Read Khumi Chin LEU KACHENG 11 Bible Online

LEU KACHENG 11 - Khumi Chin bible

LEU KACHENG 11

¹ARENG ly teng y nai sie teaung nai khumichi ai niu ngai y; sie kateng teaung nai khumichi ai kawn nai ne.

²Amlyh am-e nai khumichi ly kra y naimy tahm anem u ai; paleung apanem nai khumichi ly cheng nai khumichi ne.

³Khumi kahawichi ly kateng sa u reng; ka-ym by y nai khumichi ly mychi i hawi y nai molam y, phra naira avum u reng nai ne.

⁴Dei naira avum nai kani y yhmtheaung katui my ly nang ai aso hai y leang; na i py neaung hawi naira my ly nang i tlang ai atleu pajau.

⁵Neaung hawi nai deaungkho y, khumi kahawi i deung ly tlamsa reng; na i py khumi hawi y nai ly my i hawi y nai molam y atlym reng.

⁶Leu meitang teaung nai ly neaung hawi nai khumi ai ka-jeira i nai atleu nai ne. Ka-ym by y nai khumi ly my i ngai phi ala nai deaung y man reng.

⁷Khumi hawi y nai dei nai khala, my i athang khai naira ly my hawi vanrei tama veng bo. Yhmtheaung katui ai paleung apado nai ly ati sai py ny y naira y tym hai bo.

⁸Khumi meitangchi ly patang naira avum y ai; khumi hawi y naichi ly patang naira avum u nai ne.

⁹Tameuh by y nai khumichi i leu ly khumichi ai phra hai reng; na i py khumi kahawichi i cheng nai ly khumichi ai deira i nai atleu pajau.

¹⁰Neaung hawi nai khumichi nang chawn nai khala, mary i khumichi ly amo theu u. Khumi hawi y naichi dei nai khala ly amo theu achaw u lengleang nai ne.

¹¹Khumi meitangchi my amtheaung naira pei nai deaungkho y, mary ly nang chawn bo. khumi hawi y naichi i leu ly mary phra hai nai ne.

¹²Amichi ai panui pachem hai nai ly ka-khum ne; tau cheng nai khumi ly awm pypy ai.

¹³Khumi ai tapheaung ryry nai teng y ly kangviu y arum nai leuchi pany hai ai nai avo y; ka-ym awm nai khumichi ai ly ym pajau nai ne.

¹⁴Lam patei nai keung by y nai pri ly tama ai; tau pei pajau nai khumi neangneang awm nai pri ly chymme naira nga nai ne.

¹⁵Apany vai y nai khumi i kalum kalai pe ai nai kham pi nai khumi ly paleung bi naira avum ai; nang ly hunira y abawi y baly hawi keh nai ne.

¹⁶Pahen naira awm nai neampachy ai ly amichi my tahm khai reng. Na i py neampachy kamleaung ly kangji nga reng nai ne. Khumi napjangchi ly mana khala py, tangka ko ai ny y; na i py angjeng nai khumi ly nang ai.

¹⁷Khumi takhra ai pahen reng nai khumi ly amymy ai kahawi sa nai khumi ne; pahyp y naimy ana nai khumi ly amymy ai no patang hai nai khumi ne.

¹⁸Khumi hawi y naichi ly meitang khyp, ati sai py hawi naira avum ai ny y; na i py kateng sa reng nai khumichi ly meitang khyp, kawn vang nga u ai.

¹⁹Kateng sa nai khumi ly hengra nga ai; na i py kateng so y nai khumi ly tlang tem ai.

²⁰ARENG ly ka-kawi paleung awm nai khumi ai niu ngai y; na i py kateng sa nai khumi ai ly tamen nai ne.

²¹Tau hawi y nai khumichi ly pajeng naira avum ai; na i py khumi kahawichi ly meitang khyp, pajeng naira avum y ai.

²²Nithun mo dawn pany thai y nai neampachy i mo-cha hawi nai sai ly eu i notareu y tai nai muku kano hawi atawm.

²³Khumi kahawichi ly hawi nairachi naini, kadeaung nai kamta nga u bo. Khumi hawi y naichi ly mychi i kangai nga angym nai khala, khumi luteng my kado theu hai nai ne.

²⁴Phyrei khumichi ly mymychi i tangka paawp y naimy pei talam u i py, nang tleaung nangra bo; phyrei khumichi ly mychi i tangka kry ryhpatyh teu i py, mawn tleaung mawnra nai ne.

²⁵Paawp y naimy pei talam reng nai khumi ly nang chawn ai; ami ai sabawm reng nai khumi ly kasabawmra avum teang ai.

²⁶Khumichi ly vang kalen ajeng iy, choh pateung achu naichi ai pasawi u reng; pri-chi hawi jo pi nai khumichi ai ly palo u reng nai ne.

²⁷Khumichi ly hawi naira athang khai nai khumi ai tahm khai u ai; patang naira kadeaung nai khumi ly patang naira naini avum ai.

²⁸Amy i yhmtheaung katui ai paleung pado nai khumi ly Chaboleh nai khala vui nai dengkeaung ngamchi kamta, phra ai; na i py khumi kahawichi ly kanipui khala, sai angpho nai dengkeaung ngamchi kamta nang chawn ai.

²⁹Amy i yhm dengtheungchi ai patang naira tym hai nai khumi ly kangkhym y mymy i awm nai yhmtheaung katuichi khei kang ai. Khumi ka-khumchi ly khumi kachengchi teng y miseaung achei u jojo ai.

³⁰Meitang naira my ly heng naira pei reng; na i py khrukhra nairachi my ly dei hai reng nai ne.

³¹Khumi kahawichi ly khaileaung pri y hawi naira amtym u ai; huna nai kamta teang, kamngo sa nai khumichi ly meitang khyp, pajeng naira avum u ai.