Read Khumi Chin ISAIA 19 Bible Online

ISAIA 19 - Khumi Chin bible

ISAIA 19

¹Hini leu pei nai ly Aikupta pri i vui ne. ARENG ly tamai salo y atang iy, Aikupta pri mang y chei kaliki nai ne. Aikupta pri i mynchi ly mymy i mo y jei hyn u bo. Aikupta pri i khumichi py o-a sorai lawm u bo.

²ARENG my, “Aikupta pri theung y tavai atiu hai ai nai kachyh iy, amjo amnau tengtawi, yhm deaungpa tengtawi ka-jo pakei ai. Mary haihochi tengtawi py, samrang haihochi tengtawi py, mychi tengtawi atiu iy kamjau kamteang akhai u ai.

³Kai ly Aikupta chengchi i dawn pasym naichi phra hai iy, nichi i paleung ka-dawn py phra hai ai. Nichi ly mychi i chiu nai mynchi teng y, kasabawmra hnei u ai. Vawinam pakun kawp naichi teng y chei iy leu deng ai i, khumi kadeichi i phailochi teng y katau hnei u ai.

⁴Kai ly Aikupta chengchi ai ana piupa nai samrang hawi y nai kiu tleaung y au iy, huni samrang ai ly nichi ai peang hai ai. Hini ly ati cheaungkhang sa thai nai keung kai, ARENG my pei nai leu ne,” napi.

⁵Naing tavo ly tui di iy kangryh kangryh ai.

⁶Tavo vum tlawnra y awm nai tavo micheaungchi py, tui kangryh kangryh iy kaveaung mui ai. Japang uipo, samji keungchi ly deirawm ai.

⁷Naing tavo peang y pati nai amti amjangchi py deirawm pawn ai i, ali theung y akheang kamlang ai.

⁸Naing tavo y ngo hau iy apacho nai khumi bawibawichi py vo tangam u ai. Nichi i sakawichi hawi paleupychi py, teaung ai nai nga u ai ny y.

⁹Kanihmai ka-syn kalang kyn naichi ly paleung phra atho di u ai i,

¹⁰peh aneang nai keungchi hawi tau cheng nai kalop sa keungchi py, athosi u ai.

¹¹Zoan mary i khumichi ai lu sa nai keungchi ly tau ka-khumchi lawm u lawh ly! Aikupta pri i tau pei nai amyn kamthang khumi kachengchi py, hawi y nai katauchi pei u lawh ly! Nichi ly amychi ai ati mana nai y, jangni i khumi kachengchi hawi samrangchi kangpreang ne, nanai samrang teng y thui ai nai vam u lawh mo?

¹²Aw Aikupta samrang awi, nang ai tau pei nai khumi kachengchi ly ma mang y mo? Aikupta pri i vui ati cheaungkhang sa thai nai keung ARENG ly ati mana dawn pasym yb nai ati awm mo, nanai nang teng y thui pi tan thui pi lym ai.

¹³Zoan mary hawi Memphi mary i lu sa nai keungchi ly tau ka-khumchi ne. Nichi ly mymychi i khumichi ai lam patei nai keungchi ne, nanai dawn u teu i py, nichi my teng y nai lam patei pi bo.

¹⁴ARENG ly nichi ai dawn pany thai y nai katauchi pei hai nai deaungkho y, Aikupta khumichi ly tamang u iy, amy i amleura y atlym nai pavui tapai nai khumi kamta, atlym u khikha na bo.

¹⁵Khumi kanang py ne sy, khumi kamawn py ne sy, khumi kahawi py ne sy, khumi hawi y nai py ne sy, ami py mychi i Aikupta pri i vui kasabawmra pei u pajau y leang.

¹⁶Aikupta chengchi ly neampachy kamta, jeisi nai neng kani tym ai. Ati cheaungkhang sa thai nai keung ARENG ly nichi ai pajeng ai nai kiu pahyn naimy awm, nanai niu u nai khala y, nichi ly jei hyn u ai.

¹⁷Aikupta khumichi ly mychi i vui ati cheaungkhang sa thai nai keung ARENG my khai pi yb nai khym taham adawn ali teang nai tleirei, Juda pri y jei u ai.

¹⁸Huni neng tym nai khala ly Aikupta pri mary pangreichira y Hebrai leu teaung u ai. Huni marychira y awm nai khumichi ly vaineng abeu iy, ARENG teng y leu meitang adeu u ai. Huni marychi theung i mary harei ai ly “Kani areng i mary,” nanai amyn pathi ai.

¹⁹Huni neng tym nai khala y Aikupta pri y ARENG i vui maicham harei sa ai. Mymy ai tahm pasang iy leng nai leungcheng harei ly pri khujyhra y awm ai.

²⁰Hunichi ly Aikupta pri y ati cheaungkhang sa thai nai keung ARENG awm, nanai pany hai nai ka-ma-rachi lawm ai. Khumi mipuichi ly ana nai avum iy, ARENG teng y kasabawmra nga ai nai aeu u nai khala y, mymy ly nichi ai atleu ai nai khumi leaungrei pato pi ai.

²¹ARENG ly mymy ai Aikupta chengchi my pany ai nai sa ai. Huna nai khala y nichi ly mymy ai pany iy chiu u ai. Mymy teng y tawnbawi hawi kapathyprachi syn u ai. Nichi ly mymy i mo y leu meitang adeu iy, huni leu meitang adeu nai kamta sa u ai.

²²ARENG ly Aikupta chengchi ai pajeng ai nai ne teu i py, nichi i tamo kalemchi tama hai ai. Nichi ly ARENG teng y ali teang nai deaungkho y, nichi i hnei takeng nai raawi tangai pi iy, nichi i no-na tama hai ai.

²³Huni neng tym nai khala y Aikupta pri hawi Asuria pri sala y, lam manglai pui harei sa ai. Huni prichi ra i khumichi ly pri harei hawi pri harei ly, vanrei chiu sa achu u ai.

²⁴Huni neng tym nai khala y Israela pri ly Aikupta pri, Asuria pri hawi paleang chakyh ahyh ai. Huni pri thomreichi ly khaileaung pri vereichi i vui hawi naira lawm ai.

²⁵Ati cheaungkhang sa thai nai keung ARENG my, huni prichi ai amtheaung naira pei iy, “Kai i khumi Aikupta chengchi awi, kaimy sa nai Asuria chengchi hawi, kaimy vawi takhra nai khumi Israela chengchi awi, nangchi ai kaimy amtheaung naira pei ai,” napi.