida i chiu sa hnei takeng naichi ne i tem bo.