Read Khumi Chin LEU KACHENG 31 Bible Online

LEU KACHENG 31 - Khumi Chin bible

LEU KACHENG 31

¹Hini ly samrang Lemuela ai amhm my thui pi nai parip nai leuchi ne.

²“Nang ly kai i khrei nai chapo, kaimy chiu sa iy nga nai chapo ne. Kai ly nang ai ati kang thui ai mo?

³Nang ly nangmy teng y awm nai atho haiho hawi, paisa tangkachi ai neampachychi hawi amo theu naira y pasum atyhtyh moh. Nichi ly samrangchi ai malawn py, phra hai vui nai ne.

⁴Aw Lemuela awi, tangai ba. Samrangchi nanai ly kreip hang nei ai nai avo y. Mhm-rah ai ly paleung no ai nai avo y.

⁵Nichi ly mhm-rah nei cha u nai khala, tara leu reita ai tami vui iy, khumi kamawnchi i nga ai avo naichi ai, dawndan pi y lawh nai ne.

⁶Mhm-rah ly dei enten nai khumichi hawi, paleung si nai khumichi i vui ne.

⁷Nichi ly mhm-rah nei u iy mychi i ngari kamtangchi hawi, paleung ka-dawn hawi y naichi ai tami u pawn na sy.

⁸Mychi i vui leu katheu pajau y nai khumichi i jeng y nang ly katheu pi ba. Jeaungmang nai khumichi i nga ai avo naichi ai, amo hai ly kry pi ba.

⁹Nichi i vui katheu pi iy, leu meitang y tara chih pi ba. Khumi kamawn kateuchi i, nga ai avo naichi ai amo hai ly kry pi ba.

¹⁰Kaja awm nai aju ai hau iy, avum ai nai ly khri pa-rei rai parai na! Ni ly amia lengseaung tleaung y py, vang teng keh na a!

¹¹Ni i juvo ly ni ai ym nai deaungkho y, mana khala py kamawn acheang ai ny y.

¹²Huni aju ly mymy deungrei, juvo i tlang tleaung y kahawi naini sa khyh. Mana khala py hawi y nai so vai y.

¹³Ni ly beram mui ateaung hawi, kanih mai ka-synchi aneng jojo nai ne.

¹⁴Ni ly ka-sum ka-pai sa nai samphochi kamta, kamlo i dengdairei teicha teineichi ai, yhm y vawi hai reng.

¹⁵Ni ly khutawi y rai khala my ang thau iy, yhm dengtheungchi i vui teicha teineichi theaung pi iy, my i miseaungnuchi ai kalop pacheang pi reng.

¹⁶Ni ly khaileaung kahawi khen hawihai iy, van bo; naibaly my i kalop sa naira i ko nai paisa tangka hawi kreip akho sa nai ne.

¹⁷Ni ly kalop sa ham parai naimy atho sa nai khumi, no-na by y iy angjeng atyp nai khumi ne.

¹⁸Ni ly my i sa nai vawnsaichi ai vang teng nai sai pany i, kani dym pa-rei py kalop sa nai ne.

¹⁹Ni ly mymy naimy palo kalang kyn iy ateaungchi aneng bo.

²⁰Ni ly kamawn kateuchi ai leunghawi naimy pei reng.

²¹Ni ly kadam tla nai neng khala, paleung mawn y leang. Ati mana nai mo nabaly mymy i yhm dengtheungchi ly bi-um nai ateaungchi awm nai deaungkho y ne.

²²Ni ly kanihchi aneng iy, ateaung kamngau ateaung reng.

²³Ni i juvo ly mary ai lu sa nai keung leaungrei ne i, amyn amthang nai khumi ne.

²⁴Ni ly ateaung alangchi hawi khobaichi aneng iy, ka-pai sa naichi teng y jo bo.

²⁵Ni ly atho py awm iy tahm py awm i, mo mang i vui mawnra by y.

²⁶Ni ly jypjypchy naimy cheng nai leu kahawi katheu iy, meitang naimy parip kawp nai ne.

²⁷Ni ly pjang nai py by y. Kalop sa nai tarawi y, my i yhm dengtheungchi i ngai naichi py, nga ai nai dawn ryhpatyh pi jojo.

²⁸Ni i cho chanauchi ly ni i sabawm nai molam y, ni ai amthang hai i, juvo ly ni ai palo nai ne.

²⁹Ni i juvo my, “Nang ly kahawi sa kawp nai aju, neampachy neangneangchi theung y, nang ly kawp keh,” nanai palo bo.

³⁰Paleung ka-dawn apei vui na pa-rei, apu parai naichi py tama pajau. Na i py ARENG ai jei kaji naimy tahm khai nai neampachy ai ly palo ai ataing nai ne.

³¹Huna nai sa nai neampachy ai tahm pasang ba. Ni ly khumi luteng my tahm khai ai ataing nai khumi ne.