Read Khumi Chin LEU KACHENG 12 Bible Online

LEU KACHENG 12 - Khumi Chin bible

LEU KACHENG 12

¹Tau cheng naira ai khrei nai khumi ngiereichi ly thui parip nai ai ngai nai ne; thui parip nai ai ngai y nai ly khumi ka-khum ne.

²ARENG ly khumi kahawichi ai khrei; na i py hawi y naira ai dawn tau nai khumichi ai ly pajeng nai ne.

³Hawi y naira ly khaw parai pa-rei angdo pajau y; na i py khumi kahawichi ly khaw parai naimy angdo u pajau nai ne.

⁴Aju kahawi ly my i juvo i vui, tahm asang naira hawi amo theu naira ne; na i py juvo ai kangji pei reng nai aju ly juvo i hiura y man nai roka hawi atawm.

⁵Neaung hawi nai khumichi ly adyh adawi naira sa u ai; khumi hawi y naichi ly li-tapawp ai naini ngai u nai ne.

⁶Khumi hawi y naichi i leu ly khumi takhrachi ai rai naira avum hai reng; na i py khumi kahawichi i leu ly ka-jeira avum naichi ai lawi hai reng.

⁷Khumi hawi y naichi dei u nai khala, cheng theaung tama reng; na i py khumi kahawichi i cheng theaung ly tamo y naimy khaw jo reng.

⁸Ami tleaungtha cheng nai khumi ai ly khumi takhrachi my palo ai; tau cheng naira by y nai khumichi ai ly ami my py khen nau ai.

⁹Cha nei ai by y naimy khumi kalen amlawn nai tleaung y ly amy i kajeu ka-rei vui y kalop sa nai khumi ly hawi keh alam.

¹⁰Khumi kahawi ly my i tawnbawichi ai, hawihai palai kry reng; na i py khumi hawi y nai ly my i tawnbawichi ai pahyp y naimy ana reng nai ne.

¹¹Angjeng atyp parai nai hlau sa nai khumi ly choh bai palo neangneang nga; na i py khumi hawi y nai ly ati sai py ny y nai kalopchira y neng pasum reng.

¹²Khumi hawi y naichi ly hawi y nairachi sa ai nai hau u khyh; na i py neaung hawi nai khumichi ly khaw parai naimy angdo u pajau nai ne.

¹³Khumi hawi y nai ly my i leu kamnai y athei reng; na i py khumi kahawichi ly mymy naimy patangra i nai lawi hai pajau.

¹⁴Khumi ly mymy i sa nai, katheu naichi molam y kawn vang nga; amy i sa nai molam y, hawi nai hawi y nai amtym ai.

¹⁵Khumi hawi y naichi ly mymychi i sa nai sai ai kateng palawn u jojo reng; khumi kachengchi ly ami my tau pei naichi ai tangai u reng nai ne.

¹⁶Khumi ka-khum ly paleung khrukhra naira tym nai khala, vaimy kado theu praw ryp reng; khumi kachengchi ly ami my mei aniu y nai sa nai ai, dawndan pi y nai ne.

¹⁷Leu kateng katheu reng nai pany hai nai keung ly leu meitang naimy tara chih nai sai ai amlum hai reng. Na i py ka-chawi katheu reng nai pany hai nai keung ly leu meitang teaung y nai, tara chih nai sai ai amlum hai reng nai ne.

¹⁸Adawn chumchi y naimy katheu nai leu ly haisau kamta tamo aneng hai pajau; na i py khumi kacheng i katheu nai leu ly tamo kalemchi ai hawi hai pajau nai ne.

¹⁹Ka-chawi leu ly deung dawi; na i py ka-ym awm nai leu ly deung sau nai ne.

²⁰Hawi y nairachi ai dawn pasym reng nai khumichi ly amymychi ai atapawp nai khumichi ne. Mipuichi i vui kahawi sa nai khumichi ly amo theu naira nga u reng.

²¹Khumi kahawichi ly mani mo taham kasi py avum ai ny y; na i py khumi hawi y naichi ly patang naira naini avum reng nai ne.

²²ARENG ly leu meitang teaung y naichi ai niu ngai y; na i py leu meitang teaung nai khumichi ai ly khrei nai ne.

²³Tau cheng nai khumichi ly mymychi i tau cheng nai sai ai amthang hai leaung y; na i py tau cheng y nai khumichi ly mymychi i tau cheng y nai sai ai, amthang hai leaung nai ne.

²⁴Angjeng atyp nai khumi ly sa thai naira nga ai; khumi napjang ly amichi teng y miseaung achei ai.

²⁵Paleungbi naira ly khumi ai paleung si hai pajau; na i py pahen nai leu ly khumi i paleung amo theu hai ai.

²⁶Khumi kahawi ly mymy i ahawi ka-dawi ai lam patei pi reng; na i py khumi hawi y nai ly ahawi ka-dawi ai lam tamang hai reng nai ne.

²⁷Khumi napjang ly mana khala py, aly ngai nairachi nga angym ai ny y; angjeng atyp nai khumi ly yhmtheaung katui nang chawn ai.

²⁸Leu meitang teaung nai ly tlang heng naira lam y tym pajau; khumi hawi y nai ly dei naira lam y tym pajau nai ne.