Read Khumi Chin LEU KACHENG 18 Bible Online

LEU KACHENG 18 - Khumi Chin bible

LEU KACHENG 18

¹Khumi takhrachi hawi ka-ly awm thai y nai khumichi ly amychi hawi ai naini paleung apei reng nai khumichi ne. Nichi ly khumi luteng my teng, nanai ai kawn u y.

²Khumi ka-khum ly saisairei ra y, my i pany nai pany y nai ai dawndan y leang. Mymy mana tanrei tau cheng mo, nanai ai naini pany hai khyh.

³Kamngo hawi kangji ly vanrei awm nai ne. Tahm by y nai khumi ly thui tamawn naira avum reng.

⁴Khumi i katheu nai leuchi ly cheng nai tui no lawm pajau i, pangli kamta thiu naimy tui leaung nai tavo micheaung kamta, tui pachyn pan nai ne.

⁵Tara chih naira y, kamngo awm nai khumi ai asa hai iy, kamngo by y nai khumi ai, tara pasum nai ly tamang nai ne.

⁶Leu ka-ei amteaung nai khumi ka-khum ly pakhau nai amteng ai ngai nai khumi ne.

⁷Khumi ka-khum i katheu nai leu ly amymy ai sum hai reng. Ni ly my i leu hawimy aman ryp nai ne.

⁸Ka-jo pakei nai leu ly tui parai nai teicha teinei kamta ne i, huni ai ly achi my pajawn ai nai ngai reng nai ne.

⁹Khumi napjang ly yhmtheaung pasum atyhtyh nai khumi hawi amjo amnau ne.

¹⁰ARENG ly khumi kahawichi i abyhra, khaw parai nai lengseaung yhm pui atawm. Hu y khumi kahawichi ly chymme naira nga ai nai chei u pajau nai ne.

¹¹Na i py nang chawn nai khumichi ly mymychi i yhmtheaung katuichi my, mychi ai khaw parai nai mary apai ka-sang kamta ang kry, nanai athang khai u reng nai ne.

¹²Paleung apanem nai khumi naini, khumi takhrachi my tahm khai. Paleung len nai khumichi ly phra nai mang y amhi u nai ne.

¹³Pathang y rai khala deng nai leu ai tem pa-rei tangai; hunai kamta so y baly akhum nai hawi khumi mei aniu y nai ne.

¹⁴No nai thym khala y, amy i paleung ai khaw hai pajau nai khumi ly kham pajau nai keung ne. Paleung kham pajau y nai khumi i vui ly athang khai naira by y leang bo.

¹⁵Lulip pany nai khumichi ly paleung apei parai naimy amtiu ai nai angveirym reng nai ne.

¹⁶Miteaung keh leaungrei hawi avum ai ngai nai khumi ly langseaung syn ai nai tla; hunaibaly rai y.

¹⁷Tara jeung y leu amti manme nai khumi i amti nai leu ly teng, nanai athang khai reng. Na i py tara preng my tlau teang nai khala ly tara lam ali vui reng nai ne.

¹⁸Sathai naira awm nai, tara sa nai khumi leaung nyhrei ne lawh baly, tara jeung y nini i tara ai tambe va iy, leu pacheang pi pajau nai ne.

¹⁹Nang i ahawi ka-dawi ai sabawm; naibaly ni ly khaw parai nai mary apai kamta, nang ai ama hai ai. Na i py nang ly ni ai ka-jo hau lawh baly, nang ai katheu akho hai vui ai.

²⁰Nang ly nangmy i leu katheu nai tamang baly, katamanglai nga ai.

²¹Nang i katheu nai leu ly heng hai ai nai, dei hai ai nai sa thai naira awm. Hunai deaungkho y nang ly nangmy i katheu nai leu kamta hawi nai hawi y nai avum ai.

²²Aju nga nai khumi ly taham hawi i, ARENG teng i amtheaungra nga ai.

²³Khumi kamawn ly tahm khai iy ahui nai leu katheu reng; na i py khumi kanang ly leusi leukho katheu reng nai ne.

²⁴Phyrei ahawi ka-dawichi ly kakra amkawm ai nai ngo y. Na i py phyrei ahawi ka-dawichi ly amjo amnau kypkyp tleaung y malawn py, khri pa-rei ka-ym awm nai ne.