Read Khumi Chin LEU KACHENG 16 Bible Online

LEU KACHENG 16 - Khumi Chin bible

LEU KACHENG 16

¹Khumi ly amy i paleung y dawn tau naichi sa pajau; na i py kangkhym y ly Tameuh i kangai naini lawm ai nai tla.

²Khumi ly amy i sa nai ngiereichi ly teng, nanai dawn reng; na i py ARENG ly khumi i patyp naichi ai chih pi nai ne.

³Nang i dawn tau naichi amtheaung hai ai nai, ARENG teng y hnei. Naibaly nang i dawn tau naichi ly eaung ai mang.

⁴ARENG i sa nai ati cheaungkhangchi i vui ly paran yb nai awm. Khumi hawi y naichi i vui malawn py, patang naira avum hai ai nai paran yb nai awm.

⁵ARENG ly paleung len nai khumi ngiereichi ai ly niu ngai y. Nichi ly mana khala py, kamngo pajeng naira i nai lawi hai ai ny y.

⁶Ka-ymra leu meitang ai tahm khai nai khumi ly kamngo pahenra nga ai. ARENG ai jei kaji nai khumi ly hawi y nai ai en vui reng nai ne.

⁷ARENG my kawn hai ai nai asa nai khumi ly my i paleung ka-e ai malawn py, ahawi ka-dawi lawm hai pajau ai.

⁸Kateng lam hawi paisa tangka maidenreichy hau nga nai ly tau hawi y nai leaungsai hawi tangka neangneang nga nai tleaung y hawi keh.

⁹Khumi ly amy i chei ai nai lam pasym yb teu i py, ni i kheulangchi ai, ARENGmy sa pi yb nai ne.

¹⁰Samrang ly salo mang i sa thai naira hawimy leu pei nai ne i, ni i sa naichi ly teng jojo.

¹¹ARENG ly takhu teaung, si khyry katengchi ai py, ka-jo ka-van sa naira y pajyh patleh y nai ai py khrei nai ne.

¹²Samrangchi ly hawi y sa nai ai niu ngai y; ati mana nai mo nabaly adyh adawi khala naini, peang nai sai khaw ai nai ne.

¹³Samrang ly ka-ym leu katheu nai, thai ai nai ngai. Ka-ym leu katheu nai khumichi ai meimai pei nai ne.

¹⁴Samrang i kado theu nai ly dei hai pajau nai deaungkho y, khumi kacheng ly samrang i kado theu nai rym ai nai atho sa reng nai ne.

¹⁵Samrang i mo y meimai nga nai ly tlang heng ai. Pahen naira ly kanipui khala kani nai hai nai khupanymchi kamta ne.

¹⁶Pany thai naira hawi cheng naira nga nai ly muku hawi tangka ko nai tleaung y hawi keh.

¹⁷Khumi kahawichi ly hawi y naira lam mang y tako vai y; na i py amy i tako ai nai lam dawn ryhpatyh nai khumi ly mymy tlang ai akry nai ne.

¹⁸Amlyh am-e parai nai ly phra naira mang py, paleung len naira ly atlym naira mang py, pahawi nai ne.

¹⁹Paleung apanem nai hawi kamawn lawm nai ly paleung len nai khumichi hawi amkawm iy, lawmra i vawnsai phy nga nai khumi leaungrei tleaung y hawi keh.

²⁰Thui parip nai ai tahm khai reng nai khumi ly eaung naira nga ai. ARENG ai ym nai khumi ly taham hawi ai.

²¹Tau cheng naira angym nai khumi ly cheng naira awm nai khumi, nanai amthang reng. Ni ly leu tui nai hawimy ami i paleung ai parawi pajau nai ne.

²²Tau cheng naira ly khumi kacheng i vui y, hengra tuino ne; na i py khumi hawi y nai ai thui parip nai ly neng pasum atyhtyh nai ne.

²³Tau cheng naira awm nai khumichi ly leu katheu y rai khala dawn pasym thai. Hunai deaungkho y katheu nai leu ly khumichi i paleung ai parawi pajau nai ne.

²⁴Pahen reng nai khumichi i leu ly khawi hang kamta tui iy tlumtlang ai noso aho hai reng nai ne.

²⁵Teng khyp bo, nanai nang i athang khai nai lam ly dei lam ne tang ne lym ai.

²⁶Kalop sa keung ly cha tarau hawi nai ne. Ati mana nai mo nabaly kajeu kawi pa-rei cha pajau ai nai, kalopra y atho pathau nai deaungkho y ne.

²⁷Khumi hawi y naichi ly khumi takhrachi ai, patang hai ai nai lam hau u reng. Nichi i katheu nai leuchi malawn py, kang hai nai mai kamta ne.

²⁸Khumi hawi y naichi ly ka-cheh leuchi ahei hai reng. Nichi ly ka-jo ka-thui kachyh iy, ado y ai nai sa u reng nai ne.

²⁹Khrukhra hai reng nai khumichi ly mychi i ahawi ka-dawichi ai li-tapawp hyp iy, ka-jeira tym hai reng.

³⁰Nang ai mei meang hai iy, ho amteng na pa-rei panuiyhm hai nai khumi ly hawi y naira dawn khyh nai ne.

³¹Heng sau nai ly khumi kahawichi i, nga reng nai kawn vang ne. Sam pau nai ly tahm awm nai areng lukhym ne.

³²Neaung kham pajau nai khumi ly sa thai naira awm nai khumi tleaung y hawi keh. Amy i paleung ai peang ajau nai khumi ly mary puichi ai peang nai khumi tleaung y hawi keh nai ne.

³³Khumichi ly Tameuh i kangai pany pajau ai nai tambe va iy, khen u reng. na i py pathang pi pajau nai keung ly Tameuh ne.