Read Khumi Chin Parip nai leu 2 Bible Online

Parip nai leu 2 - Khumi Chin bible

Parip nai leu 2

¹Kai ly amo theu naimy awm iy amo theu nai leaungsai ai dawn pasym iy hau cham ai nai paleung theung y dawn yb bo. Na i py hunichi py atyhtyh teu, nanai kaniu.

²Panui atyhtyh nai ly ka-khum ne iy pjo ala naichi py ati sai py hawi naira pei pajau y, nanai kai pany bo.

³Kai ly tau cheng naira ngai phi nai paleung ka-dawn hawi kreip hang nei iy amo theu pjo naimy hawi naira hau ai nai paleung theung y dawn yb bo. Hini py khumichi i vui heng nai deung dawi hai ai nai hawikeh naira lam ne, nanai kai ly athang khai.

⁴ Kai ly khrikhri pa-rei kalop kalenchi py pajau pa-rei kasa. Kaimy i vui yhmchi py sa iy, kreip akhochi py kasa nai ne.

⁵Kai ly akhochi theung y thengthai keung cheaungkhangchi kaui.

⁶Kai ly hunichira y tui paleaung ai nai tuikanchychi py tai nai ne.

⁷ Kai ly miseaung neangneang kavan bo. Naibaly kai i yhm theung y miseaung chochi py tapen mang. Kai ly Jerusalem mary y awm vai nai amichi tleaung y malawn py, tawnbawichi kanang nai ne.

⁸ Kai i peang nai prichira i, samrang i yhmtheaung katuichi khai nai theung i muku tangka py kapeang nai ne. Khumi neampacho, neampachychi my kai ai amo theu ai nai khulym ang thui pi. Naibaly kaimy i ngai nai kamta samrang i aju katheangchi py kanga.

⁹ Ne, kai ly khumi kalen ne; Jerusalem mary y awm reng nai khumi bawibawichi tleaung y len keh nai khumi ne. Naibaly kai i cheng naira my py, kai ai mana khala py sum hai y leang bo.

¹⁰Kai ly kaimy ngai nai ngierei kanga. Amo theu naira ngiereichi py so y nai by y; Kaimy i sa nai kalopchira y py kamlyh. Huni bawibawi ly kaimy i sa akawm nai kamran kanga nai ne.

¹¹Naibaly kai ly kaimy i sa nai ngiereichi ai py, kaimy atho pathau iy mana tanrei kasa mo, nanai py adawn pasym nai khala ly huni bawibawichi ly atyhtyh teu, nanai kapany. Hunichi ly ali ai patiu nai kamta ne i, ati sai py kamran by y leang.

¹²Meitang khyp thui ai nabaly, samrang leaungrei ly mymy ny y rai khala i samrangchi i sa nai kalopchi naini sa pajau khyh. Hunai deaungkho y kai ly tau cheng naira awm nai, dawn pany y nai, ti y baly ka-khum lawm naira i awm nai sai ai adawn pasym cham bo.

¹³“Kangvang ly kaveng tleaung y hawi keh nai kamta, cheng naira ly ka-khum tleaung y hawi keh, nanai py kapany bo.

¹⁴Khumi kachengchi ly mymychi i chei ai nai lam niu u teu i py, khumi ka-khumchi ly niu u y,” napi. Na i py khym taham ly achi bawibawi i vui y ajeng jo nai ne, nanai kapany.

¹⁵Khumi ka-khumchi avum nai khym taham kamta kai teng y py ang tym teang lawh ai nabaly, kai i cheng naira my ly kai ai ati kamran pei ai mo?” nanai kaimy ai kaimy ka-dawn bo. Kaimy pathang nai ly “Ati sai py ny y, atyhtyh teu,” kanapi.

¹⁶Khumi kachengchi ai ami my py pany jo y, khumi ka-khumchi ai py ami my py pany jo y leang. Mo mang i neng y achi bawibawi ai py tami pawn veng ai. Khumi kacheng, khumi ka-khum, nanai patleh takhra y naimy achi bawibawi ly dei u ai.

¹⁷Hunai deaungkho y khumi i heng nai deung ly kai i vui y ati sai py ny y leang. Ati mana nai mo nabaly huni heng nai deung y awm nai atitichi ly kai i tlang tleaung y patang naira naini ang pei nai deaungkho y ne. Huni bawibawichi py atyhtyh teu; kai ly ali ai kapatiu nai kamta ne.

¹⁸Kai i kalop sa nai ngiereichi py, huna nai sa nai y nga nai yhmtheaung katuichi py, kai i vui ati sai py ny y leang. Ati mana nai mo nabaly huni yhmtheaung katuichi ly kaimy i yhmtheaung kamtym teng y daw pi ai, nanai kapany.

¹⁹Kai i yhmtheaung kamtym khumi ly khumi kacheng mo, khumi ka-khum mo, nanai ami py pany pajau y. Na i py ni ly kai atho kasa ra i kanga naichi, hini khaileaung pri y kaimy cheng naira hawi kanga nai yhmtheaung katuichi amtym be ai. Hunichi bawibawi py atyhtyh teu.

²⁰Hunai deaungkho y kai ly kaimy hina nai atho kasa lawh nai molam y paleung hawi y parai bo.

²¹Nang ly nangmy i cheng naira, tau cheng naira hawi pany thai nairachi hawimy sai sairei ai atho sa iy nga chum baly, ati sai py atho so y nai khumi leaungrei teng y pei ai nai tla lawh nai ne. Hunichi py atyhtyh teu, leu meitang ny y lawh ly!

²²Nang ly nangmy i heng nai deung y atho sa bo; paleung bi naira avum bo; na i py ati kamran awm mo?

²³ Nang i sa nai ati cheaungkhangchi ly heng nai sala ryrei, nang ai paleung bi naira hawi paleung phra naira naini avum hai khyh. Vum y py nang ly paleung awmnemra ngo y, huni atitichi py atyhtyh teu.

²⁴ Khumi leaungrei i sa ai hawi keh nai kalop ly cha naimy, nei naimy amy i haura i nga nai yhmtheaung katui amtym ai nai ne. Na i py huna nai kamta awm ai nga nai py Tameuh i saho y nga nai ne, nanai kapany bo.

²⁵Nang ly Tameuh my pei nai ny y baly cha nei nai mana amo theu pajau ai mo?

²⁶ Tameuh ly cheng naira, pany thai naira hawi amo theu naira ly mymy khrei nai khumi ai pei nai ne. Na i py mymy ly kamngo sa nai khumichi ai patang parai naimy kalopchi sa hai iy, nichi i nga nai yhmtheaung katuichi ly mymy ai kawn hai nai khumichi teng y pei. Huni bawibawichi py atyhtyh teu, ali ai patiu nai kamta ne.