Read Khumi Chin LEU KACHENG 4 Bible Online

LEU KACHENG 4 - Khumi Chin bible

LEU KACHENG 4

¹Deangchi awi, ngampo kai i patiu pi nai leu tangai u. Pany thai ai nai hawihai palai tangai u.

²Kai i patiu pi naichi ly hawi nai deaungkho y, hunichi ai tami u moh.

³Amhm ampo i chapo leaungrei khyh nai kai ly deaungdichy nai thym khala,

⁴kai i ampo ly kai ai, “Nang ly kai i leu ai pateungme iy pany jo ba. Mana khala py tami moh. Kaimy kang thui pi nai kamta so; hunaibaly nang heng ai.

⁵Cheng naira hawi pany thai praw nai cheng naira ai amtiu! Kai i thui nai leu tami moh; athang khai y naimy awm moh.

⁶Cheng naira ai khai su moh; huni my ly nang ai ang kry ai. Cheng naira ai paleung bie ba. Huni my ly nang ai chymme hai ai.

⁷Cheng naira ai amtiu manme ba; amtiu nai ngiereichi theung y, pany thai praw nai cheng naira ai amtiu patyp keh ai nai tla.

⁸Cheng naira ai paleung abie ba. Huni my ly nang ai tahm asang hai ai. Cheng naira ai takawi na ba. Huni my ly nang ai tahm pateng hai ai.

⁹Cheng naira ly nang i lu ai apu parai nai lupeu ajeng hai iy, nang parai nai areng lukhym amyn hai ai,” nanai kai ai patiu pi bo.

¹⁰Deang awi, kai i leu tangai ba. Kai i thui nai leu ai tahm khai parai naimy dawn patyp ba. Hunaibaly nang heng sau ai.

¹¹Kai ly nang ai cheng naira kang patiu pi iy, kataw kateng heng ai nai lam kang patei pi ai.

¹²Nang ly tau kacheng hawimy, nangmy i lam y tako baly, khrukhra naira ati sai py avum ai ny y. Nang angpreng nai khala py, pathuikhe iy avah ai ny y.

¹³Nangmy i ngai nai cheng naira ai ly pany jo ba. Nang i ngai nai cheng naira ly nang i heng naira ne; huni ai ly hawihai kry ba.

¹⁴Nang ly khumi hawi y naichi i, tako nai lam y tako moh. Khumi hawi y naichi i sa nai kamta amtiu moh.

¹⁵Huni khumichi kamta so moh; hawi y nai ai ly amkyn! abang moh. Lam takhra mang y amphri vui.

¹⁶Khumi hawi y naichi ly hawi y naichi so y baly i amhm y. Nichi ly khumi takhra ai patang hai y baly i thai y.

¹⁷Hawi y naira hawi sa ta-li nai ly nichi i vui y teicha teinei palawn nai ne.

¹⁸Khumi kahawichi i tako nai lam ly khutawi phang nai kangvang sangso, khawn kani si nai hawi atawm.

¹⁹Na i py khumi hawi y naichi i tako nai lam ly vum kamta veng nai ne. Nichi ly atlym i py, mychi ati ai pathuikhe iy atlym nai mo, nanai pany u y.

²⁰Deang awi, kai i leu tangai ba; kai i thui naichi adawn patyp ba.

²¹Hunichi ai mana khala py nangmy hawi amprei mo ly pany jo iy nang i paleung theung y pateungme ba.

²²Hunichi ai pany nai khumi lutengchi ly heng ai i, atho awm ai.

²³Nang ly mana dawn mo, nanai adawn patyp ba. Nang i dawn naichi my, nang i vui khym taham kahawi sa pi reng nai ne.

²⁴Mana khala py teng y nai leu katheu reng moh. Ka-chawi leu hawi ka-tawm huihai leu thui reng moh.

²⁵Nang ly nangmy i hawi naira ai a-ym iy, khumi takhrachi i meimai khen vam sy. Kaji naimy lu meung iy awm moh.

²⁶Nang i sa ai nai kalop ai, hawihai palai adawn iy so. Hunaibaly nang i sa nai leaungsai ngiereichi ly eaung ai.

²⁷Hawi y nai ai en vui iy, langvawi lamtang angphri y naimy kataw tako ba.