Read Khumi Chin SAM 89 Bible Online

SAM 89 - Khumi Chin bible

SAM 89

¹[89] Aw ARENG, kai ly nang i khaw parai nai tamen naira satang ai avawrei khulym thui ai; kai ly nang i ka-ym awm nai sai ai, neng tleirei amthang hai ai.

²Nang i tamen naira ly deungtasa khaw iy, ka-ym awm nai py kani khusang kamta khaw, nanai kai pany bo.

³Nangmy ly “Kaimy vawi takhra nai khumi hawi Leu Maikawm asa bo; kai i miseaung Davida teng y,

⁴“Nang i kangpreang ly samrang lawm jojo ai; nang i samrang kangpreang ly amtawn jojo ai,’ nanai kaimy leu adeu bo,” napi.

⁵Kani pri ichi ly nang i rengrang sa nai satangchi ai khulym thui u bo; aw ARENG, khumi kachaichi ly nang i ka-ym awm nai satang khulym thui u nai ne.

⁶Aw ARENG, kani pri mang y nang hawi atawm nai ami awm mo? mani kanicho ly nang hawi pata pajau ai mo?

⁷Nang ly khumi kachaichi i council ra y, tahm pasang ai nai ataing nai ne’ nichi ly nang ai khri pa-rei jei naimy tahm khai u bo.

⁸Ati cheaungkhang sa thai nai keung ARENG Tameuh, nang kamta phum-ang len parai nai ly by y; aw ARENG, nang ly cheaungkhangra y ka-ym awm nai ne.

⁹Nang ly tui sampyhchi len nai pangli ai peang iy, khri pa-rei len nanai tui sampyhchi ai rym hai ba.

¹⁰Nang ly tuirengnam Rahabi ai padei iy, tamyh veng bo; nang i sa thai naira hawimy, nangmy i paleung ka-echi ai pasum bo.

¹¹Kani khusang ai py, khaileaung ai py peang nai ne; nang ly khaileaung hawi khaileaung salo y awm nai ngiereichi ai sa nai ne.

¹²Nang ly tosyh ngan hawi tokalawi ngan ai sa nai ne. Tabor mawi hawi Heramon mawichi ly nang ai amo theu naimy palo u bo.

¹³Nang ly khri pa-rei sa thai naira len na ly! Nang i atho ly khri pa-rei len na ly!

¹⁴Nang i pri ly kateng lam hawi leu meitang salo y langdeng pala nai ne; nang i sa nai ngiereichi ly tamen naira hawi ka-ym awm naira amteng bo.

¹⁵Khulym thui naimy nang ai chiu nai khumichi hawi, nang i pahen nai kangvang y awm nai khumichi ly khri pa-rei taham hawi na a!

¹⁶Ati mana nai mo nabaly, nichi ly nang i molam y kani khengrei amo theu nai hawi, nang i hawi nai sai ai nichi ly nang ai palo u nai deaungkho y ne.

¹⁷Nang ly kaichi ai eaung nai pawi puichi avum hai bo; nang i tamen naira deaungkho y, kaichi ai eaung hai bo.

¹⁸Aw ARENG, nang ly kaichi ai ama hai nai keung vawi takhra pi bo; Israela chengchi i chai parai nai Tameuh, nang ly kaichi i vui samrang khai pi nai ne.

¹⁹Jangni khala y nang ly ka-ym awm nai miseaungchi teng y amteng hai nai ly “Amyn amthang nai sorai risachi ai kaimy sabawm bo; kaimy khumi theung i nai leaungrei ai vawi takhra iy, samrang atehra kapei pi bo.

²⁰Kai i miseaung Davida ai asitui leih iy, kaimy samrang kapalyn nai ne.

²¹Ni ly kai teng i atho nga jojo ai; kai i sa thai naira saho y ni ai ham hai ai.

²²Ni i paleung ka-echi ly ni ai mana khala py, tiu pajau ai ny y; khumi aso y naichi ly ni ai tiu pajau ai ny y.

²³Kai ly ni i paleung ka-echi ai tamyh vui ai; ni ai niu ngai y nai khumi bawibawichi ai padei pawn ai.

²⁴Kai ly ni ai tamen iy ka-ym awm ai; kai ly ni ai eaung hai jojo ai.

²⁵Kai ly ni i pri ai Mrethe pangli dengdairei, Euphrat tavo tym pa-rei kau hai ai.

²⁶Ni ly kai teng y, “Nang ly kai i ampo hawi kai i Tameuh, nang ly kai i abyhra hawi kai i atleu keung ne,” nanai thui ai.

²⁷Kai ly ni ai kai i chapo chalu kapalawn ai; phum-ang len keh nai samrang lawm hai ai.

²⁸Kai ly ni i tlang tleaung y adeu nai leu ly khaw hai jojo ai; kai ly ni hawi asa nai Leu Maikawm ai khaw hai ai.

²⁹Ni i pri ly kani khusang kamta khaw hai ai; ni i katu chanauchi ly samrang lawm jojo ai.

³⁰“Na i py ni i katu chanauchi ly kai i reita leu ai khai su iy, kai i reita leaungsai ai patawm y lawh baly,

³¹nichi ly kai i leu pacheang naichi ai dawndan y iy, kai i reita leu pei naichi ai patawm y lawh baly,

³²kai ly nichi i kamngo sa nai molam y pajeng ai; kai ly nichi i sa tamang nai molam y kapajeng ai.

³³Na i py kai ly Davida ai tamen jojo ai; ni teng y kaimy leu adeu nai ai py taphra ai ny y.

³⁴Kai ly ni hawi asa nai Leu Maikawm ai phra hai ai ny y; kai ly ni teng y pei yb nai leu ka-deu ly harei py ajiu vui ai ny y.

³⁵“Kai ly mana khala y py Davida ai tapawp nai leu thui ai ny y, nanai kaimy i amyn kachai y tlenreira my tem pa-rei leu adeu nai ne.

³⁶Davida i kangpreang ly mana khala py myh kang ai ny y; kani tleirei, kai ly ni i pri khaw hai jojo ai.

³⁷Ni i pri ly kani mang y khaw jo nai lo kamta, khaw naimy awm jojo ai,” napi.

³⁸Na i py nang ly nangmy khai takhra nai samrang ai kado theu hai bo; nang ly ni ai khai su bo, ni ai nyn va bo.

³⁹Nang i miseaung hawi asa nai Leu Maikawm ly taphra vui bo; ni i samrang lukhym py, khaileaung y pala vui bo.

⁴⁰Nang ly ni i mary pui apaichi ai taphra iy, ni i amtangrachi py panawi pi pawn bo.

⁴¹Ni i sahawi mang aki aleaung nai khumi bawibawichi ly ni i yhmtheaung katuichi paviu u; ni i yhm deaungpachi my py panui hai bo.

⁴²Nang ly ni i paleung ka-echi ai eaung ai nai pei; nang ly nichi bawibawi ai amo theu hai bo.

⁴³Nang ly ni i haisau bochi tlum hai pawn iy, ni ai tavai sum hai bo.

⁴⁴Nang ly ni i samrang cheaungvawi la pi vui iy, ni i samrang atehra py, khaileaung y atlym hai veng bo.

⁴⁵Nang ly ni ai neng tym y naimy miteaung cheang hai iy kangji nga hai bo.

⁴⁶Aw ARENG, nang ly meimai aheu pi veng jojo ai bo a? nang i kado theu nai ly mai kamta, mana tanrei angveaung naimy awm ai mo?

⁴⁷Kai i heng nai ly mana tanrei deung dawi mo, nanai pany pi jo kyh ba; nang ly dei nai amjy napi nai kaichi bawibawi ai sa nai ne, nanai pany pi jo kyh ba.

⁴⁸Ami nai ly dei y naimy heng jojo thai ai mo? Khumi ly amymy ai tapreaung y tym y pa-rei, mana paka thai ai mo?

⁴⁹Aw Areng, vaichi khala y thui pi nai nang i tamen naira ly ma mang y awm vui mo? Davida teng y nang i adeu nai leuchi ly ma y mo?

⁵⁰Nang i miseaung kai ly mana tanrei khumi aniu y naira avum na mo, nanai py, Tameuh by y nai khumichi my kai ai pasawi naichi ai mana tanrei kakham pi mo, nanai py, tami pi vui moh kyh ba.

⁵¹Aw ARENG, nangmy vawi takhra nai samrang ai, nang i paleung ka-echi my khumi aniu y nai sa u lawh ly! Nichi ly ni i chei naira tleirei y, khumi aniu y nai sa u bo.

⁵²ARENG ai ly deungtasarei palo u! Amen! Amen!