Read Khumi Chin Parip nai leu 5 Bible Online

Parip nai leu 5 - Khumi Chin bible

Parip nai leu 5

¹Nang ly Achura yhm y chei nai khala hawihai adawn ba. Hawi nai hawi y nai khawilang takhra ai pany y nai khumi ka-khum i apathyp nai tleaung y ly huni meingtym y chei iy tangai nai ly hawi keh alam nai ne.

²Nang ly leu katheu y rai khala adawn pasym ba; Tameuh teng y leu adeu tamangtang moh. Mymy ly kani pri mang y awm i, nang ly khaileaung pri y awm. Hunai deaungkho y nang ly mymy teng y avo nai ryrei bo baly hnei panawi bi moh.

³Nang ly paleung bi paleung mawn nai nawi baly, ka-jeira amang amangra nai ne. Nang ly leu katheu nai nawi ala baly ka-khum leuchi katheu lawh ai.

⁴ Nang ly leu neangneang katheu baly leu hawi y naichi katheu lawh ai. Hunai deaungkho y nang ly Tameuh teng y sai sairei leu adeu lawh baly, adeu nai kamta sa kaliki ai nai tla. Khumi ka-khum ly Tameuh i vui teaung ai nai ngo y leang. Nang ly nangmy i leu adeu nai kamta so ba.

⁵Leu adeu nai khala atyp y baly, leu adeu y nai hawi keh alam nai ne.

⁶Nang i leu deaungkho y kamngo lawm moh sy; huni katamangra sa ai nai kai, ka-dawn by y leang, nanai Tameuh i pathyp pi nai keung mo y ahui ai nai tlo moh sy. Ati mana nai y Tameuh ai kado theu hai lawh mo? Nang i sa nai kalopchi phra hai ai nai nang ly ati mana nai sa lawh mo?

⁷Nang ly amang neangneang amang nai, ati sai py ny y nai kalop sa nai, leu peung ryry nai ne teu i py, Tameuh ai ly jei ai nai tla.

⁸Pri peang nai keungchi my khumi kamawnchi ai ana nai py, nichi i nga ai avo nai pei pi y nai hawi ka-dyh ka-dawi so pi y nai py, nang niu nai khala rengrang ti moh. Miteaung kehchi malawn py mymychi tleaung y len nai khumichi i ama hai nai anui y awm u nai ne.

⁹Samrang malawn py pakym achu nai amti amjangchi ai a-ym nai teu bo.

¹⁰Nang ly tangka paleung no lawh baly, mana khala py paleung awmnemra awm ai ny y. Nang chawn ai nai ngai teu i py nangmy i kadeaung nai ryrei, yhmtheaung katui nga ai ny y, huni py atyhtyh teu.

¹¹Nang ly nang chawn lawh baly, pacho ai nai labeaung nawira ai. Nang i nang chawn nai ly nangmy naimy apany ai.

¹²Kalop sa nai khumi ly kajeu kawi pa-rei cha ai nga nai py ne sy, cha ai nai ngo y nai py ne sy, i kamhm pei nai ne. Na i py khumi kanang ly nang chawn nai molam y paleung bi paleung mawn i, i kamhm pei y.

¹³Hini khaileaung pri y khri pa-rei ka-jei hawi parai nai amjy harei ly hini ne: khumichi ly mo mang i neng y ngai nai khala y teaung ai nai tangkachi pateung u achu reng.

¹⁴Naibaly sai sairei molam y huni tangkachi kheih be i, amychi i cho chanauchi ai yhmtheaung khai pi ai nai by y bo.

¹⁵ Achi ly hini khaileaung pri y tym nai neng khala i kamta, hini khaileaung pri i nai theu nai neng khala py bengtlairei theu ai tla nai ne. Kalopra khri pa-rei atho sa teu i py achi hawi vanrei ati sai py syn ai nai ngo thai y leang.

¹⁶Hini leaungsai ly avo y leang; achi jeu nai khala i kamta ly vawi ali teang ai nai tla ai. achi ly ali ai patiu ai nai atho sa nai ly ati kamran nga mo?

¹⁷Achi ly paleung bi paleung mawn nai, noso nai, kaveng theung y awm nai hawi paleung si naimy heng u nai ne.

¹⁸Khumi ami py sa ai hawi keh nai kalop ly achi ai Tameuh my ang pei nai khumi i heng nai deung y cha nai, nei nai, amy haura i nga nai yhmtheaung katui amtym naimy awm ai nai ne, nanai kapany bo.

¹⁹Tameuh my khumi leaungrei ai nang chawn nai hawi yhmtheaung katuichi pei iy amo theu hai lawh baly, huni khumi ly mymy ai kawn iy my i nga nai yhmtheaung katui py amtym ai avo. Huni yhmtheaung katuichi ly Tameuh my pei nai kawn vang ne.

²⁰Tameuh ly achi ai amo theu ai nai ang pei chum nai deaungkho y, achi ly amychi deung dawi nai molam y, ka-mawn ka-thui awm ai ny y leang bo.