Read Khumi Chin SAM 79 Bible Online

SAM 79 - Khumi Chin bible

SAM 79

¹[79] Aw Tameuh, nang i pri theung y Tameuh ai pany y nai khumichi ang kun u miuh bo; nichi ly nang i Achura yhm kachai ai chai hai y bo; Jerusalem mary ai py taphra u veng nai ne.

²Nichi ly nang i khumi veuchi ai langnachi cha hai ai nai py, nangchi i miseaung veuchi ai daichi mawi kasichi my cha hai ai nai py, aphi u su bo.

³Nichi ly nang i khumichi i thi ai tui kamta leaung hai; thi ly Jerusalem mary theung y leaung prei na bo; veuchi up ai nai khumi leaungrei py by y.

⁴Tengpang sahawi y awm nai prichi my ly panui hai iy thui preaung u nai ne.

⁵Aw ARENG, nang ly kaichi ai kado theu naimy awm jojo ai bo a? Nang i kado theu nai ly rym y naimy, mai kamta angveaung jojo ai bo a?

⁶Nang ai chiu y nai khumichi hawi. nang teng y chiu sa hnei takeng y nai khumichi ai py, kado theu hai bo.

⁷Huni khumichi ly nang i khumichi ai padei u. Nang i pri ai py phra seaungkhrang hai bo.

⁸Amsi pajochi i kamngo nai molam y, kaichi ai pajeng moh kyh ba; vai ly kaichi ai pahen ba; kaichi ly athang khai naira by y bo.

⁹Aw Tameuh, kaichi ai sabawm ly atleu kyh ba; nang i amyn saho y kaichi ai atleu iy, kaichi i kamngochi py pahen pi kyh ba.

¹⁰“Nangchi i Tameuh ly ma mang y mo?,” nanai khumi cheng cheaungkhangchi ly ati mana nai y deng u lawh mo? Nang i khumichi i thi leaung hai nai khumichi i tlang tleaung y kamngo pajeng nai ly kaichi niu ai nai ngai.

¹¹Theaung tla nai khumichi i tangam nai raawi ly tangai pi kyh ly dei ai naira avum nai khumichi ai nang i sa thai naira len parai nai hawimy law tleaung hai kyh ba.

¹²Aw Areng, nang ai mei aniu y nai leu thui u nai prichi ly phy saryhrei mei aniu y naira avum hai ba.

¹³Huna nai khala y beram kanghu napi nai nang i khumi kaichi ly kawn naimy avawrei kang palo jojo ai; katu chanau deungrei kang palo u jojo ai.