Read Khumi Chin ISAIA 2 Bible Online

ISAIA 2 - Khumi Chin bible

ISAIA 2

¹Anui i leu pei nai ly Juda pri hawi Jerusalem mary ati mana lawm ai mo, nanai Amoz i chapo Isaia teng y Tameuh my pei nai ne.

²Isaia my vai mo mang i neng khala y vai, Achura yhm awm nai mawi ly mawi bawibawichi ai cho iy, asang keh nai lawm ai. Khumi cheng bawibawichi py, huni mawi y jeu u ai.

³Nichi my, “ARENG i mawi salo y Israela chengchi i Tameuh i Achura yhm mang y, achi lyn u sina. Mymy i kangai amtiu u sina. Mymy i vawi takhra pi nai lam y achi tako u sina,” nanai thui u ai. “ARENG i reita leu ly Jerusalem mary i dengdairei py, mymy i leu ly Zion mawi salo i dengdairei py theu ai.”

⁴Mymy ly khumi cheng kalenchi a-ei nai rym hai ai. Nichi py mychi i haisauchi ai li thawnra tamo, mychi i tivichi ai changpi kalei nai akeichi lawm ai nai thip palai vui ai. Khumi cheng bawibawichi ly mo mang y, mana khala py tavai atiu u ai ny y. Tavai atiu u bi ai nai py aeng u ai ny y.

⁵Jakob i katu chanauchi awi, vai, achi ly ARENG my pei nai kangvangra y aleaung u sina!

⁶Aw Tameuh, nang ly Jakob i katu chanauchi ne nai, nangmy i khumichi ai khai su lawh ly! Nichi i pri py nisi mang i prichi, Philistin chengchi i atam kakawp teaung naichi hawi kawi na bo. Mipuichi ly pri takhra reita tanynchi teaung u nai ne.

⁷Nichi i pri ly muku, tangka awm ma mang nai deaungkho y, khri pa-rei nang chawn nai ne. Nichi i pri y keaungngochi nawi parai i, keaungngo ka-richi py khrikhri pa-rei nawi parai nai ne.

⁸Nichi i pri ly mynchi hawi kawi na i, khumichi ly mychi kiu hawi sa naichi ai chiu u bo.

⁹Huna nai y khumi luteng ly cheh nai avum u iy, kangji nga u ai. Aw ARENG, nichi ai kamngo pahen pi moh!

¹⁰ARENG i kado theu nai, mymy i sa thai naira hawi nang parai naira i nai law tleaungra nga u ai nai, nichi ly lengseaung tapiuchira y py, khaileaung angawm tai i py aheu u ai.

¹¹Khumichi i haiho jum nai neng, paleung len am-e naira dyhp nai neng tym ai. Huna nai khala ARENG leaungrei naini, tahm asang naira avum ai.

¹²Huni neng khala y ati cheaungkhang sa thai nai keung ARENG ly sa thai naira len nai khumi, amlyh am-e nai khumi hawi paleung len nai khumi bawibawichi ai tahm panem pi vui ai.

¹³Mymy ly Lebanon mawi i saitleang keung ka-sangchi hawi Bashan atura i, ngopraibiu keungchi ai tleu hai ai.

¹⁴Mawi katheang kalenchi ai panawi vui iy,

¹⁵asang parai nai angdeangra ngiereichi hawi, apai ngiereichi taphra pi pawn ai.

¹⁶Mymy ly len keh, apu keh nai samphochi ai py, tup hai pawn ai.

¹⁷Khumichi i haiho jum iy paleung len amlyh naichi ly phra ai. Huni neng tym nai khala y, ARENG leaungrei naini, tahm asang naira avum ai. Mynchi ly tama angchi khyp ai.

¹⁹Khaileaung amchyh hai ai nai, mymy jeu nai khala y khumichi ly ARENG i kado theu nai, mymy i sa thai naira hawi nang parai naira i nai law tleaungra nga ai nai lengseaung tapiuchi ra y py, khaileaung angawm tai i py aheu u ai.

²⁰Huni neng kani tym nai khala y, khumichi ly mychi i sa nai muku, tangka mynchi ai thangbui hawi phanglauchi sala y aphi iy khai su ai.

²¹Khaileaung amchyh hai ai nai ARENG jeu nai khala y, khumichi ly mymy i kado theu nai, sa thai naira hawi nang parai naira i nai law tleaung ai nai khaileaung angawmchi hawi lengseaung tapiuchira y aheu u ai.

²²Dei nai amjy napi nai khumichi ai ym naimy paleung apado u moh. Nichi ly ati kamran awm mo?