Read Khumi Chin LEU KACHENG 1 Bible Online

LEU KACHENG 1 - Khumi Chin bible

LEU KACHENG 1

¹Samrang Davida i chapo, Israela samrang Solomon i leu kachengchi ne.

²Hini leu kachengchi ly nang ai cheng naira hawi tau kahawichi nga hai iy, thiu parai nai leuchi pany praw thai ai nai ang sabawm ai mang.

³Hini leu kachengchi my nang ai pany thai naira hawi, amhi amtlau thai ai nai py, leu meitang teaung iy adyh adawi naira awm ai nai py patiu pi pajau.

⁴Hunichi ly pany nai sai angym y nai khumi ai dawn pany thai naira pei nai ne. Deaungdichi ai py tau cheng naira hawi leu meitang nga hai pajau.

⁵Hini leu kachengchi ly khumi kachengchi ai, cheng tleaung cheng haira ai.

⁶Prengja kawp nai khumichi ai py thiu parai nai leu maitawmchi awm nai sai thui pachai nai hawi, khumi kachengchi i pany hai nai rai nairachi ai py, pany pajau ai nai sabawm pi pajau nai ne.

⁷ARENG ai jei kaji naimy tahm khai nai ka-dawn ly tau cheng naira i pakeung sangum ne. Khumi hawi y naichi ly cheng naira ai tahm khai u y; amtiu ai nai py ngai u y.

⁸Deang awi, nang i ngamhm ngampo my thui nai leu ai dawn ryhpatyh naimy tangai ba.

⁹Apu parai nai lupeu hawi kaneaung akhen ly nang i mo-cha ai khen apu hai nai kamta, nang i ngamhm ngampo my ang thui ang parip naichi py, nang i kaja hawi tleaung y hawira ai.

¹⁰Deang awi, kamngo sa naichi ly nang ai parawi nai khala, paleung apei moh.

¹¹Nichi ly “Jeu ly achi khumi padei ai nai hau u sina! kamngo by y nai khumichi teng i, atyhtyh naimy lawm u sina!

¹²Vai, nichi ly no-na by y naimy heng u teu i py, nichi ai achi my padei vui nai khala ly tavau saleaung y tym u ai!

¹³Achi ly vang kateng yhmtheaung katui amjy cheaungkhangchi nga u ai; achi i yhm theung y lawmra i nga nai vawnsaichi hawi kawi hai u sina!

¹⁴Nang ly jeu iy, kaichi theung y abawi ba; kaichi my nga nai vawnsaichi kangngeng riri phy pi ai,” napi.

¹⁵Deang awi, nang ly huna nai khumichi hawi vanrei abang moh; nichi i tako nai lam ly en vui.

¹⁶Nichi ly hawi y nairachi sa ai nai panga y; nichi ly khumi padei ai nai avawrei angvei u rym nai ne.

¹⁷Nang i patiu ai ngai nai tavo i mei ka-niu y deaung pateung pi nai ly atyhtyh teu.

¹⁸Na i py nichi ly mychi i deaung y my man iy, dei u ai.

¹⁹Atiu alawm nai ly atiu alawm nai khumi ai dei hai jojo reng. Hini ly hawi y sa naira y heng nai khumichi i avum reng nai khym taham ne.

²⁰Tangai cham! cheng naira my ly lamchira py, seng meingtymchira py palau nai ne.

²¹Ni ly mary apai pa-khochira py, khumi akachu nai meingtymchi ra py, tao pajeng parai naimy palau nai ly

²²“Khumi ka-khumchi awi!, nangchi ly mana tanrei akhum naimy awm ai nai ngai u nai mo? Nangchi ly cheng naira ai mana tanrei mei aniu y nai sa iy, amo theu u ai mo? Nangchi ly mana khala py, ka-dawn pany u vau nai by y na mo?

²³Kaimy nangchi ai kang parip nai khala, tangai u; kai ly nangchi ai tau kahawi kang pei iy, kai i cheng naira py kang paji pi ai.

²⁴Kai ly nangchi ai aeu naimy kang palau teu i py, nangchi ly tangai ai nai ngai u y; kai i leu py tahm pateng u y bo.

²⁵Nangchi ly kai i tau kang pei nai bawibawichi py dawndan y i, kai i kang parip naichi py, nangchi ly ngai u y lawh.

²⁶Hunai deaungkho y nangchi ka-jeira avum nai khala, kai ly panui ai; nangchi jei hyn naira avum nai khala patang u ai i,

²⁷nangchi paleung ka-dawn phra u nai khala, kang panui hai ai.

²⁸Huna nai khala nangchi ly kai ai palau u ai. Na i py kai ly kang pathang pi ai ny y. Nangchi ly kai ai meingtym tleirei y, hau teu i py niu ai ny y.

²⁹Nangchi ly tau cheng naira ai mana khala py, ngai nai paleung by y; ARENG i leu ai mana khala py tangai u vai y.

³⁰Nangchi ly kai i tau pei nai ai mana khala py aly ngai u y; kai i parip nai py tahm khai u y.

³¹Hunai deaungkho y nangchi ly nangmychi i hawi y sa nai lai amtym u ai; nangchi i sa nai leaungsaichi my, nangchi ai no hai au ai.

³²Pany nai sai angym y nai khumichi ly cheng naira ai khai u su nai deaungkho y dei u ai. Khumi hawi y naichi ly ati sai py dawndan y naimy heng u rumrang nai y tama u nai ne.

³³Na i py kai i leu tangai nai khumi ly chymme naimy awm ai nai nga ai. Ni ly jei hyn naira by y naimy, tlamsa nai awm ai,” nanai ne.