Read Khumi Chin LEU KACHENG 25 Bible Online

LEU KACHENG 25 - Khumi Chin bible

LEU KACHENG 25

¹Juda samrang Hezekia i yhm y khumichi my cha tapeang nai, samrang Solomon i leu kachengchi ly hinichi ne.

²Tameuh i sa naichi ly thiu parai nai deaungkho y, mymy i nang parai nai ai kaichi palo u nai ne. Samrangchi ly huni thiu parai nairachi ai thui pachai ai nai deaungkho y, nichi ai kaichi my tahm pasang u nai ne.

³Samrang i paleung ly mana khala py, achi pany pajau y leang. Ni i dawn nai saichi ly kani i asang nai kamta, suida pangli i thiu parai nai kamta, achi pho pajau y leang.

⁴Tangka ai patlawn vui nai khala, tangka thip kawp nai keung ly apu parai nai ateaung ha harei sa thai nai ne.

⁵Hawi y nai tau pei nai khumi ai ly samrang teng i dengdairei patheu vui; hunaibaly samrang ly mipui i kangai peang ai.

⁶Nang ly samrang i mo y angdo nai khala, amymy ai amlyh am-e moh; aly len nai khumi amlawn moh.

⁷Amy tleaung y tahm asang nai khumi leaungrei ai, meingtym aheng pi ai nai leu ang pei nai tleaung y ly tahm asang keh nai meingtym y ateh ai nai leu ang pei nai ly hawi keh nai ne.

⁸Nang i mei hawi niu nai ryrei my, tara jeung y seu tamangtang moh. Takhra pany nai khumi leaungrei my, nang i tamang nai sai pany hai pi lawh baly, nang ly mana sa ai mo?

⁹Nang ly nangmy i yhm deaungpa hawi, aly akhang y nai awm lawh teu baly, nangmyni tengtawi aly teang ai nai ka-vo so ba. Pany hai ai nai avo y naichi ai, amichi teng y amti pi moh.

¹⁰Huna ny y baly khumi bawibawichi my, nang i labeaung amkyn y nai sai pany ai i, nangmy deungrei kangji nga ai.

¹¹Amlau parai nai leu katheu nai ly muku hawi ka-pu sa nai tangka ateaung hawi atawm nai ne.

¹²Lulip pany naira angym nai khumi i pany hai nai leu ly tangai ai ngai nai khumi i vui y muku kiusabyh tleaung y py, muku tangcheng hawi sa nai ateaungchi tleaung y py vang teng keh nai ne.

¹³Kani kabi asang nanai neng y choh tyn nai khala, tui savai kamchi ly khumi ai khesere hai nai kamta, ka-ym awm nai savai py, mymy ai pato nai keung i paleung ai khesere hai nai ne.

¹⁴Langseaung pei ai, nanai adeu iy adeu nai kamta so y nai khumichi ly kanitui abawi y nai khupanym hawi ali kamta ne.

¹⁵Paleung sau parai naimy thui pi rypsy nai leu ly paleung tang nai khumi ai paleung nau hai pajau. Samrangchi ai malawn py, pany hai pajau nai ne.

¹⁶Khawi hang ai ngai nai tleaung y cho nei ala moh. Cha nei ala nai khumi ly paleu reng.

¹⁷Nang i yhm deaungpachi teng y kie ala moh. Kie ala baly, ni ly nang ai ang palei ai i, ni my nang ai niu ngai y nai tym ai.

¹⁸Nang i yhm deaungpa i tlang tleaung y teng y naimy seu rumrang nai ly haisau, thengbeang, ti y baly thailiho meaung hawi atawm.

¹⁹Khri pa-rei aly aeang nai thym khala, ka-ym by y nai khumi teng y abyh nai ly ho lenghau nai hawi teicha teinei taai nai, ti y baly kheu tabai naimy lam tako nai atawm.

²⁰Paleung atho di nai khumi teng y khulym thui pi nai ly kaseih neng y amdeng parai nai khumi i ateaung ai leng pi vui nai, ti y baly tlang tamora y palawi phui nai hawi atawm.

²¹Nang i paleung ka-e kajeu alam baly pacho; tui ahai baly nei ai nai tui pei.

²²Hunaibaly ni ly kangji nga ai i, kangji paleung my ang kang nai avum ai. Naibaly ARENG ly nang ai kawn vang ang pei ai.

²³Tosyh ali my kanitui syn nai kamta, thui preaung nai ly kado theu naira tym hai reng nai ne.

²⁴Josei atyhtyh nai aju hawi vanrei, yhm y awm ahawi nai tleaung y ly yhm amphu salo y awm nai ly hawi keh nai ne.

²⁵Kamlo paraira i satang kahawi thai nai ly tui kanghai tao phuirawm nai thym khala, tui savai nei nai hawi atawm.

²⁶Khumi hawi y nai ai leunghawi patlo jo nai khumi kahawi ly chai y nai tui sampum, ti y baly dei asi khai nai tuikan hawi atawm.

²⁷Khri pa-rei palo naira nga ai nai atho sa nai khumi ly khawi hang ai nei cha ala nai kamta, hawi y parai nai ne.

²⁸Amy i kado theu nai ai am-yh pajau y nai khumi ly mary apai by y nai deaungkho y, daihaulau nai mary hawi atawm nai ne.