Read Khumi Chin Parip nai leu 1 Bible Online

Parip nai leu 1 - Khumi Chin bible

Parip nai leu 1

¹Hinichi ly Jerusalem mary i samrang Davida i chapo, kathiu dawn pasym kawp nai khumi kacheng i thui pi nai leuchi ne.

²Kathiu dawn pasym kawp nai khumi kacheng my thui pi nai ly khumi i heng nai ly atyhtyh teu, atyhtyh teu, khumi i heng nai ly atyhtyh teu; ati cheaungkhangchi py atyhtyh teu.

³Nang ly nangmy deungrei akawm parai naimy kalop sa teu i py, ati kamran nga mo?

⁴Khumi kangpreangchi ly deungrei bo y deungrei peung u teu i py, tama vui nai ne. Na i py khaileaung pri ly hina nai kamta awm jojo.

⁵Kanito ly si jojo iy dym py dym jojo nai ne. Naibaly kanito ly dym nai si nai kari naimy si taleang bi ai nai mang y akawm parai naimy ami teang bo.

⁶Ali ly tokalawi mang y py, tosyh mang y py aho; hini ly aho amki prei naimy, mymy i meingtym y tym teang.

⁷Tavo bawibawichi ly pangli y leaung achu; na i py pangli ly kawi bo, nanai by y. Tui ly leaung amteaung nai meingtym mang y tym ali teang iy, leaung taleang bi.

⁸Ati cheaungkhang ly thui pachai ai nai ngo y na pa-rei paleih ai hawi na bo. Achi i mei hawi khen nai ly kheih pajau y, achi i kanochi py thai nai paleung tui bym pajau y.

⁹Jangni i awm chum naichi ly awm ali teang bi ai; jangni i sa chum naichi ai ly sa u taleang bi ai. Hini khaileaung pri verei y kangtha, nanai ly harei py by y.

¹⁰“Khen cham, hini ly kangtha ne!” nanai khumichi thui u reng nai ne. Na i py huni ly kangtha ny y, hini ly jangni khala i dengdairei awm yb nai, achi tapen y rai khala y my awm yb nai teu.

¹¹Khumi ami py jangni i awm naichi pany jo pajau y leang. Naibaly khumi ami py ne sy, vai i deung hawi mo mang i deung sala y tym ai naichi ai py, mo mang i deung y tapen nai khumichi my pany u ai ny y.

¹²Kai, kathiu dawn pasym kawp nai khumi kacheng ly Jerusalem mary y awm iy Israela pri ai peang nai keung samrang ne.

¹³Hini khaileaung pri y sa nai atitichi pany ai nai leu pacheang bo. Tameuh ly kaichi paleung phra ai naira khym taham avum hai bo.

¹⁴Kai ly hini khaileaung pri y khumichi i sa nai ngiereichi kaniu chum bo. Kaimy kang thui pi ai; huni bawibawichi ly atyhtyh teu, ali ai patiu nai kamta ne.

¹⁵Nang ly ka-kawi ai kataw lawm hai thai y leang; amny amcha y nai atitichi ai py nang kati pajau y leang.

¹⁶ Kai ly kaimy ai, “Kai ly khumi kalen kalawn lawh bo; kai ny y rai khala i Jerusalem mary y peang nai samrangchi tleaung y py cheng naira awm. Cheng naira hawi tau cheng naira kanga yb nai bo. Meitang khyp, cheng naira hawi tau cheng naira, napi nai ly atichi mo, nanai kai kapany,” nanai kadawn.

¹⁷Kai ly cheng naira hawi akhum nai sai takhra nai py, tau cheng naira hawi pathu nai sai takhra nai py, pany ai nai leu pacheang bo. Na i py kaimy py ali ai patiu nai kamta lawm ai, nanai kapany.

¹⁸Khumi ly cheng naira nga tleaung ngara nai hawimy, paleung bi naira py nawi tleaung nawira nai ne. Tau cheng naira panyra panyra baly paleung no nairachi py nawira bo.