Read Khumi Chin LEU KACHENG 15 Bible Online

LEU KACHENG 15 - Khumi Chin bible

LEU KACHENG 15

¹Naujyp chy nai leu ly kado theu nai ai rym hai reng; na i py leu raawi len nai ly kado theu ai nai kachyh reng nai ne.

²Cheng nai khumichi i leu ly pany thai nai cheng nai kamlau katheu reng; na i py khumi ka-khum i labeaung ly ka-ym by y nai leuchi katheu reng nai ne.

³ARENG ly meingtym tleirei i sa nai saichi ai niu. Mymy ly khumi hawi nai, hawi y naichi i amhi amtlau naichi ai khen nai ne.

⁴Pahen nai leu ly hengra palum pi; na i py apahyp y nai leu ly paleung ka-dawn phra hai reng nai ne.

⁵Ampo i thui parip nai ai dawndan y nai khumi ly ka-khumcho ne. Ni i thui parip nai leu tangai nai khumi ly cheng nai khumi ne.

⁶Khumi kahawichi i yhm y ly yhmtheaung katui neangneang awm; na i py khumi hawi y naichi i ko nai paisa tangka ly rai naira avum hai reng.

⁷Tau cheng naira ai ahei hai nai khumichi ly khumi ka-khumchi ny y i, khumi kachengchi ne.

⁸ARENG ly khumi kahawichi i chiu sa nai ai kawn pi; na i py khumi hawi y naichi i, apathyp nai tawnbawichi ai ly paso nai ne.

⁹ARENG ly khumi hawi y naichi i reita lam ai ly paso; na i py leu meitang teaung nai khumichi ai ly khrei nai ne.

¹⁰Hawi y sa nai khumi ly khri pa-rei pajeng naira avum ai; thui parip nai tangai y nai khumi ly dei areu ai.

¹¹Tavau pri y tym nai leaungsaichi malawn py, ARENG i mo y tamym pajau y baly, khumichi ly mychi i paleung ka-dawnchi ai, Tameuh teng i dengdairei mana heu vui thai ai mo?

¹²Paleung len nai khumichi ly thui parip nai ngai vai y; amy tleaung y cheng nai khumichi teng i katauchi mana khala py hnei u vai y.

¹³Khumichi ly amo theu nai khala, panuiyhm reng; na i py paleung si nai khala ly meimai takhuisui reng.

¹⁴Cheng naira awm nai khumichi ly amtiu ai nai ngai u reng; na i py khumi hawi y naichi ly cheng naira by y nai hawimy, paleung tienem iy awm u reng.

¹⁵Khumi kamawnchi i heng nai ly atho sa jojo ai nai tla; na i py amo theu nai paleung awm nai khumichi i heng nai ly heng hawi jojo nai ne.

¹⁶ARENG ai jei kaji iy khumi kamawn lawm nai ly patang naira avum iy nang chawn nai tleaung y hawi keh.

¹⁷Amy tengtawi atamen leungtang naichi hawi vanrei, antheng seaungngam tlenrei cha nai ly amy tengtawi aniu ngai y naichi hawi vanrei, mawi biu kahawi cha nai tleaung y hawi keh.

¹⁸Paleung dawi nai ly leu ka-eichi lawm hai reng; na i py paleung sau nai ly aly naira lawm hai reng nai ne.

¹⁹Khumi napjang i tako nai lam ly aleng keungchi prau mang reng; na i py khumi kahawi i tako nai lam ly tawphrai nai lam manglai pui ne.

²⁰Cheng nai chanau ly ampo ai amo theu hai reng; chanau ka-khum naini, amhm ai mei aniu y nai sa reng.

²¹Khumi hawi y naichi ly mychi i akhum naira y amo theu u reng; na i py khumi kachengchi ly kateng sa u reng nai ne.

²²Tau pei kawp nai khumi nawi baly, katau eaung nai nga reng; arum apang nai by y baly, katau phra nai ne.

²³Neng-tu kahawi amlau nai leu katheu kawp baly, khri pa-rei amo theu ai nai hawi parai na a!

²⁴Khumi kachengchi ly salo mang y chei nai, hengra lam y tako u reng; khaileaung anui tavau pri lam y ly tako u vai y leang.

²⁵ARENG ly paleung len nai khumichi i yhmchi taphra pi pawn ai; na i py neampachy lumai i yhm hlau ly kry pi ai.

²⁶ARENG ly hawi y nai ka-dawnchi ai niu ngai y; na i py leu kamrawichi ai ly kawn nai ne.

²⁷Tau hawi y nai leaungsai hawi, kamran nga ai nai atho sa nai ly my i yhm dengtheungchi ai patangra tym hai ai; un langseaung lo y nai khumi ly heng sau ai.

²⁸Khumi kahawi ly leu pathang y rai khala, dawn pasym reng; khumi hawi y naichi ly pathang praw ryp; na i py patang naira tym hai reng nai ne.

²⁹ARENG ly khumi kahawichi i chiu sa nai tangai pi; na i py khumi hawi y naichi i chiu sa nai ai ly dawndan pi y nai ne.

³⁰Panuiyhm nai meimai ly amo theu hai reng; hawi nai satang ly hiu aleng ai amo theu hai reng.

³¹Thui parip nai ai tahm khai reng nai khumi ly cheng naira awm nai khumi ne.

³²Patiu pi nai ai tangai y nai khumi ly amy ai sum hai nai khumi ne. Thui parip nai ai tangai reng nai khumi ly cheng tleaung chengra ai.

³³ARENG ai jei kaji naimy tahm khai nai ly cheng naira amtiu nai ne. Tahm asang ai nai ngai nai khumi ly paleung apanem ai nai tla.