Read Khumi Chin SAM 86 Bible Online

SAM 86 - Khumi Chin bible

SAM 86

¹[86] Kai ly atho di iy, jeaungmang naimy awm bo; huna nai y aw ARENG, kai i hnei takeng nai tangai pi ly pathang pi kyh ba.

²Kai ly nang i tlang tleaung y ka-ym awm nai deaungkho y, deira i nai kai ai atleu kyh ba; kai ly nang ai ym nai miseaung ne nai deaungkho y, kai ai atleu kyh ba.

³Nang ly kai i Tameuh ne; hunai deaungkho y kai ai pahen kyh ba; kai ly nang teng y kani khengrei chiu kasa nai ne.

⁴Aw Areng, kai ly nang teng y chiu kasa i, nang i miseaung ai amo theu hai kyh ba.

⁵Nang teng y ly kaichi i tlang tleaung y hawi naira hawi, kamngo palawi pi thai naira awm; nang teng y chiu sa nai khumi bawibawichi tlang tleaung y tym nai, khaw parai nai tamen naira ly kawi na bo.

⁶Aw ARENG, kai i chiu sa nai tangai pi kyh ba; sabawm naira nga ai nai kai i aeu nai raawi thai pi kyh ba.

⁷Nang ly kai i chiu sa nai tangai pi nai deaungkho y, patang naira avum nai neng khala y, kai ly nang ai kang palau nai ne.

⁸Aw Areng, nang kamta Tameuh ly by y; nang i sa nai kamta mani tameuh py so vai y.

⁹Nangmy sa nai khumi cheng cheaungkhangchi ly jeu iy, nang i mo y lu meung u ai; nichi ly nang i nang parai nai sai palo u ai.

¹⁰Nang ly sa thai naira phum-ang len parai i, lyh ai nairachi sa pi bo; nang leaungrei naini Tameuh ne.

¹¹Aw ARENG, nang i kangai sa ai nai kai ai leu pei ba; kai ly ka-ym awm naimy tangai ai; nang i kalop ai takhawi y pa-rei sa thai ai nai, kai ai patiu pi kyh ba.

¹²Aw Areng, kai i Tameuh, kai ly nang ai paleung hawi verei kang palo ai; kai ly nang i nang parai nai avawrei amthang hai ai.

¹³Kai i tlang tleaung y nang i khaw parai nai tamen naira ly khri pa-rei len parai na ly! Nang ly kai ai tavau kho i nai atleu bo.

¹⁴Aw Tameuh, paleung len amlyh nai khumichi ly kai ai padei ai nai atho sa u nai ne; nichi ly nang ai tahm khai u y.

¹⁵Na i py aw Areng, nang ly pahen nai hawi tamen reng nai Tameuh ne; nang ly neaung hawi jojo nai ne; avawrei pahen naimy ka-ym awm bo.

¹⁶Kai teng y jeu ly kai ai pahen kyh ba; kai ai atho haiho pei iy atleu kyh ba; ati mana nai mo nabaly kai ly kai i amhm kamta, nang i miseaung kalop sa pi nai deaungkho y kai ai atho haiho pei iy atleu kyh ba.

¹⁷Aw ARENG, nang ly kai i tlang tleaung y, nangmy hawihai nai sai pany hai kyh ba; kai i tlang tleaung y nangmy awm hai nem nai hawi sabawm nai ly kai ai niu ngai y nai khumichi niu nai khala y kangji nga u ai.