Read Khumi Chin SAM 80 Bible Online

SAM 80 - Khumi Chin bible

SAM 80

¹[80] Israela chengchi i beram typ nai keung awi, kaichi i hnei takeng nai tangai pi kyh ba. Beram kanghuchi ai pahawi nai keung awi, kaichi i hnei takeng nai tangai pi kyh ba. Kheruben salo y awn nai keung awi,

²Ephraim, Benjamin hawi Manase cheng theaungchi teng y amteng iy sa thai naira patei naimy jeu ly kaichi ai atleu kyh ba.

³Aw Tameuh, kaichi ai vawi ali teang hai kyh ba! Kaichi teng y pahen naira pei kyh ba; naibaly kaichi ly atleu naira nga u ai!

⁴Ati cheaungkhang sa thai nai keung ARENG Tameuh, nang ly mana tanrei, nangmy i khumichi chiu sa nai ai kado theu naimy awm ai mo?

⁵Nang ly kaichi ai paleung si naira napi nai teicha teinei pacho iy, meikatui napi nai tui ly khau kalen pui hawi panei bo.

⁶Nang ly kaichi i pri ai, tengpang y awm nai prichi i tavai atiura meingtym lawm hai bo; paleung ka-echi ly kaichi ai khumi aniu y bo.

⁷Ati cheaungkhang sa thai nai keung Tameuh! Kaichi ai vawi hai ali teang kyh ly nang i pahen naira kaichi teng y patei kyh ba; hunaibaly kaichi ly atleu naira nga ai!

⁸Nang ly Aikupta pri i kreip keung syn iy, cheng takhrachi ai patheu pawn chum baly, nichi i pri y huni kreip keung ui bo.

⁹Nang ly kreip keung prau thai ai nai meingtym palum pachai pi bo; huni keung ly thiu parai pa-rei tangjyn aviu i, pri verei y khiu na bo.

¹⁰Huni kreip keung ly mawi aheungchi ai, my i ka-khui hawi khiu meuh iy, len parai nai saitleang keungchi ai, my i changpichi hawi khiu hai meuh bo.

¹¹Huni i changpi ly Mrethe pangli y khrairei py, palo parai nai Euphrat tavo tym pa-rei py amjang na.

¹²Huni keung kamki akawm nai apaichi ai, nang ly ati mana nai y aphrei vui lawh mo? Vai ly huni sahawi mang aki aleaung nai khumi luteng ly kreip athaichi paviu ai nai nga bo.

¹³Sumtavui sumngaichi ly huni keung ai chiu piupa iy, daichi amso mawichi ly cha u nai ne.

¹⁴Ati cheaungkhang sa thai nai keung Tameuh! kaichi teng y jeu ali teang kyh ba; kani mang dengdairei khen kathiu iy jeu ly nangmy i khumichi ai atleu kyh ba!

¹⁵Jeu ly nangmy kypkyp ui iy, keung cheang pa-rei bawn nai kreip keung ai atleu kyh ba!

¹⁶Kaichi i paleung ka-echi ly huni keung ai ateng iy, mai leng pawn bo; kado theu nai mei hawi nichi ai khen iy, taphra pawn kyh ba!

¹⁷Nangmy vawi takhra nai khumichi hawi atho awm pa-rei nangmy palum nai khumichi ai amo hai kyh ba.

¹⁸Kaichi ly nang teng i nai mana khala py, hi vui ai ny y; kaichi i tlang heng ai nai pei baly, kaichi ly nang ai palo ai.

¹⁹Ati cheaungkhang sa thai nai keung ARENG Tameuh, kaichi ai vawi ali teang ai nai pei kyh ly nang teng i pahen naira kaichi teng y patei kyh ba; hunaibaly kaichi ly atleu naira nga u ai.