Read Khumi Chin SAM 73 Bible Online

SAM 73 - Khumi Chin bible

SAM 73

¹[72] Tameuh ly paleung chai nai khumichi napi nai Israela chengchi ai meitang khyp, hawi hai nai ne.

²Na i py khumi hawi y naichi, nang chawn nai ai kai niu nai khala, paleung len nai khumichi ai khen ai ngai y nai paleung awm nai deaungkho y

³kai ly kapathui khe i, atlym vi nai ne; kai i kheuchi py athei vi na bo.

⁴Huni khumichi ly no patang naira avum u y; noso hawi iy atho awm nai khumichi ne.

⁵Nichi ly takhra khumichi kamta, no patang naira avum u ai; takhra khumichi kamta, patang naira tym u y.

⁶Hunai deaungkho y nichi ly amlyh am-e nai ai pahu leng kamta py, khrukhra naira ai baichu kangjiu kamta py ateaung u bo.

⁷Nichi i paleung dengdairei hawi y nairachi patheu iy, nichi i paleung ly kamngo nai katauchi dawn pasym u nai ne.

⁸Nichi ly khumi takhrachi ai panui hai iy, chai y nairachi katheu u; paleung len iy khumi takhrachi ai ana pumpi ai nai dawn pasym u bo.

⁹Nichi ly kani pri mang y awm nai Tameuh ai mei aniu y nai leu katheu iy, khaileaung pri y awm nai khumichi ai kado theu naimy leu pei u bo.

¹⁰Hunai deaungkho y Tameuh i khumichi malawn py, nichi mang y abawi iy, nichi i katheu nai leu ngierei ai ym u nai ne.

¹¹Nichi my, “Tameuh ly pany ai ny y leang; salo kangteng y awm nai keung ly niu pajau ai ny y,” nanai thui u.

¹²Huni ly khumi hawi y naichi i sa nai sai ne; na i py nichi ly nang tleaung nangra bo.

¹³Hunai deaungkho y kai ly amy i paleung ai chai hai iy kamngo so y naimy awm nai ly atyhtyh lawh a?

¹⁴Aw Tameuh, nang ly kai ai kani khengrei patangra tym hai bo; nang ly kai ai khawn tleirei pajeng bo.

¹⁵Kai ly hina nai kamta kathui lawh baly, nang i khumichi i jeng y thui nai ny y leang.

¹⁶Huna nai y kai ly hini leaungsaichi pany ai nai atho sa naimy adawn pasym bo; na i py huni ai pany thai ai nai khri pa-rei rai parai.

¹⁷Kai ly nang i Achura yhm theung y tym khala naini, khumi hawi y naichi ati mana tem u ai mo, nanai kapany vau ai.

¹⁸Nang ly nichi ai athei reng nai meingtym y athei hai iy myh kang hai ai.

¹⁹Nichi ly vaimy myh kang u ryp bo; nichi i kangkhym kangtem avum nai sai ly jei ai nai hawi parai nai ne.

²⁰Nichi ly khawn mang y amang tami vui nai kamta ne; aw Areng nang ang thau nai khala y, nichi ly tama u veng bo.

²¹Kai ly paleung si paleung mawn iy, paleung no-ei nai khala y,

²²amso tawnbawi kamta akhum nai deaungkho y, kai ly nang i mo y cheng naira by y.

²³Na i py kai ly nang i sahawi y kaawm jojo; nangmy py kai i kiu amkhaw cheng bo.

²⁴Nang ly kai ai tau pei naimy lam patei ai i, kangkhym y ly kai ai tahm pasang ai nai ngai ai.

²⁵Kai i vui ly nang ny y baly kani pri mang y ami awm ai mo? Nang ly kai hawi vanrei awm baly, khaileaung pri y ati aly ngai rai mo?

²⁶Kai i tlang hawi paleung ly atho di ai; na i py Tameuh ly kai i ham naira ne; kai ly nang ny y baly ami ai py aly ngai y.

²⁷Nang ai khai su nai khumichi ly myh kang nai avum u takengkei ai; nang i tlang tleaung y ka-ym by y nai khumichi ai nang ly tamyh ai.

²⁸Na i py kai i vui ly Tameuh i sahawi y awm ai nga nai, salo kangteng ARENG teng y abyh ai nga nai hawi, mymy i sa nai rengrang nai saichi ai, amthang hai ai nga nai ly khri pa-rei hawi parai na ly!