Read Khumi Chin LEU KACHENG 24 Bible Online

LEU KACHENG 24 - Khumi Chin bible

LEU KACHENG 24

¹Khumi hawi y naichi i kucha paleung no moh. Nichi hawi amkawm ai nai py atho so moh.

²Nichi ly ajo athui ai naini dawn u khyh. Khumi takhrachi i tlang tleaung y rai naira tym hai ai naini, avawrei katheu u reng nai ne.

³Yhm ai ly cheng naira hawi pany thai naira, napi nai langdeng salo y panui ai nai tla.

⁴Tau cheng naira saho y huni yhm takunchi ra y, vang teng iy apu parai naichi ka-pu sa nai ne.

⁵Khumi kacheng ly atho awm nai khumi tleaung y, sa thai naira awm. Cheng naira ly tlang i atho tleaung y py, aly len nai ne.

⁶Ati mana nai mo nabaly nang ly tavai thau y rai khala, hawihai palai adawn pasym iy, angveirym ai nai tla; tau pei nai khumi nawi baly eaung ai.

⁷Khumi kachengchi i katheu nai leuchi ly khumi hawi y naichi pany thai y leang. Nichi ly aly len nai leaungsaichi arum nai khala, labeaung pakhym u reng nai ne.

⁸Hawi y nairachi avawrei dawn pasym nai khumi ai ly patang naira pei nai khumi, nanai khumichi my palau u ai.

⁹Khumi ka-khum i dawn pasym nai bawibawi ly kamngo sa tamang reng. Amichi i tlang tleaung y mei aniu y nai sa nai khumi ai ly khumichi my niu ngai y nai ne.

¹⁰Aly len nai thym khala, atho di nai khumi ly atho di tatang nai khumi ne.

¹¹Teng y naimy dei ai tla nai khumi ai, atleu ai nai patyh moh.

¹²Hini kalop ly kai hawi ati sai py abi y leang, nanai nang thui ai. Na i py Tameuh ly nang i paleung ai pany i ang chih ai. Mymy ly nang ai ang kry nai deaungkho y, nang i paleung ai pany. Hunaibaly mymy ly nang i kabo kaja hawi nai, hawi y nai kamlau ang pei ai.

¹³Deang awi, khawi hang cho ba; huni ly hawi parai. Khawiphira i hang ly nang i palai ai tui hai nai kamta,

¹⁴cheng naira py nang i paleung y, amo theu hai pajau, nanai hawihai palai pany ba. Nang ly cheng naira nga baly, nang i mo mang i deung ly hawi ai.

¹⁵Nang ly khumi hawi y naichi kamta, khumi kahawichi i yhmtheaung katui lawm ai nai py, ni i yhm ai keng vui ai nai py dawn moh.

¹⁶Khumi kahawi ly avawrei atlym teu i py, ni ly ang thau ali teang jojo ai. Na i py khumi hawi y naichi ly ka-jeira avum nai khala atlym u ai.

¹⁷Nang i paleung ka-e ly ka-jeira avum nai khala, amo theu moh. Ni i pathuikhe iy atlym nai khala, amo theu paleung ateng hai moh.

¹⁸Nang amo theu lawh teu baly, ARENG my pany ai i, niu ngai y ai. Mymy ly huni khumi ai kamngo pajeng pi y naimy, awm pi vui lym ai.

¹⁹Khumi hawi y naichi i molam y paleung bi moh; nichi i kucha paleung no moh.

²⁰Khumi hawi y nai teng i nai ly hawi naira ati sai py, athang khai ai naira by y leang.

²¹Deang awi, ARENG ai py, samrang ai py, jei kaji naimy tahm khai ba. Huni ARENG hawi samrang ai tiu nai khumichi hawi amkawm moh.

²²Huna nai khumichi ly tlenrei khyhmy phra vui pajau nai ne. Tameuh, ti y baly samrang my, ati mana ka-jeira avum hai pajau ai mo, nanai ami pany pajau mo?

²³Khumi kachengchi ly hini parip nai leu hawi, thui parip nai ne. Meimai khen iy tara chih nai ly tamang nai ne.

²⁴Tara chih nai keung ly kamngo awm nai khumi ai, kamngo by y nai khumi ne, nanai leu pacheang lawh teu baly, khumi bawibawichi my, pasawi nai hawi niu ngai y naira avum ai.

²⁵Kamngo awm nai khumichi ai, kamngo pajeng pi nai tara chih keung ly amyn kahawi nga iy amo theu nai hawi amtheaung naira nga ai.

²⁶Khumi kahawi i leu pathang teang nai ly ahawi meitangchi i ka-ma-ra ne.

²⁷Nang ly nangmy sa ai nai khaileaung meingtym awm yb iy, apacho pajau ai nai a-ym khala naini yhm so ba.

²⁸Khaw nai leusai ha harei py by y pui naimy, khumi takhra i vui y pany hai nai leu thui moh; ti y baly ni i tlang tleaung y tamang hai ai nai pa-rei, pany hai nai leu thui moh.

²⁹“Kai ai nimy ang sa nai kamta, ni ai py kasa teang ai! Ni ai vawitheung katha teang ai!” nanai thui moh.

³⁰Kai ly khumi napjang hawi khumi hawi y nai i, li hawi kreip akho sahawi mang tako prei bo.

³¹Hunichira y achachi prau mang iy kabeng alengchi prau mang nai py niu; huni akho bai hawi, li kamki lengseaung apaichi ly anawi seaungkhrang na veng bo.

³²Kai ly hunichi ai khen patawm nai khala, amtiu naira kanga nai ne.

³³Huni amtiu naira ly taanach mangkha i-chi nai khumi, kiu atakawime iy kalop so y nai khumi ly

³⁴i nai thym khala ngari kamtang ly damra kamta, avaw nai ly tavaimi risa kamta, ni i tlang tleaung y tym hai ai.