Read Khumi Chin SAM 74 Bible Online

SAM 74 - Khumi Chin bible

SAM 74

¹[73] Aw Tameuh, nang ly ati mana nai y kaichi ai, hina nai kamta khai su lawh mo? Nang ly nangmy i khumichi ai avawrei kado theu hai jojo ai bo a?

²Jangni dengdairei nangmy vawi takhra nai khumichi, nangmy i khumichi lawm ai nai miseaung i nai atleu pi nai khumichi ai pany jo ba. Vaichi khala nangmy awm reng nai Zion mawi ai pany jo kyh ba.

³Kaichi i paleung ka-echi ly Achura yhm theung i, ati cheaungkhangchi ai taphra u pawn veng bo; nang ly jeu iy phra veng naichi ai khen ba.

⁴Nang i paleung ka-echi ly Achura yhm theung y eaung nai aeu u bo; nichi ly Achura yhm theung y eaung nai tamkhawnchi theaung u bo.

⁵Nichi ly atiu hawi dengkeaungchi paliu nai khumichi kamta,

⁶Nichi ly Achura yhm i dengkeaung hawi myn oh nai keung i kupe lasachi ai atiu marenchi hawi taphra piupa bo.

⁷Nichi ly nang i Achura yhm ai mai leng u bo; nang ai chiu naira meingtym ai taphra iy, chai hai y bo.

⁸Nichi ly kaichi ang thau pajau y ai nai pa-rei, taphra ai nai ngai u bo; pri verei y awm nai chiu sa naira meingtymchi ai mai leng u pawn nai ne.

⁹Kaichi i reita leaungsai ka-ma-ra bawibawichi py by y bo; amochi py by y pawn bo; huna nai tym nai ly mana tanrei kra ai mo, nanai ami py pany khyp pajau y.

¹⁰Aw Tameuh, paleung ka-echi ly nang ai mana tanrei panui hai ai mo? Nichi ly nang i amyn ai avawrei thui tamawn u ai bo a?

¹¹Ati mana nai y nang ly kaichi ai sabawm ai nai akhi lawh mo? Ati mana nai y nang i kiu ly nithun mang y, atakawi me vui lawh mo?

¹²Na i py aw Tameuh, nang ly angchei khala i dengdairei kaichi i samrang ne. Nang ly kaichi ai neng neangneang atleu pi bo.

¹³Nang ly nangmy i sa thai naira hawimy, pangli ai akhawi hai iy, tuireng namchi i luchi ai pakhau piu bo.

¹⁴Nang ly tui naka pui levithan i luchi ai py pakhau piupa iy, ni i tlang ai ly daichi thengreung i mawi kasichi my cha ai nai pei pawn bo.

¹⁵Nang ly tavo tui hawi micheaung tui theu hai iy, tavo kalenchi ai kang hai bo.

¹⁶Nang ly vum hawi kanithun ai sa iy, kanito hawi lo ai meingtym tahyh pi bo.

¹⁷Nang ly khaileaung i khujyh patleh pi iy, kanipui hawi kaseih khai pi nai ne.

¹⁸Na i py aw ARENG, nang i paleung ka-echi ly nang ai panui hai nai py, nichi ly Tameuh pany y iy nang ai mei aniu y nai sa nai py pany pi bo.

¹⁹Nangmy i khumi nuro nukaichochi ai ly pahyp y naimy ana nai paleung ka-echi teng y khai su moh kyh ba; Ana patang naira avum nai nang i khumichi ai ly tami moh kyh ba.

²⁰Kaichi hawi nang hawi asa nai Leu Maikawm ai pany jo ba; pri theung i veng nai meingtym tleirei y, khrukhra naichi awm.

²¹Ana patangra avum naichi ai ly kangji ngo hai moh kyh ba; huni ngari kamtangchi my ly nang ai palo u sy.

²²Aw Tameuh, ang thau ly nang i sa thai naira tym hai ba; Tameuh ai pany y nai khumichi my, nang ai kani khengrei panui hai nai ly pany jo ba.

²³Nang i paleung ka-echi i kado theu naimy aeu nai katyn nang ai paleung ka-e ang khai nai khumichi i avawrei aeu nai katynchi ai tami pi veng moh ba.