Read Khumi Chin Parip nai leu 3 Bible Online

Parip nai leu 3 - Khumi Chin bible

Parip nai leu 3

¹Hini khaileaung pri i ati cheaungkhangchi ly Tameuh my vawi takhra nai neng khala y tym nai ne.

²Mymy ly tapen ai nai neng hawi dei ai nai neng py, pati ai nai neng hawi pakym ai nai neng py,

³padei ai nai neng hawi no hawi sa ai nai neng py, taphra ai nai neng hawi sa palum ai nai neng py awm.

⁴Paleungsi ai nai neng hawi amo theu ai nai neng py, vo tangam ai nai neng hawi lam ai nai neng py,

⁵akhrei ahawi ai nai neng hawi akhrei y naimy awm ai nai neng py, apachawm ai nai neng hawi apachawm y ai nai neng py awm.

⁶Mymy ly hau iy niu ai nai neng hawi tama ai nai neng py, pakym achu ai nai neng hawi aphi su ai nai neng py,

⁷seipiu ai nai neng hawi hui tabi ai nai neng py, awm pypy ai nai neng hawi leu katheu ai nai neng py awm.

⁸Tamen ai nai neng hawi niu ngai y ai nai neng py, tavai atiu ai nai neng hawi tlamsa ai nai nengchi py awm nai ne.

⁹Achi ly amychi sa nai kalop bawibawichira i ati kamran nga mo?

¹⁰Tameuh ly achi i tlang tleaung y myn ji parai nai pho hai bo, nanai kapany.

¹¹Mymy ly ati cheaungkhang i vui avo nai neng khai pi bo. Mymy ly achi teng y mo mang i satang pany ai ngai nai paleung ang pei; na i py mymy i sa nai atitichi pany angym ai nai pei y.

¹²Hunai deaungkho y achi ly amo theu naimy amychi heng nai ryrei, kalop kahawi sa ai naini awm khyh, nanai pany ai tla.

¹³Achi bawibawi ly cha naimy, nei naimy amy haura i nga nai yhmtheaung katui nga nai hawimy awm ai nai avo; huni yhmtheaung katui ly Tameuh i pei nai amtheaungra ne.

¹⁴Tameuh i sa nai cheaungkhang ly khaw, nanai kai pany; nang ly hunichi ai panawi bi nai mo, la vui nai mo, so pajau y leang. Tameuh i sa nai harei nai ly mymy ai achi my jei kaji ai nai ne.

¹⁵Vai sa thym nai leaungsai, ti y baly mo mang y sa ai nai leaungsai ngierei ly jangni i sa chum nai leaungsaichi ne. Tameuh ly huni bawibawichi ai avaw avawrei tym hai bo.

¹⁶Huni bo y, hini khaileaung pri y adyh adawi naira hawi leu meitang awm ai nai avo teu i py, hawi y nairachi ai kaniu khyh, nanai kadawn bo.

¹⁷Kai ly kaimy ai, “Tameuh ly khumi kahawi hawi khumi hawi y naichi ai py vanrei tara chih ai. Ati mana nai mo nabaly cheaungkhang ly mymychi i neng khai pi nai deaungkho y ne, nanai ka-dawn pasym nai ne.

¹⁸Achi ly amso tawnbawichi tleaung y hawi naira by y, nanai pany hai ai nai, Tameuh my achi i tlang tleaung y patang naira avum hai, nanai kadawn bo.

¹⁹Khumichi hawi amso tawnbawichi ai patleh takhra y naimy, khym taham my ly ajeng rym nai ne. Khumi ly amso tawnbawi kamta dei ai; huni amjy nyhrei ly Tameuh my sa nai heng nai amjy ne. Khumi i heng nai ly amso tawnbawi tleaung y hawi keh nai ny y leang. Ati mana nai mo nabaly huni heng nai amjy nyhrei ly ati sai py ny y nai deaungkho y ne.

²⁰Ati cheaungkhang ly harei mang y tym reng. Huni amjy nyhrei ly spryhra i ne i, spryhra y vanrei vawi teang ai.

²¹Khumi i phailo ly salo mang y lyn kalau iy, amso tawnbawi i phailo ly khaileaung y ang vum kathiu, nanai ami pany khyp pajau mo?

²²Hunai deaungkho y achi sa ai nai hawi keh nai ly amychi my atho sa iy hau naira i nga nai yhmtheaung katuichi naini amtym ai nai ne, nanai kai kapany bo. Hina nai kamta avum nai ny y baly achi sa pajau nai takhra ati sai py by y; dei nai bo y ati lawm ai mo, nanai achi pany pajau y.