Read Khumi Chin LEU KACHENG 9 Bible Online

LEU KACHENG 9 - Khumi Chin bible

LEU KACHENG 9

¹Cheng naira ly my i vui yhm sa iy, huni yhm i vui leungcheng saryhrei hleng bo.

²Ni ly cha nei pawi harei sa ai nai mawi an theaung chum baly, kreip hang ai kamui kalangchi hawi katlen iy, cha pawi sawn yb bo.

³Mymy i miseaung neampachychi ai pato iy, mary theung y asang keh nai meingtym mang dengdairei,

⁴“Tau cheng naira by y nai khumichi awi, jeu u!,” nanai aeu iy palau hai bo. Naibaly cheng naira my khumi ka-khum teng y,

⁵“Kai i pawi yb nai teicha teinei hawi, kai i katlen yb nai kreip hang cha nei ai nai jeu u.

⁶Hengra nga ai nai cheng y nai khumi mipuichi theung i theu iy, cheng naira lam y phai tako u,” napi.

⁷Paleung len nai khumi ai parip nai khumi ly mei aniu y naira naini avum ai. Khumi hawi y nai ai thui parip nai khumi ly tamo kalem naini nga lawh ai.

⁸Paleung len nai khumi ai, hawi palum ai nai mana khala py atho so moh. Huna nai atho sa nai khumi ai ly niu ngai y ai. Na i py khumi kacheng ai thui parip nai khumi ai ly tahm khai ai.

⁹Khumi kacheng ai thui parip nai leu ngierei ly ni ai cheng tleaung cheng hai ra ai. Khumi kahawi ly patiu nai leu tangai nai molam y, cheng tleaung chengra ai.

¹⁰Cheng naira ai ngai nai khumi ly ARENG ai tahm khai manme ai nai tla. Chai parai nai keung ai pany nai khumi ly tau cheng nai khumi ne.

¹¹Cheng naira ly nang i vui heng sau hai ra ai.

¹²Nang ly cheng naira awm baly kamranra nga ai. Nang ly cheng naira ai khai su lawh baly, patang naira avum ai.

¹³Akhum nai ly pany thai naira hawi, kangji kangai by y iy, raawi amkau parai nai neampachy hawi atawm.

¹⁴Huni neampachy ly my i yhm katheu pa-kho y mo, mary i amtawi keh nai meingtymra y mo ateh iy,

¹⁵huni sahawi mang, amy i aly y aleaung ali nai khumichi teng y,

¹⁶“Cheng naira by y nai khumichi awi, hi y jeu u!,” nanai palau. Ni ly khumi ka-khumchi teng y,

¹⁷“Kangviu y nei nai tui ly tui keh; paviu iy cha nai tako ly hawi keh,” napi.

¹⁸Huni neampachy i yhm y chei nai khumichi ly dei u ai nai py, ni i yhm theung y kun yb nai khumichi ly tavau pri i thui parai nai meingtym y tym u bo, nanai py, ni i kiu tleaung y tym nai khumichi ly pany u y leang.