Read Khumi Chin LEU KACHENG 27 Bible Online

LEU KACHENG 27 - Khumi Chin bible

LEU KACHENG 27

¹Khawndam i vui mana khala py amlyh reng moh. Vaini hawi khawndam sala y mati na mo, nanai nang pany pajau y leang.

²Nang ly amymy ai apalo moh. Khumi takhra my, ti y baly apany vai y nai khumi my naini nang ai palo na sy.

³Lengseaung hawi spryh ly ji. Hawi y nai deaungkho y avum reng nai ngari kamtang ly hunichi tleaung y ji keh nai ne.

⁴Kado theu nai paleung ly ana patheng nai ka-dawn, taphra ai ngai nai paleung ka-dawn awm nai ne. Na i py paleung angai y nai ly hunichi tleaung y hawi y keh.

⁵Khumi takhra ai paleung hawi verei parip nai ly ni ai dawndan y, nanai athang khai nai tleaung y hawi keh.

⁶Ahawi ka-dawi my, amy ai no-ei pa-rei ang thui nai ly paleung kahawi hawi ang thui nai teu. Na i py paleung ka-e my ang takawi nai khala ly paleung khai takhra ba.

⁷Kajeu kawi nai khumi i vui ly khawi hang malawn py labeaung palai amlyn y. Na i py kajeu alam nai khumi i labeaung palai ly kho nai teicha teinei malawn py tuirym nai ne.

⁸Amy i yhm hawi palo nai khumi ly tabu hawi palo nai tavo hawi atawm.

⁹Rimiu hawi mui katuichi ly khumi i paleung ai amo theu hai. Na i py ngari kamtang ly paleung awmnemra ai phra hai vui nai ne.

¹⁰Nang ly nangmy i ahawichi ai py, ngampo i ahawichi ai py, tami moh. Nang ly patang naira avum nai thym khala, ngamjo ngamnau teng y kasabawmra hnei moh. Nang i yhm deaungpa my ly kamlo y awm nai ngamjo ngamnauchi tleaung y malawn py, ang sabawm pajau nai ne.

¹¹Deang awi, cheng naira hawimy, kai i paleung ai amo theu hai ba. Kai ai thui preaung nai khumi ai, kai ly pathang ali teang pajau ai.

¹²Tau cheng nai khumi ly ka-jeira avum ai nai pany yb i, asyn vui thai. Na i py tau cheng naira by y nai khumi ly ka-jeira hawi apadawi-ra naimy avum i, huni bo y uikheih naira nga nai ne.

¹³Apany vai y nai khumi i kalum kalai ai kham pi ai nai adeu nai khumi ka-khum ai ly my i yhmtheaungchi ka-ymra khai hai ai nai avo nai ne.

¹⁴Amy i ahawi kamrawi ai athorei my leu preng iy, khawn angthodyh i palaw reng nai khumi ly huni ahawi ai pasawi nai ne.

¹⁵Josei ham nai aju ly kani nai nai kani y leaungdau leaungdau nai kachie tui hawi atawm.

¹⁶Nang ly ali aho nai anawn hai ai nai, paka pajau na a? Asitui ai kiu padawi tleaung i nai, beu-py y pa-rei kasum thai na a? Hunai kamta huni neampachy ai awm pypy ai nai so thai y leang.

¹⁷Tamo ai ly tamo tengtawi chiu pa-rei kata nai kamta, khumichi py amy tengtawi cheng naira amtiu ai nai tla.

¹⁸Thaidu keung ai palum pachai nai khumi ly thaidu athai cha ai nai nga ai. Amy i yhmkeung ai kry ryhpatyh nai miseaung py, tahm pasang nai avum ai.

¹⁹Khumi ly tui theung y amy i meimai niu nai kamta, amy i paleung theung y py, amymy ai niu teang nai ne.

²⁰Tavau saleaung y ly mana khala py, khumi kadei kawi vai y nai kamta, khumi i ngai naichi py, mana khala py angym bo, nanai by y.

²¹Muku hawi tangka ai cheng, cheng y nanai ly mai hawi cham iy pany nai kamta, khumi leaungrei tahm awm, by y nanai py cham iy pany pajau.

²²Khumi ka-khum ai deivi pa-rei pakhau teu i py, ni i akhum nai ai ly khai su pa-rei pakhau pajau ai ny y.

²³Yhmtheaung katui ly akan y nai deaungkho y, nang i beram kanghuchi hawi, si kanghuchi ai kawp nai ryrei kry ba. Ati mana nai mo nabaly saleaung khutengchi malawn py, deungtasa khaw jo, nanai by y.

²⁵Nang ly choh keungchi hlau chum nai bo y, choh lumlichi ampho thym nai khala ly mawitleaung achachi ai py hlau ai nai tla.

²⁶Nang i beramchi teng i nga nai beram mui hawi, ateaung alangchi aneng pajau. Mi-i phyreichi ai jo iy khaileaung meingtymchi van pajau.

²⁷Jo kamthum mi-ichi teng i nai, nang hawi nang i yhm dengtheungchi i vui py, nang i miseaung neampachychi i vui py, mi-i kanu nga ai.