Read Khumi Chin Parip nai leu 8 Bible Online

Parip nai leu 8 - Khumi Chin bible

Parip nai leu 8

¹Khumi kacheng naini khaileaung pri i atiti awm nai sai pany nai ne. Tau cheng naira ly huni khumi i meimai y panuiyhm nai amteng hai iy, meimai takhuisui nai tama hai bo.

²Samrang i leu tangai ba, Tameuh teng y leu adeu tamangtang moh.

³Samrang ly mymy i ngai nai kamta sa pajau; huna nai y ni i mei ka-niu i nai theu vui. Huna nai kamta ka-jei nawi nai meingtym y awm moh.

⁴Samrang i sa nai leaungsaichira y sa thai naira abawi; huna nai y ni i ati mo sa naira y deng patumpati pajau y.

⁵Nang ly ni i leu tangai nai ryrei ly chymme naimy awm ai; khumi kacheng ly leu tangai ai nai lam hawi neng py pany.

⁶Ati cheaungkhang sa naira y sa ai avo nai neng hawi avo nai lam awm; na i py achi i pany nai sai ly maidenreichy teu khyh lawh ly!

⁷Mo mang y tym ai nai saichi ly achi theung y ami py pany y; hunichi ai achi teng y thui pi ai nai khumi leaungrei py by y.

⁸Khumi ami py deira i lawi tleaung ai nai so pajau y; ti y baly dei ai nai kani kasyh vui thai y; hini atiu naira ly achi en vui thai y nai atiura ne. Li-tapawp iy achi tleaung pajau y leang.

⁹Khumi phyreichi ly sa thai naira awm iy, phyreichi ly nichi my ana naira avum; hina nai avum nai khaileaung pri y khumichi i dawn nai, tau naichi ai dawn pasym nai khala y, hina naichi kaniu bo.

¹⁰Khumichi ly khumi aso y naichi ai tapreaung y up chum nai vawi ali teang nai khala y, nichi i hawi y sa nai mary theung y nichi ai palo nai leu katheu u nai kai avum. Hini py atyhtyh teu.

¹¹Khumichi ly ati mana nai y hinai kamta hawi y sa ai nai rai y na mo? Ati mana nai mo nabaly hawi y sa nai ai tara chih pi kaliki y nai deaungkho y ne.

¹²Khumi kamngo ly tlen chungvairei hawi y nai sa teu i py, heng thai nai ne. Khumichi my, “Tameuh i leu tangai nai khumi i vui ly cheaungkhangra y hawi ai;

¹³na i py khumi hawi y nai i vui ly huna nai kamta hawi ai ny y. Nichi ly Tameuh i leu tangai y nai deaungkho y nichi i heng nai ly pa-pui kamta ne i, nichi ly hawi thym naimy dei u ai,” nanai thui u nai kai pany khyp bo.

¹⁴Na i py huna nai thui nai ly ati sai py ny y. Hini khaileaung pri y tym nai sai ly mana mo, nanai khen cham; tlen tlenrei y khumi kahawichi ly khumi aso y naichi i avum nai pajeng naira avum u teang nai ne. Khumi aso y naichi py khumi kahawichi nga ai avo nai nang chawn naira nga u; hini py atyhtyh teu, nanai kathui nai ne.

¹⁵Hunai deaungkho y khumi ly amo theu naimy awm ai nai avo, nanai kapany vau bo. Ati mana nai mo nabaly hini heng nai deung y ni i vui amo theu naira ly cha nai, nei nai hawi amo theu naimy awm naichi naini ne. Ni ly hini khaileaung pri y Tameuh my pei nai heng nai ryrei atho sa naimy awm nai ly thui tlam ai nabaly huna nai cha nei amo theu naimy awm pajau nai ne.

¹⁶Kai ly hini khaileaung pri y awm nai leaungsaichi pany ai nai atho kasa iy nga nai ly nang ly vum kanithun, i y naimy atho sa teu i py,

¹⁷mana khala py Tameuh i sa naichi pany thai ai nai ny y; khumi kachengchi my kaichi pany, nanai thui teu i py, nichi pany khyp y leang.