Read Khumi Chin LEU KACHENG 20 Bible Online

LEU KACHENG 20 - Khumi Chin bible

LEU KACHENG 20

¹Mhm-rah nei ala nai khumi ly leu raawi len iy sa tamang reng; mhm-rah pavui tapai reng nai ly khumi ka-khum ne.

²Kado theu nai samrang ai ly hang hai nai khrangsi ai jei nai kamta jei hyn ba. Ni i kado theu ai nai kachyh reng nai khumi ly amymy ai apadei ai hau nai khumi ne.

³Khumi ka-khum ly ka-jo ka-thuira tym hai reng. Ka-jo ka-thui ngai nai khumi hawi abi y pa-rei awm thai nai khumi ly tahm awm nai khumi ne.

⁴Amy i li thawn ai nai neng tym iy, pjang nai y thawn y naimy awm nai lisama ly choh tyn ai nai neng khala, tyn ai nai choh awm ai ny y.

⁵Khumi i paleung y dawn pasym naichi ly tuikan kathiura i tui hawi atawm. Na i py tau awm nai khumi ly deu thai nai ne.

⁶Khumi luteng ly amymy ai ka-ym awm, nanai thui u teu i py, meitang khyp, ka-ym awm nai khumi ai hau i, avum thai y lawh ly!

⁷Neaung hawi nai ly kateng sa reng. Ni i katu chanauchi ly taham hawi.

⁸Samrang ly tara bailangra y ateh iy, hawi y nai ngiereichi ai chih i, pany thai nai ne.

⁹Khumi ami py, chai nai paleung awm, nanai py, amy teng y kamngo by y leang bo, nanai py, thui khyp pajau na a?

¹⁰ARENG ly takhu teaung, si khyry kateng teaung y nai khumichi ai ly niu ngai y nai ne.

¹¹Deaungdi malawn py, my i paleung ka-dawn ai, sa nai sai hawi patei nai ne. Ni teng y hawi naira awm a, by y a, nanai thui pajau.

¹²ARENG ly niu thai nai mei hawi tangai thai nai kanochi py sa pi nai ne.

¹³I naira y neng pasum atyhtyh reng nai khumi ly kamawn acheang ai. Kalopra y atho sa reng nai khumi ly kajeu kawi ai.

¹⁴Vawnsai van nai khumi ly vawn vang len parai, nanai avawrei thui nai ne. Na i py vawn van chum nai khala ly my i vawn van kawp nai sai ai amlyh hai reng.

¹⁵Cheng nai leu ly muku, ti y baly amia lengseaungchi tleaung y vang teng keh.

¹⁶Apany vai y nai khumi i kalum kalai molam y, kham pi nai khumi ka-khum ai ly my i yhmtheaungchi ai, ka-ymra khai hai ai nai avo nai ne.

¹⁷Teng y nai lam hawi nga nai yhmtheaung katui ly tui parai nai teicha teinei kamta khrei ai hawi parai teu i py, kra y nai sala y my aneaung cha nai atawm ai.

¹⁸Leu khulym, tau kahawi hnei kawp nai khumi ly eaung naira nga ai. Angveirym y pui naimy tavai thau moh.

¹⁹Ka-preaung leu katheu reng nai khumi ly amkyn ai avo nai leuchi mana khala py am-yh pajau y. Huna nai y khri pa-rei leu peung nai khumichi teng i nai asyn vui ba.

²⁰Amhm ampo ai pasawi nai khumi ly kaveng theung y jum nai maisi yhm kamta khumi i tlang tama ai.

²¹Angchei y rai y naimy nga nai yhmtheaung katui ly kangkhym y taham si ai.

²²Ka-jo vawitheung tha ai nai dawn moh; ARENG ai phai ym. Hunaibaly mymy ly nang ai atleu ai.

²³ARENG ly takhu teaung, si khyry kateng teaung y nai khumichi ai ly niu ngai y nai ne.

²⁴ARENG ly achi tako ai nai lam ang sa pi chum bo i, khumi ly my i heng nai lam ai, mana pany thai ai mo?

²⁵Tameuh teng y talam ai nai vaineng adeu y rai khala, hawihai palai adawn yb; ti y baly kangkhym y vaineng adeu veng nai molam y paleung si ai.

²⁶Cheng naira awm nai samrang ly tau hawi y nai khumi, nanai pany hai iy pahyp y naimy ana ai.

²⁷ARENG ly achi ai paleung hawi, jei hyn nai paleung pei nai deaungkho y, achi ly amychi i tlang, aheu vui thai y leang.

²⁸Samrang ly leu meitang teaung naimy peang nai ryrei ly ni i phum-ang haiho khaw jojo ai.

²⁹Deaungdichi i haiho ly kho-ban ne; miteaungchi i tahm awm nai ly sam kapau ne.

³⁰Achi ly paleung no-ei pa-rei avum khala naini, achi i awm nai sai amtlau ali reng nai ne.