Read Khumi Chin SAM 94 Bible Online

SAM 94 - Khumi Chin bible

SAM 94

¹Aw ARENG, nang ly kamngo pajeng ai nai aly peang nai Tameuh ne; nang i kado theu nai amteng hai ba!

²Nang ly khumi bawibawichi ai tara chih nai keung ne; ang thau iy paleung len nai khumichi ai mychi hawi ataing nai kamngo pajeng pi ba!

³Khumi aso y naichi ly mana tanrei amo theu u ai mo? aw ARENG, mana tanrei kra ai mo?

⁴Kamngo sa tamang nai khumichi ly mana tanrei paleung len amlyh iy, mychi i sa tamang nai kamngochi ai amlyh naimy awm u ai a?

⁵Aw ARENG, nichi ly nang i khumichi ai chiu piupa bo; nang i peang nai khumichi ai ana u piupa bo.

⁶Nichi ly neampachy lumaichi hawi, nurochochi ai padei u; kaichi i pri y awm nai angvynchi ai py padei u nai ne.

⁷Nichi my, “ARENG ly kaichi ai niu y leang; Israela chengchi i Tameuh ly niu y leang,” nanai thui u bo.

⁸Kai i khumichi awi, nangchi ly ati mana nai y hina tanrei cheng naira by y iy, tau akhum u na mo? mana khala y tau cheng u ai mo?

⁹Achi i kanochi sa pi nai keung ly thai pajau nai ny y a? mei sa pi nai keung ly niu pajau nai ny y a?

¹⁰Khumi cheng cheaungkhangchi ai parip nai keung ly nichi ai pajeng y ai a? khumi bawibawichi ai cheng naira patiu pi nai keung ly pany thai naira awm nai ny y a?

¹¹Huni khumichi i dawn tau naichi ai ARENG ly pany; nichi i dawn pasym naichi ly atyhtyh teu, nanai mymy ly pany nai ne.

¹²Aw ARENG, nangmy thui parip nai khumi, reita leu hawi kamlau, nangmy parip nai khumi ly taham hawi!

¹³Khumi aso y naichi tla ai nai angawm tai nai pajau y kyh rai khala y, neng hawi y nai theung i nangmy, ni ai law tleaung naira pei bo.

¹⁴ARENG ly mymy i khumichi ai aphi su ai ny y; mymy i peang nai khumichi ai ly khai su ai ny y.

¹⁵Tara jeungchira y leu meitang tara chih nai ly awm teang ai; khumi kahawi bawibawichi py, huni leu meitang tara chih nai ai ly paleung pado u ai.

¹⁶Khumi aso y naichi ai ka-awi sa ai nai, kai mang y ami asa hai ai mo? Hawi y sa nai khumichi ai ka-awi sa ai nai, kai mang y ami asa hai ai mo?

¹⁷ARENG my kai ai sabawm y lawh teu baly, kai ly khumi angso savai tlang nai meingtym y, tym kasa lawh ai nai ne.

¹⁸Aw ARENG, “Kai ly athei i, atlym bo,” nanai apany nai khala y, nang i khaw parai nai tamen naira my ly kai ai dawnkhawm vui bo.

¹⁹Kai ly paleung mawn naimy ka-dawn hawi y nai tym nai khala y, nang ly kai ai paleung awmnem naira pei iy amo theu hai bo.

²⁰Nang ly teng y nai kalop ai kateng palawn reng nai, un cha nai tara chih keungchi hawi ly ati sai py amtawn abi y leang.

²¹Nichi ly khumi kahawichi ai padei ai nai pa-rei, tara leu amcheang hai u bo.

²²Na i py ARENG ly kai ai ama hai bo; kai i Tameuh ly kai i abyhra ne.

²³Mymy ly nichi i khumi aso y naichi molam y pajeng ai; mychi i kamngo nai molam y, nichi ai taphra ai; achi i ARENG Tameuh ly nichi ai taphra iy, tamyh pawn ai.