Read Khumi Chin LEU KACHENG 30 Bible Online

LEU KACHENG 30 - Khumi Chin bible

LEU KACHENG 30

¹Hinichi ly Jakeh i chapo Akura i parip nai leusaichi ne. “Tameuh ly kai hawi vanrei by y, Tameuh ly kai hawi vanrei by y. Kai ly jeaungmang naimy kaawm bo.

²Kai ly khumi ny y. Tawnbawi hawi atawm keh nai ne. Khumi teng y awm ai avo nai cheng naira ly kai teng y by y.

³Kai ly cheng naira ai mana khala py amtiu vai y. Naibaly kai ly Tameuh i satang pipi pany y.

⁴Ami nai ly kani pri hawi amtawn abi nai cheng naira angym pa-rei pany vai mo? Ami nai ly ali ai kiu hawi patiu nai nga vai mo? Ami nai ly tui ai kanih hawi tapau vai mo? Khaileaung pri i khujyh ai ami my pata pi vai mo? Huna nai khumi ly ami mo? Ni i chapo ly ami mo, nang pany a?

⁵“Tameuh ly ka-ym awm nai ne. Mymy ly my teng y abyh nai khumi bawibawichi i vui khupui kamta ne.

⁶Mymy i leuchira y ati sai py panawi bi moh. Panawi bi lawh baly, mymy ly nang i tlang tleaung y khri pa-rei ang thui ang parip ai i, nang ly ka-chawi ka-hui thui nai khumi, nanai pany hai ai.”

⁷Aw Tameuh, kai dei y rai khala, hini amjy nyhrei pei ai nai kang takeng.

⁸Kai i labeaung mang ka-chawi thui hai moh ba. Naibaly kai ai nang ai nai py, kamawn lawm ai nai py pei moh kyh ba. Hunaibaly kai i teicha teinei ngai nai ryrei phai pei ba.

⁹Kai ly ngai nai tleaung y nga panawi lawh teu baly, nang ai khai su lawh na. Kamawn lawm lawh teu baly kangviu kasa ai i, kai ly Tameuh i amyn amso ngai hai lawh ai.

¹⁰Nang ly yhmkeung teng y miseaung i hawi y nai satang preaung nai leu thui lawh baly, huni miseaung my ang pasawi ai i, hawi y naira nga ai.

¹¹Phyrei khumichi ly mychi i ampochi ai pasawi iy, amhmchi ai kahawi so u y.

¹²Phyrei khumichi ly khri pa-rei amso ngai naichi ne teu i py, mymychi ai khumi kachaichi ne, nanai athang khai u.

¹³Phyrei khumichi ly mymychi ai khri pa-rei khumi kahawichi ne, nanai apalawn u reng. khrikhri pa-rei khumi kahawichi ne, nanai athang khai u lawh ly!

¹⁴Phyrei khumichi ly kamawn kateuchi tlang tleaung y pahyp y naimy kho sa iy, mychi apacho pajau ai nai sa u reng nai ne.

¹⁵Tui amnym teng y chaniu nyhrei awm. Nini i amyn ly “Kai ai pei,” nanai ne. Mana khala py ngai nai paleung tui bym vai y nai amjy palyhrei awm.

¹⁶Hunichi ly tavau saleaung, cho chanau so vai y nai neampachy, kanitui bym vai y nai khaileaung, padei lei y nai mai, hunichi ne.

¹⁷Amy i ampo ai panui hai reng nai khumi, amy i amhm ai saneng len nai thym khala tahm khai y nai khumi i ngan ai ly langna teicha lawm hai ai nai avo; ti y baly ni i mei ai o-achi my patiu hai ai nai avo.

¹⁸Khri pa-rei lyh ai hawi iy pany thai y nai amjy palyhrei awm.

¹⁹Kani laileaung y ahmtlau i akheang nai sai, lengseaung salo y pavui i jawn nai sai, pangli y sampho i so nai sai hawi thawndeang anglochi i akhrei nai saichi ne,

²⁰Ka-ym by y nai aju ly ami i yhm hlau taphra chum baly, tui ahiu pan iy “Kai ly ati sai py hawi y naira kaso y leang " nanai katheu reng.

²¹Khaileaung pri my neaung kham pajau y nai amjy palyhrei awm. Hunichi ly

²²samrang lawm nai miseaung, kajeu kawi pa-rei cha ai nai ngai nai khumi ka-khum,

²³niu ai nai ngai y na teu i py, juvo nang nai neampachy yhmkeungnu i meingtym y awm lawh nai miseaungnu, hunichi ne.

²⁴Khaileaung pri y theang keh nai ne teu i py, khri pa-rei tau cheng nai amso tawnbawi amjy palyhrei awm; hunichi ly

²⁵atho di teu i py kanipui khala y teicha teinei pateung achu reng nai sa-ma,

²⁶atho di teu i py mychi awm ai nai khochi lengseaungchira y sa reng nai spautavui.

²⁷samrang by y teu i py amkawm iy, amki reng nai akhutama,

²⁸Kiu hawi patiu ai nai nga iy samrang yhmchira y awm nai angpangbyhthli, hunichi ne.

²⁹Lam tako nai khala kalen pui amlawn nai amjy palyhrei awm; hunichi ly

³⁰Amso mawichi theung y atho awm keh iy, ami ai py jei y nai khrangsi,

³¹mi-i katai, takaho naimy tako nai a-talui pui, mipuichi i mo y apu parai nai samrang, hunichi ne.

³²Nang ly akhum iy paleung len naimy, hawi y naira sa ai nai dawn lawh baly anawn daw iy adawn pasym ba!

³³Kanu tui ai tahawi baly thobai nga; notareang ai kiu hawi tapheu baly thi theu reng. kado theu ai nai kachyh lawh baly ajo reng nai ne.