Read Khumi Chin Solomon i khulym 4 Bible Online

Solomon i khulym 4 - Khumi Chin bible

Solomon i khulym 4

¹Kai i khrei nai awi, nang ly khri pa-rei mo-cha hawi na ly! Meimai atleangra theung mang, nang i meichi ly khrei nai kangvang ko na bo. Nang i samchi ly Kilead mawichi mang ampyh naimy satla kathiu nai mi-i kanghuchi kamta ahyn dengdu na bo.

²Nang i hochi ly mui vau ang vawi tui pahiu pan nai beram kamta kaleung. Ho harei py akheaung y leang rai; hunichi bawibawi ly cheh ai nai by y na pa-rei, khen hawi parai.

³Nang i labeaungtengchi ly ribbon kamsen hawi atawm iy, leu katheu nai khala y khrei ai hawi parai nai ne. Nang i tangbeng pahathyp nai ly meimai atleangra theung mang avang na.

⁴Apu parai nai pahu leang awijawn nai nang i kaneaung ly khupui sangrei bang hau nai Davida i lengseaung yhm hawi atawm nai ne.

⁵Nang i paleung kangthaichi py jeupawm reaung y teicha tlai nai sisiu nyhrei hawi py, sikhicho kangphi hawi py atawm.

⁶Khawn mang ali theu pryn iy kaveng tama nai neng tym pa-rei, mura mui hawi lawban mawi salo y kai awm ai.

⁷Kai i khrei nai awi, nang ai chehra by y; khri pa-rei mo-cha hawi parai na ly!

⁸Kai i aju angam nai anglo awi, nang ly kai hawi vanrei Lebanon mawi i nai abang ba. Kai hawi vanrei Lebanon i nai abang ba. Khrangsichi, takai kheangchi awm nai Heramon mawi saleung, Senira mawi saleung hawi, Amana mawi saleungchi dengdairei satlo kathiu ba.

⁹Kai i aju angam nai khrei nai awi, nang ly mei tlenrei ka-khen hawi, nang i awi nai pahu leng ly kai i paleung pathym tlawn hai na bo.

¹⁰Kai i aju angam nai khrei nai awi, nang i khrei nai ly kai ai khri pa-rei amo theu hai bo. Nang i khrei nai ly kreip hang tleaung y malawn py hawikeh; nang i rimui ly mui katuichi tleaung y py mui hawikeh nai ne.

¹¹Kai i paleung pathym tlawn na pa-rei khrei nai awi, nang i labeaungteng ly khawi byn kamta leaung na bo; nang i palai ly kai i vui y sikanu hawi khawi hang kamta ne. Nang i ateaung alangchi ly Lebanon mawi i mui katui hawi amseaung nai ne.

¹²Kai i aju angam nai khrei nai neampachy ly pany hai ai nai avo y nai akho, lengseaung hawi tapang nai akho, khumi leaungrei my peang nai tuino tavochy ne.

¹³Huni akho theung i dengkeaung keungchi ly kaba bai theung i keungchi kamta prau mang iy, athai kahawi athai reng.

¹⁴Huni akho theung y nardu keung hawi deang keung, nardu rimui keung, saffron keung, kalamas keung, sinamon keung, rimui keung cheaungkhang, khri pa-rei mui hawi parai nai kulataruchy keung katheangchi ly aly ngai nai by y na pa-rei prau nai ne.

¹⁵Huni akho ly tuikhochi, tavo micheaungchi, Lebanon mawichi dengdairei leaung kathiu nai tavochychira i tui nga nai ne.

¹⁶Tosyh ali awi, aho jau; tokalawi ali awi, kai i akho mang y aho ly mui kahawichi hawimy amseaung ba. Kai i khrei nai keung ly mymy i akho theung y kun iy, hawi keh nai athaichi cho sy.