Read Khumi Chin SAM 83 Bible Online

SAM 83 - Khumi Chin bible

SAM 83

¹[83] Aw Tameuh, tyn teng y naimy awm pi vui moh ba; awmnem pi vui moh ba, amkyn pi vui moh ba!

²Nang i paleung ka-echi ly khrukhrala naimy awm u bo; nang ai niu ngai y nai khumichi ly ang tiu bo.

³Nichi ly nang i khumichi ai tiu ai nai dawn paviu u bo; nangmy ama hai nai khumichi ai tiu ai nai, nichi arum u bo.

⁴Nichi my, “Jeu u, Israela chengvui jeungrei, deungtasa tama vui ai nai, nichi cheng theaung ai tamyh u pawn sina,” nanai thui u nai ne.

⁵Nichi ly paleung adyh naimy arum u iy, nang ai tiu u ai nai amsawi amnai asa u bo.

⁶Huni amsawi amnai asa naira y Edom hawi Ismaela chengchi, Moba hawi Kakara chengchi,

⁷Kebala, Ammon, Amalek, Philistia chengchi hawi, Turu mary i khumichi abawi u nai ne.

⁸Asuria chengchi py. Lota i katu chanauchi ne nai Ammon hawi Moba mang y amkawm u bo.

⁹Endora meingtym y Midian chengchi hawi, kishon tavo sahawi y, Sisera samrang hawi Jabin samrang nini py,

¹⁰tavai sum u nai deaungkho y, nichi i veuchi ly tavai atiu nai meingtym y veaung tlawn nai kamta, huni amsawi amnai asa nai kamkawm ai py, huna nai khaileaung y veaung tlawn naira vum hai ba.

¹¹Oreb samrang hawi Zeeba samrang ni ai nangmy sa nai kamta, nichi i luchi ai so ba; Zeeba samrang hawi Zalmuna samrang ni ai sa nai kamta, nichi i samrang bawibawichi ai py sum hai ba.

¹²Zeeba samrang hawi Zalmona samrang nini my, “Ani ly Tameuh i peang nai pri lo veng sina,” nanai thui hawi nai ne.

¹³Aw Tameuh, nichi ai ali lenglira abawi nai spryh kamta ahei hai pawn ly ali aho naira abawi reng nai choh ali kamta lawm hai ba.

¹⁴Dengkeaung thengreung ai kang hai nai mai kamta, mawichi ai kang hai nai mai pui kangveaung kamta,

¹⁵nangmy i ali kani hawi nichi ai kamlo mang y paryh pawn ba; nangmy i ali kamchai hawi nichi ai jei hai ba.

¹⁶Aw ARENG, nichi ly nang i sa thai naira len parai, nanai pany hai ai nai meimai y kangji ngo hai ba.

¹⁷Nichi ly avawrei sum naimy jei hyn u sy; nichi ly pipi tahm by y naimy dei u sy.

¹⁸Nichi ly nang leaungrei naini ARENG ne, nanai hawi, khaileaung pri verei y samrangchi tleaung y samrang ne, nanai py pany u sy.