Read Khumi Chin LEU KACHENG 23 Bible Online

LEU KACHENG 23 - Khumi Chin bible

LEU KACHENG 23

¹Aly len nai miteaung keh leaungrei hawi ateh iy cha nei nai thym khala, huni khumi ly ami mo, nanai adawn patyp ba.

²Nang ly biu ha parai nai ne lawh baly, amymy ai amkyn ba.

³Nang ai sawn pi nai cha nei kahawichi ai paleung no moh. Huni khumi ly nang ai ang parawi hyp naimy, pacho panei nai ne lym ai.

⁴Nang chawn ai nai molam atho sa naira y, amymy ai akawm hai ala y ai nai cheng naira awm ba.

⁵Nang i paisa tangkachi ly pakhi sai iy, ahm i angkheang nai kamta, mei amsynrei sala y tama pajau nai ne.

⁶Nun-si nai khumi hawi vanrei, cho nei ahawi moh. Ni i sawn pi nai cha nei kahawi paleung no moh.

⁷Huni khumi my, “Cho nei kyh rai ba " ang napi ai. Na i py ni ly cha ai nai, ngai hai kalei nai ny y leang. Ni i paleung y awm nai sai tatang patei nai ne.

⁸Nang ly nangmy i cha nei chum nai teicha teinei paleu ali teang ai. Ni i tlang tleaung y nang i palo nai leuchi py, ati sai py ny y nai lawm ai.

⁹Khumi ka-khum i mo y leu katheu moh; ni ly nang i cheng nai leu ai tahm khai ai ny y.

¹⁰Mana khala py khaileaung khujyh kangngym ly kasyh vui moh. Nurochochi i khaileaung ly lo pi veng moh.

¹¹ARENG ly sa thai naira hawimy nichi ai ama hai ai i, mymy ly nang ai ka-awi sa iy, nichi mang y asa ai.

¹²Nang ai patiu nai sara i thui parip nai leu ai hawihai tangai iy, cheng naira ai ly ham parai naimy amtiu ba.

¹³Deaungdi ai parip ai nai ly patyh moh. Pakhau nai ryrei y ni ly dei pajau y leang.

¹⁴Meitang khyp thui ai nabaly, khyh pakhau naimy ly ni ai, dei areng kiu i nai atleu ai.

¹⁵Deang awi, nang ly cheng naira amtiu nai kawp baly, kai ly khri pa-rei amo theu ai.

¹⁶Nang i katheu nai cheng nai leuchi thai nai khala, kai ly tahm khai amlyh ai.

¹⁷Kamngo sa ala nai khumichi ai paleung no moh. Nangmy deungrei ARENG ai jei kaji ba.

¹⁸Huna nai sa baly nang i vui mo mang i deung ly hawi ai.

¹⁹Deang awi, tangai ba; cheng naira amtiu iy, nangmy i tako nai lam ai, hawihai palai adawn patyp ba.

²⁰Kreip hang nei ala nai khumichi, cha nei ha ala nai khumichi hawi amkawm moh.

²¹Mhm-rah nei ala nai khumichi hawi cha ha ala nai khumichi ly kamawn kateu lawm u ai. Nang ly cha nai hawi, i nai hawi awm khyh lawh teu baly, kra y nai sala y kanih kamawnchi akhiu naimy awm ai.

²²Ngampo i leu tangai ba; ngampo phai by y lawh teu i khyly, nang ly khumi amlawn y leang. Ngamhm miteaung cheang nai khala, ni i tlang tleaung y tahm khai nai sai amteng ba.

²³Ka-ym leu, cheng naira, thui parip nai leu, tau cheng naichi ai ly tangka hawi van iy amtiu ba. Hunichi ly vang teng parai nai ne i, paisa tangka hawi angtheung pajau y.

²⁴Khumi kahawi i ampo ly khri pa-rei amo theu ai nai leaungsai awm. Ni ly cheng nai chapo i vui y amlyh pajau.

²⁵Ngamhm ngampo ly nang i molam y amo theu amlyh sy; nang i amhm ly amo theu pajau na sy.

²⁶Deang awi, kai i leu dawn ryhpatyh iy tangai ba. Kai i heng nai kucha amtiu ba

²⁷Bimanuchi hawi neampachy kamleaungchi ly ka-jeira hawi parai nai deaung hawi atawm.

²⁸Nichi ly damrachi kamta, nang ai oh u reng nai ne. Neampacho neangneangchi ai, vaineng takan ai nai pa-rei sa u bo.

²⁹Mhm-rah nei ala iy mhm-rah kangtha pateang cham y baly awm pajau y nai khumi ly avawrei ka-jo ka-thui ngai nai khumi, avawrei tangam nai khumi, paleung si paleung phra reng nai khumi ne. Ni i mei ly pasen iy ati sai py ny y naimy, tamo nga reng nai ne.

³¹Kreip hang ly pasen jeaung naimy, angvang chei naimy, tuirym naimy awm teu i py, nei ai nai paleung ka-no awm moh.

³²Huni ai nei patyhm lawh baly, huni bo i khawn mang y ly pavui kangso my patiu nai kamta avum ai.

³³Nang ly jei hyn nai ka-ma-rachi ai paleung theung y niu huihai naimy, chai pyn pa-rei dawn pajau y, thui pachai thai ai ny y.

³⁴Nang ly pangli salo y tui sampyh my pachaw nai deaungkho y, anem vui, asang vui nai sampho alika kateang amkhaw naimy sampho pavui nai khumi hawi atawm.

³⁵Kai ly ang khyh ang pakhau, nanai athang khai teu i py, mana ang pakhau nai mo, nanai kai pany y. Kai ly ati mana nai y anglaw thai y lawh mo? Vai khaurei nei ai ngai bi rai,” nanai nang thui ai.