Read Khumi Chin Parip nai leu 7 Bible Online

Parip nai leu 7 - Khumi Chin bible

Parip nai leu 7

¹ Khumi i tahm awm nai ly vang teng nai rimui tleaung y hawi keh nai ne. Huna nai kamta nang i dei nai kani ly tapen nai kani tleaung y hawikeh.

²Sih tlaiveu keung y chei nai ly cha nai pawira chei nai tleaung y hawi keh; ati mana nai mo nabaly dei naira my achi bawibawi ai ajeng yb jo, nanai heng nai khumichi ly pany jo ai avo nai ne.

³Paleungsi nai ly panui nai tleaung y hawi keh; paleung si nai ly nang i meimai aneaung hai rawm teu i py, nang i cheng naira ai atho nga haira nai ne.

⁴Amo theu ai nai harei naini adawn jojo nai khumi ly khumi ka-khum ne. Khumi kacheng ly dei nai leaungsai adawn pasym reng.

⁵Khumi kachengchi i thui parip nai tangai nai ly khumi ka-khumchi my palo nai tleaung y hawi keh.

⁶Khumi ka-khum i panui nai raawi ly aleng keung y maimy kang nai katyn hawi atawm; huni i awm nai sai ly ati sai py ny y.

⁷Khumi leaung leaungrei ai li-tapawp nai khumi kacheng ly khumi ka-khum i sa nai kamta sa nai khumi ne.

⁸Ati mo sai sairei ai patem vui nai ly amteaung nai tleaung y hawi keh; paleung amnym nai ly amlyh am-e nai tleaung y hawikeh.

⁹ Nang i kado theu nai ly am-yh vui; paleung ka-e khai nai ly akhum nai ne.

¹⁰Jangni i deung kangngym ly ati mana nai y, vai i deung tleaung y hawi keh lawh mo, nanai mana khala py deng reng moh. Huni ly khumi kacheng i deng nai leu ny y leang.

¹¹Heng nai khumi bawibawi ly tau cheng nai khumichi lawm ai nai avo; tau cheng naira ly yhmtheaung katui hawi atawm iy

¹²paisa tangka kamta awmnem naira pei pajau. Tau cheng naira ly nang i heng naira ai ama hai pajau; hini ly tau cheng naira i hawira ne.

¹³Tameuh i sa nai ai adawn pasym cham; Tameuh my akawi hai nai ly ami my pataw vui pajau ai mo?

¹⁴Nang i vui ati cheaungkhang amsym naimy awm nai khala, amo theu naimy awm ba. Na i py patang naira avum nai khala y Tameuh my amo theu ai nai hawi patang ai nai ang pei bawi reng; mo mang y mana lawm ai mo, nanai nang pany pajau y leang; hunichi ai adawn pasym ba.

¹⁵Kai i heng nai ly atyhtyh teu i py, kai ly ati cheaungkhang kaniu chum bo. Khumi kahawi ly deung dawi nai py, takhra khumi ly hawi y nai ne iy heng sau nai py kai ly niu.

¹⁶Hunai deaungkho y khumi kahawi i hawi nai kamta khri pa-rei atho so ala moh, cheng naira py awm ala moh sy; hina nai hawimy amymy ai ati mana nai apadei ai tau lawh mo?

¹⁷Nang ly khri pa-rei khumi aso y nai py lawm moh sy, ti y baly khri pa-rei khumi ka-khum py lawm moh sy. Ati mana nai y neng tym y naimy dei ai nai ngai lawh mo?

¹⁸Hini amjy nyhrei ai amkyn ba. Nang ly Tameuh ai jei kaji nai khumi ne baly, ati py ne sy, eaung naira nga ai.

¹⁹Samrang leaung horei ly mary harei ai kahawi sa pajau nai tleaung y, tau cheng naira ly khumi leaungrei ai huni tleaung y hawi naira sa pajau.

²⁰Avawrei hawi naira sa iy hawi y nai pipi so vai y nai khumi, nanai ly khaileaung salo y leaungrei py by y.

²¹Khumichi i thui nai tleirei y tangai moh. Nang ly nangmy i miseaung my ang thui tamawn nai leu py thai tan thai lym ai.

²²Nangmy kypkyp my py takhra khumi ai neangneang thui tamawn, nanai nangmy apany keh nai ne.

²³Kai ly kaimy i cheng naira hawimy hini leaungsai bawibawichi cham iy khen bo; cheng naira nga ai nai atho kasa teu i py ngo y.

²⁴Khumi i heng nai sai ami pany pajau ai mo? Huni ly achi i vui khri pa-rei thiu parai, pany thai ai nai khri pa-rei rai parai.

²⁵Na i py kai ly tau cheng naira hawi pany thai naira ai kadawn pasym bo. Kai ly kaimy i deng nai leuchi kapany thai ai nai hawi, tau cheng naira py atho sa naimy kahau nai ne. Huni bo y aso y nai hawi akhum nai pany ai nai amtiu bo.

²⁶Kai ly dei naira tleaung y hawi y keh nai khumi ly parawi kawp reng nai neampachy ne, nanai kaniu. Ni i ang pei nai tamen naira ly deaung hawi paleupy kamta, nang ai patiu ai. Nang ai ang takawi nai ni i kiuchi py sengkry kamta khaw typ ai. Tameuh i kangai hawi avum nai khumi ly huni neampachy kiu tleaung i lawira nga ai; kamngo sa nai khumi ly tleaung ai ny y.

²⁷Kathiu dawn pasym kawp nai khumi kacheng my thui nai ly kai ly rai nairachi kapany ai nai hau nai thym y, hini satang ka-thui ka-thui pany nai ne. Takhra pany ai nairachi kahau i py niu y.

²⁸Neampacho leaung sangreichi theung y kaimy tahm khai pajau nai ly leaungrei ai naini kaniu khyh. Na i py neampachy leaung sangreichi theung y kaimy tahm khai pajau nai khumi leaungrei py kaniu y.

²⁹Kai i kapany nai ly Tameuh my achi ai kahawi ang sa nai ne i py, achi ly amychi ai khrukhrala nai khumichi lawm ai nai asa u lawh nai ne.