Read Khumi Chin LEU KACHENG 28 Bible Online

LEU KACHENG 28 - Khumi Chin bible

LEU KACHENG 28

¹Khumi hawi y nai ly mymy ai pareng nai khumi by y pui naimy angpreng reng. Na i py khumi kahawi ly khrangsi kamta vam parai nai ne.

²Kamngo sa reng nai pri ly samrang leaungrei bo leaungrei my peang naira avum ai. Na i py tau cheng naira angym nai miteaung kehchi i pri ly khaw typ ai.

³Khumi kamawnchi ai pahyp y naimy ana reng nai samrang ly amti amjangchi phra hai reng nai alipui khupui hawi atawm.

⁴Tara leu reita ai tahm khai y nai khumi ly khumi hawi y naichi mang y asa hai naichi ne. Na i py tara leu reita ai tahm khai nai khumi ly huni khumi ai tiu nai khumi ne.

⁵Khumi hawi y naichi ly adyh adawi naira i, awm nai sai pany u y. Na i py ARENG ai chiu nai khumichi ly huni ai pany thai nai ne.

⁶Kamawn kateu lawm iy khumi kahawi lawm nai ly nang chawn iy paleung ka-kawi awm nai tleaung y hawi keh nai ne.

⁷Reita leu pei nai tangai nai thawndeang ka-cheang ly cheng naira awm nai khumi ne. Ati sai py ny y nai khumichi hawi, ahawi kamrawi asa reng nai chapo ly amhm ampo ai tahm panem iy kangji pei nai ne.

⁸Tangka katy khri pa-rei cha iy, khumichi i tlang tleaung y kho sa naimy nang nai khumi i yhmtheaung katuichi ly khumi kamawnchi ai pahen pi reng nai khumi i kiu y tym vui ai.

⁹Reita leu pei naichi ai tangai y nai khumi i chiu sa nai ly Tameuh my paso ai.

¹⁰Khumi kahawi ai tapawp-hyp iy, hawi y naira sa hai reng nai khumi ly my i pateung nai deaung y, mymy naimy man ai. Kamngo by y nai khumi ly kawn vang nga ai.

¹¹Nang chawn nai khumi ly amymy ai khumi kacheng, nanai apalawn reng. Na i py cheng nai khumi kamawn ly huni khumi i satang pany keh nai ne.

¹²Khumi kahawichi sa thai naira nga nai khala, khumi bawibawichi ly amo theu nai pawi sa u. Na i py khumi hawi y naichi my peang nai khala, khumichi ly aheu pi pawn nai ne.

¹³Amy i kamngochi ai taphum ai nai atho sa nai khumi ly heng nai deung y mana khala py, chawn pa ai ny y. Ni ly huni kamngochi uikheih iy khai su khala naini, Tameuh teng i pahen naira nga ai.

¹⁴ARENG i leu tangai nai khumi ly amo theu ai. Paleung kyhchaw nai khumi ly patang naira avum ai.

¹⁵Khumi kamawnchi ly hawi y nai samrang peang nai khala ly kajeaung kamang naira avum ai. Hawi y nai samrang ly hang hai nai khrangsi, ti y baly teicha tlai ai nai amki ryry nai tavym kamta, jei ai hawi parai nai ne.

¹⁶Tau by y nai samrang ly mipuichi ai ana reng. Katapawp paleung ka-kawi ai niu ngai y nai samrang ly peang nai deung sau ai.

¹⁷Khumi ai padei nai khumi ly amy i vui tapreaung angawm tai kaliki nai khumi ne. Huni khumi ai paka ai nai atho so moh.

¹⁸Kahawi sa reng nai khumi ly ka-jeira avum y ai. Ka-kawi paleung awm nai khumi ly vaimy atlym ai.

¹⁹Angjeng atyp nai lisama ly cha nei awm-yh ai. Neng pasum atyhtyh reng nai khumi ly kamawn lawm jojo ai.

²⁰Khumi kahawichi ly amtheaung naira kawi angym ai. Na i py vaimy nang ryp ai nai atho sa nai khumi ly kamngo pajeng naira avum ai.

²¹Meimai khen nai ly hawi y. Na i py phyrei tara chih nai keungchi ly un langseaung maidenreichy nga ai nai molam, tau hawi y nai sa u nai ne.

²²Amy i vui dawn khyh nai khumichi ly nang chawn ai nai hau u tamangtang bo. Na i py ngari kamtang avum ai nai pany u y.

²³Thui parip reng nai khumi ly kanirei nai khala, palo hawp nai leu thui reng nai khumi tleaung y, kawn nai leu thui nai avum ai.

²⁴Amhm ampochi i vawnsaichi paviu nai ly kamngo tlo y leang, nanai thui reng nai khumi ly kangviu sa reng nai khumi ne.

²⁵Amy i vui harei dawn khyh nai khumi ly ka-jo ka-thui tym hai reng. ARENG ai ym nai khumi ly nang chawn ai.

²⁶Amymychi i athang khai nai kamta sa reng nai khumi ly khumi ka-khum ne. Khumi kachengchi i thui parip nai ai tangai nai khumi ly ka-jeira avum ai ny y.

²⁷Khumi kamawnchi ai pei talam nai khumi ly kamawn acheang ai ny y. Khumi kamawnchi ai dawn hai y nai khumi ly khumichi my pasawi nai avum ai.

²⁸Khumi hawi y naichi sa thai naira nga nai khala, mipuichi ly aheu u reng nai ne. Na i py huni khumichi sa thai naira by y vui nai khala ly khumi kahawichi my peang u ali teang ai.