Read Khumi Chin LEU KACHENG 17 Bible Online

LEU KACHENG 17 - Khumi Chin bible

LEU KACHENG 17

¹Tako kajei cha iy paleung savairu naimy awm nai ly ajo athui nai yhm i cha nei pawi puira y, abawi nai tleaung y hawi keh.

²Lulip pany thai nai miseaung ly my i yhmkeung i tahm by y nai chapo ai, leu pei pajau; yhmtheaung phyrei ai py amtym pajau nai ne.

³Muku hawi tangka ai mai hawi cham; khumi i paleung ai ly ARENG my cham nai ne.

⁴Khumi hawi y naichi ly hawi y nai leu tangai u reng. Tapawp reng nai khumichi ly ka-chawi leu tangai u reng nai ne.

⁵Khumi kamawnchi ai panui pachem hai nai khumi ly nichi ai sa nai keung Tameuh ai thui tamawn nai ne. Amichi i khym taham kasi avum nai khala, amo theu reng nai khumi ly kamngo pajeng naira avum ai.

⁶Cho chanauchi ly ampo i molam y amlyh u reng nai kamta, amsi pajochi py katu chanauchi i molam y amlyh u reng teang.

⁷Tahm awm nai khumichi ly ka-chawi leu thui vai y. Khumi ka-khumchi ly leu kahawi katheu vai y leang.

⁸Un langseaung ly mei amhyp patei pi nai kamta, eaung naira pei reng, nanai khumi phyreichi athang khai u. Un langseaung ly ati mora py sa hai pajau, nanai ym u nai ne.

⁹Amichi i kamngo pahen pi nai khumi ly aly ai ngai nai khumi ne. Kamngo tapheaung nai ly ka-lyra phra hai pajau.

¹⁰Tau cheng naira awm nai khumi i, thui parip nai tleirei avum nai ly khumi ka-khum i tlen chungvairei pakhau naira avum nai tleaung y, amtiura nga nai ne.

¹¹Dei areng ly pahyp y naimy ana reng nai savai kamta, ajo athui ai nai avawrei kachyh reng nai khumi hawi y naichi teng y tym ai.

¹²Chochi tama nai tavymnu hawi avum nai ly hawi y nai kalop sa nai khumi ka-khum hawi avum nai tleaung y hawi keh.

¹³Hawi naira ai hawi y naira hawi, patlai teang reng nai khumi i yhm ly hawi naira awm ai ny y.

¹⁴Leu ka-ei i kamteaung ly tui kathang leaung fau angchei nai hawi atawm nai deaungkho y, huni ai anawn ai nabaly anawn hai ba.

¹⁵Kamngo by y nai khumichi ai pajeng nai ai py, khumi hawi y naichi ai pajeng y naimy lawi hai vui nai ai py, ARENG ly niu ngai y nai ne.

¹⁶Khumi ka-khum ly cheng naira by y nai deaungkho y, pasa tangka hawi cheng naira hau thai y leang.

¹⁷Ahawi ka-dawichi ly avawrei atamen u reng nai ne. Patang naira avum nai khala, asabawm leungtang vai y nai amjo amnauchi ly ati hawira awm ai mo?

¹⁸Tau cheng naira by y nai khumi naini ami i vui, kalum kalaichi kham pi ai nai adeu reng.

¹⁹Kamngo ai khrei nai khumi ly ka-jo ka-thui ngai nai ne. Avawrei leu ali len nai khumi ly patang naira hau nai khumi ne.

²⁰Hawi y nai ai adawn pasym reng nai khumi ly hawi naira ati sai py athang khai pajau y. Patang naira naini athang khai pajau.

²¹Hawi y naira sa reng nai khumi i ampo ly paleung bi paleung mawnra naini avum reng nai ne.

²²Paleung amo theu nai ly noso aho hai reng. Avawrei meimai takhuisui nai ly deira y ang vum hai dudu nai ne.

²³Sa nai sai teng y nai ai tara chih nai keungchi ly kangviu y pei nai un langseaungchi talam u reng. Hunai deaungkho y, kateng lam tara chih pi thai y.

²⁴Tau cheng naira awm nai khumi ly cheng naira ai mo patheung reng; na i py khumi ka-khum i mei ly meingtym tleirei y khen aki prei reng nai ne.

²⁵Akhum nai cho chanau ly ampo ai paleung bi hai reng; amhm ai py paleung si hai reng nai ne.

²⁶Kamngo by y nai khumi ai tangka peh hai nai ly tara lam ny y. Khumi kahawichi ai pajeng nai ly tara lam ai athli hai puipa nai ne.

²⁷Pany naira kawi angym nai khumi ly leu peung ryry vai y. Awm pypy reng nai khumi ly pany thai praw nai khumi ne.

²⁸Labeaung amkyn iy awm pypy reng nai khumi ka-khum ai malawn py, tau awm nai khumi hawi cheng nai khumi, nanai athang khai pajau nai ne.