Read Khumi Chin LEU KACHENG 8 Bible Online

LEU KACHENG 8 - Khumi Chin bible

LEU KACHENG 8

¹Tangai cham! Cheng naira my ang palau. Pany thai nai cheng naira ly my i raawi khumichi thai ai nai aeu nai ne.

²Lam sahawi mawi saleungchira py, lam sangum lam kampreichira py, cheng naira ly angdo nai ne.

³Mary theung y kun nai pa-kho ra y py, mary apai pa-kho sahawi y py, angdo nai cheng naira my ly

⁴“Khumi bawibawichi awi, nangchi teng y kang takeng; khaileaung pri y awm nai khumi bawibawichi ai kang palau nai ne.

⁵Nangchi ly cheng naira angym bo a? Cheng naira angym pa-rei amtiu u. Nangchi ly khumi ka-khumchi a? Cheng naira nga ai nai amtiu u.

⁶Kai ly leu kahawi katheu ai; tangai u. Kai i thui nai leu bawibawichi ly kateng ne.

⁷Kai i katheu nai leu ly ka-ym awm nai leu ne. Kai ly ka-chawi leu ai niu ngai y.

⁸Kai i katheu nai leuchi ly ka-ym awm nai leuchi ne. Teng y nai leu, li-tapawp nai leuchi abawi y.

⁹Huni leuchi ly pany thai praw nai cheng naira awm nai khumi i vui ly pany chai pyn nai ne. Lulip pany parai nai khumi i vui ly pany chang pyn pajau.

¹⁰Tangka i jeng y kai i patiu pi nai ai vawi patyp ba. Muku tangcheng i jeng y, pany thai nai cheng naira ai vawi patyp ba.

¹¹“Kai ly cheng naira ne i, amia lengseaungchi tleaung y py hawi keh nai ne. Paleung ka-nora bawibawichi ly kai hawi pata pajau y leang.

¹²Kai ly cheng naira ne; kai teng y pany thai praw nai cheng naira awm. Kai ly cheng naira hawi meitang naimy, tara chih pajau nai py kawi angym nai ne.

¹³ARENG ai jei kaji naimy tahm khai nai ly hawi y naira ai amso ngai nai py ne. Kai ly paleung len nai hawi amlyh nai, hawi y nai lam y tako nai hawi ka-chawi thui nai leuchi ai niu ngai y nai ne.

¹⁴Kai ly katauchi sa iy, amlum amcheang hai bo. Kai ly pany thai nai cheng naira hawi, sorai paleung py kawi angym nai ne.

¹⁵Kai ly samrangchi ai pri peang thai ai nai py, peang nai keungchi ai peang nai reita kahawichi, khai pi yb ai nai py sabawm nai ne.

¹⁶Samrang i chapo hawi bangtangchi dengdairei, khaileaung pri y awm nai samrang bawibawichi ly kai i sabawm nai hawi peang u nai ne,

¹⁷Kai ai tamen nai khumi ai, kai py tamen; ami py ne sy, kai ai hau baly avum pajau.

¹⁸Kai ly nangchi ai nang chawn ai nai hawi tahm awm ai nai py, nang naira hawi eaung naira py pei bo.

¹⁹Kai teng i nangchi nga nai amtheaung naira ly muku tangka tleaung y hawi keh. tangka tangcheng tleaung y py hawi keh nai ne.

²⁰Kai ly khumi kahawi i lam napi nai, leu meitang adyh adawi nai lam y tako bo.

²¹Kai ai tamen nai khumichi i yhm y, yhmtheaung katuichi kawi hai bo. Nichi ai nang chawn naira kapei pi.

²²“ARENG ly jangni jangkhawn khala my, kai ai sa manme nai ne. Kai ly mymy i sa angchei nai kuchi ne.

²³Kai ly khaileaung palum y rai khala my, kangman keh y kai ai sa angchei nai ne.

²⁴Tavo micheaungchi by y rai khala, panglichi so y rai khala, kai ai tapen.

²⁵Mawichi so y rai khala, mawi aheungchi palum y rai khala,

²⁶Tameuh my khaileaung hawi li hlau meingtymchi, angchei i spryh ai malawn py so y rai khala, kai ai tapen bo.

²⁷mymy ly kani khusang ai palum nai neng, pangli y tako prei iy, khusang ai kadai nai neng khala kai awm nai ne.

²⁸Mymy ly kani mang y khupanymchi ai meingtym tasyh pi nai neng, pangli tuino khochi paeaung nai neng khala py kai awm.

²⁹Mymy ly pangli tuichi py leu pei nai ryrei, tui tym khyh ai nai leu pei nai neng y kai ly hu y awm. Khaileaung i sangum langdeng panui nai neng khala py, kai ly awm yb nai ne.

³⁰Kai ly kupe kakawp leaungrei kamta, mymy sahawi y awm; Kai ly mymy ai kani tleirei amo theu hai. Kai ly mymy i mo y avawrei amo theu naimy,

³¹khaileaung pri molam amo theu iy, khumi bawibawichi hawi vanrei, paleung anyp naimy awm bo.

³²“Hunai deaungkho y deaungdichi awi, kai i leu tangai u. Nangchi ly kaimy kang thui pi nai kamta, sa u baly taham hawi ai.

³³Kai i patiu pi naichi tangai u. Tau kacheng awm u; kai i patiu pi naichi ai, athang khai y naimy naimy awm u moh.

³⁴Kai i leu tangai nai khumi, kai i yhm katheu pa-kho y kani tleirei, ajeng nai khumi ly taham hawi ai.

³⁵Kai ai hau iy niu nai khumi ly hengra py niu ai. ARENG ly huni khumi ai khrei ai.

³⁶Kai ai hau iy niu y nai khumi ly amymy ai no patang hai nai khumi ne. Kai ai niu ngai y nai khumi ngiereichi ly dei areng ai khrei nai khumichi ne.