Read Khumi Chin Parip nai leu 11 Bible Online

Parip nai leu 11 - Khumi Chin bible

Parip nai leu 11

¹Pri takhrara y kalop sa hai ai nai nang i tangka ai rang palo ba. Kanirei nai khala y nang ly kamran nga ai mang.

²Nang i rang pala nai ly meingtym neangneangra y palo ba; ati mana nai mo nabaly, nang ly hini khaileaung pri y mana khala khym taham kasi hawi avum na mo, nanai pany pajau y nai deaungkho y ne.

³Dengkeaung keung harei ly mani mang y aheang nai py ne sy, aheang nai meingtymra y naini awm jo ai. Khupanymchi ly kanitui kawi nai khala, kani nai hai reng.

⁴Ali kanikhu hawi ai nai ajeng nai khumi ly mana khala py amti amjang pati ai nai hawi pakym ai nai nga ai ny y.

⁵Tameuh my ati cheaungkhang ai sa nai ne; huna nai y nang ly deaungdi aniu nai neampachy kajeu theung i deaungdicho mana heng amteaung nai mo, nanai pany y nai kamta, Tameuh i sa palum nai saichi py pany pajau y leang.

⁶Nang i tichi ai ly khawn mang py, dym mang py hei ba; neng tlen nyhrei hei nai tichi ly prau nai hawi ai, nanai py, ti hei nai theung y mani ti hei nai ly prau ai mo, nanai py nang pany pajau y leang.

⁷Apu parai nai kanito i kangvang ai nga nai ly hawi nai ne.

⁸Nang ly heng sau nai molam y kawn ba. Nang ly mana tanrei heng sau teu i py, nang dei nai bo i awm ai nai neng ly heng nai neng tleaung y sau keh ai, nanai pany jo ba. Mo mang i neng y nang i vui athang khai naira harei py by y.

⁹Nangchi thawndeang deaungdichi awi, hawi thym khala amo theu naimy awm u; saneng theang nai thym khala amo theu nai awm u; sa ai ngai naichi sa naimy, amy i paleung kangai su u. Na i py Tameuh ly nangchi i sa nai saichi molam y, nangchi i tlang tleaung y tara ang chih ai, nanai pany u jo ba.

¹⁰Nangchi ly ati mo ra py paleung mawn nai awm u moh, ti y baly paleung atho di nai awm u moh. Nangchi ly saneng nau naimy neng kasau awm jo ai ny y leang.