Read Khumi Chin LEU KACHENG 6 Bible Online

LEU KACHENG 6 - Khumi Chin bible

LEU KACHENG 6

¹Deang awi, nang ly ami i vui kalai pe ai nai khampi nai awm a?

²Nang ly nangmy i leu hawimy, nangmy ai man lawh bo a? Nang ly nangmy i leu ka-deu my, nangmy ai kalai nga hai ryp lawh bo a?

³Deang awi, tuna lawh baly, nang ly huni khumi i kiu theung y tym vui bo. Hunaibaly huni khumi teng y chei kaliki ly kalum kalai lawira nga ai nai, ahui kajeaung kaji ba.

⁴Nang ly i py i y, amdaw py amdaw y naimy,

⁵deaung y man i, tleaung ai nai amprai nai tavo kamta, mawi sara teng i tleaung ai nai ampreng nai sisiu kamta, tleaung ai nai nangmy atho so ba.

⁶Khumi napjangchi ly sa-machi teng i amtiura la ai nai hawi parai.

⁷Sa-machi ly lu sa nai keung py, miteaung keh ti y baly peang nai keung py by y.

⁸Na i py nichi ly kanipui khala y my, kaseih neng i vui mychi i teicha teineichi pakym u achu reng nai ne.

⁹Khumi napjang ly ira tleaung y mana tanrei aseaung jo ai mo? Mana khala y ira i nai ang thau ai mo?

¹⁰Nimy, “Kai ly tanareichy i ai rai; kiu atakawime naimy tanarei amdaw rai si,” nanai thui reng nai ne.”

¹¹Na i py huna nai i nai thym y, ngari kamtang ly haisau syn nai damra kamta, ni i tlang tleaung y tym ai.

¹²Khumi ka-khum hawi khumi hawi y naichi ly amki iy, leu ka-chawichi thui u reng nai ne.

¹³Nichi ly mei meang hai naimy, kiu kheu palie hai naimy, nangchi ai parawi reng nai ne.

¹⁴Nichi ly ka-kawi paleung awm iy, teng y naira ai dawn u pasym jojo naimy, meingtym tleirei y ka-jo ka-thui nawi pa-rei sa u reng nai ne.

¹⁵Hunai deaungkho y khri pa-rei ka-jeira ly pany pacha y naimy tym i, nichi ly phra u ai.

¹⁶ARENG i niu ngai y iy, amso ngai nai amjy tariurei, ti y baly amjy saryhrei awm; hunichi ly:- amlyh am-e nai mei harei, Ka-chawi thui reng nai palai harei, kamngo by y nai khumichi ai tleh reng nai kiu harei, hawi y naira ai dawn nai paleung harei, hawi y naira sa ai nai mang y tako kaliki reng nai kheu harei, ka-chawi thui nai, teng y nai pany hai nai harei, ahawi tengtawi ka-jo pakei reng nai khumi leaungrei, hinichi ne.

²⁰Deang awi, nang ly ngampo my thui pi nai kamta so ba; ngamhm i parip nai leu ai mana khala py tami moh.

²¹Nichi i leusaichi ai nangmy i paleung theung y, tami y pa-rei pateung me jo ba.

²²Nichi i patiu pi nai leuchi ly nang khuleaung amsa nai khala, lam ang patei ai. Vum y nang ai ang kry ai i, kanithun y ly nang ai tau ang pei ai.

²³Reita leuchi ly maisi yhm kamta ne i, nichi i ang thui pi nai leuchi ly kangvang hawi atawm. Nichi i thui parip nai leuchi ly nang heng ai nai lam patei pajau.

²⁴Hunimy ly nang ai neampachy kamleaungchi my, parawi naira i nai py, juvo awm nai neampachychi my parawi hyp naira i nai py, amkyn hai pajau nai ne.

²⁵Nang ly huni neampachychi i mo-cha kahawi ai paleungno moh. Nichi i ngai tahau nai deaungra y man moh sy.

²⁶Neampacho leaungrei ly bima leaungrei ai tako phirei vang hawi alai pajau. Na i py ami i aju chanau ai tamang nai khumi ly mymy teng y awm nai yhmtheaungchi sum ai.

²⁷Nang ly nangmy i ateaungchi ai mai kang hai y naimy, huni mai ai nang i paleung tleaung y takawi iy syn pajau na a?

²⁸Nangmy i kheu ai mai kang hai y naimy, mai-aichi salo y aleaung pajau na a?

²⁹Ami i aju hawi i ahawi nai py, huna nai kamta ka-jeira awm; huna nai sa nai khumi ngiereichi ly patang naira avum u ai.

³⁰Kajeu alam nai deaungkho y, teicha teinei paviu nai khumi ai ly khumichi my paso u nai ny y leang.

³¹Na i py ni ai patiuram baly, phy saryhrei pe hai reng nai ne. Huni khumi kangviu ly mymy teng y awm nai ngierei hawi pe ai nai tla bo.

³²Na i py ami i aju chanau ai tamang nai khumi ly pany thai naira pipi by y nai khumi ne; ni ly amymy ai ataphra nai khumi ne ai.

³³Ni ly tahm anem ai i, mimy pakhau nai kham ai nai tla ai; kangji nga jojo ai.

³⁴Juvo my mei khen adawi y nai deaungkho y, kado theu nai ly mai aveaung nanai molam y, vawitheung tha nai ly pahyp ai ny y.

³⁵Ni ly ati mo pe nai py talam ai ny y; langseaung neangneang pei teu i py, ni i kado theu nai ly rym pajau ai ny y.