Read Khumi Chin LEU KACHENG 7 Bible Online

LEU KACHENG 7 - Khumi Chin bible

LEU KACHENG 7

¹Deang awi, kai i thui nai leu pany jo ba. Kai i leu pei naichi ai mana khala py tami moh.

²Kai i thui pi nai kamta so ba. Huna nai sa baly nang heng ai. Nang ly nangmy i meicho kangvai ai akry nai kamta, kai i parip naichi tangai ba.

³Hunichi ai kiusabyh kamta amchiu ba. Nang i paleung pakawi ra y tajiu typ ba.

⁴Cheng naira ai ly nangmy i tuicho kamta, pany thai praw nai cheng naira ai ly ahawi ka-dawi kamta palawn ba.

⁵Hunichi my ly nang ai ami i ajuchi, labeaung palai hawi parawi reng nai neampachychi teng i nai py amkyn hai ai.

⁶Kanirei nai khala y kai ly kaimy i yhm thaibeng mang dengdairei, angam mang y khen angdeang nai thym khala,

⁷pany nai sai angym y nai thawndeang deaungdi neangneangchi ai kaniu bo. Na i py hunichi theung y khumi ka-khum leaungrei ai khen patawm nai ne.

⁸Ni ly kani dym mo y lam aleaung i, kani dym baly lam taki sahawi y awm nai neampachy leaungrei i yhm mo y tym bo.

¹⁰Huni neampachy ly bimanu kamta ateaungchi amthyp; ni ly hawi y nai katau hawi, huni thawndeang deaungdi ai lamchung bo.

¹¹Neampachy ly vam parai iy, kangji by y nai khumi, lamchira y aleaung reng nai khumi ne.

¹²Ti y i py ni ly tlen tlenrei lam takichira y mo, lamchira y mo, seng meingtymra y mo, ajeng jo reng nai ne.

¹³Neampachy ly huni thawndeang deaungdi ai takawi naimy pachawm iy, meimai ai hawihai khen i,

¹⁴“Vaini kai ly apathyp nairachi katalam chum bo i, kai teng y mawi anchi awm.

¹⁵Hunai deaungkho y kai ly nang ai avum ai ngai nai molam y theu i, vai ly avum bo.

¹⁶Kai ly kaimy i ira ai, Aikupta pri i an amjy cheaungkhang kanih mai ka-syn hawi bai yb bo.

¹⁷Huni ira ly mura, kulataruchy hawi sinamon rimuichi mui amseaung yhyh nai ne.

¹⁸Jeu ba; vumtorei akhrei ahawi sina; leaung leaungrei atakawi naimy amo theu hawi sina.

¹⁹Kai i juvo ly yhm y by y; ni ly khuleaung kamlora y chei vui veng.

²⁰Ni ly tangka neangneang angpiu nai ne i, kani holai palyhrei khala ang vawi teang ai,” napi.

²¹Huni neampachy ly my i li-parawi hyp nai hawi parawi nai deaungkho y, thawndeang deaungdi ly ni i kangai mang y abang vui bo.

²²Ni ly tleh ai nai pahawi jo nai si katai kamta, my i paleung pakawi y thailiho chyn chawm khyp pa-rei humra y ampyh iy, satla nai sisiu kamta, huni neampachy hawi abang praw ryp bo. Ni ly paleupyra y man nai tavo kamta atawm. Mymy i ka-jeira avum nai malawn py pany y.

²⁴Hunai deaungkho y deangchi awi, kai i leu tangai u. kaimy kang thui pi nai leuchi tangai u patyp.

²⁵Huna nai neampachy ai ly paleung apei u moh. Ni i nithun y abang u moh.

²⁶Ni ly neampacho neangneangchi ai taphra chum veng bo. Kati pajau y na pa-rei neampachochi ai dei hai chum bo.

²⁷Ni i yhm ly tapreaung mang y chei nai lam ne i, tavau saleaung chei nai katheu pa-kho py ne. Dei neng ny y naimy dei reng nai leaungsai ne.