Read Khumi Chin ISAIA 22 Bible Online

ISAIA 22 - Khumi Chin bible

ISAIA 22

¹Hini leu pei nai ly paleung mei y niu nai leaunghawi molam y pei nai leu ne. Mary i khumi bawibawichi ly ati mana nai y mychi i yhm amphu salo y pawi sa u lawh mo? Ati leaungsai awm lawh mo?

²Mary verei py khyh tukulu iy khumichi paleung ahyn naimy, aeu nai katyn phui na bo. Nang i khumichi ly tavai atiu nai tarawi y dei u nai ny y.

³Thailiho chyn harei py ko y naimy, nang i miteaung keh bawibawichi ly angpreng pawn nai deaungkho y, langheng patiu nai avum u bo.

⁴Vai ly kai ai, kaimy tlairei khrikhri pa-rei kavo ai nai pei kyh. Kai i khumi neangneangchi ly dei u pawn lawh bo i, kai ai paleung pahawi ai nai atho so moh jau ba.

⁵Hini neng ly paleung mei y niu nai ka-jeira, sum naira hawi ahei phrophra nairachi tym nai neng ne. Ati cheaungkhang sa thai nai keung ARENG my py, kaichi ai huni neng avum hai nai ne. Kaichi i mary apaichi ly taphra naira avum veng bo. Kasabawmra ngai nai khumichi i aeu nai raawichi ly mawi aheungchi mang y katyn avah na veng bo.

⁶Elam pri i keaungngo atang nai risachi ly thailihochi syn naimy ang jeu u bo. Kira pri i tavaimi risachi my py, khopuichi syn u rym bo.

⁷Paitiu khuta hawi nai Juda leaunghawichi ly keaungngo ka-richi kawi mang na iy, keaungngo atang nai risachi ly Jerusalem mary apai katheu pa-khochira y angdo u nai ne.

⁸Juda pri i amtangra awm nai ngiereichi ly phra veng bo. Huna nai khala y nang i khumichi ly tavai ateaung khaira yhm i tavai ateaungchi la u bo.

⁹Mary apaichi phra nai meingtymchi pathyp ai nai khen u. Mary theung i yhmchi kati iy mary apaichi pathyp ai nai lengseaungchi nga ai nai molam y, yhm phyreichi taphra u bo.

¹¹Tuikan kangngym dengdairei leaung nai tuichi ai mary theung y kadeng ai nai, tui kadengra harei py sa u bo. Na i py nichi ly huni kalop ai jangni khala my pasym pi yb nai keung, hina nai tym hai nai keung Tameuh ai ly tahm khai u y.

¹²Huni thym khala y ati cheaungkhang sa thai nai keung ARENG ly nang ai vo hai iy, paleung si nai ka-ma-ra patei ai nai hawi, lu vau tabiuliu iy paisiu amchiu ai nai thui pi yb nai ne.

¹³Nang ly huna nai sa ai nai jeng y, pawi sa lawh nai ne. Si, beramchi tleh, cha iy kreip hang nei bo. “Khawndam dei u ai bo i, vai ly achi cho nei u sina,” nanai nang ly thui nai ne.

¹⁴Ati cheaungkhang sa thai nai keung ARENG mymy kypkyp my kai teng y, “Huni khumichi ly hini hawi y naira molam y heng nai sala ryrei, mana khala py kamngo lawi naira nga u ai ny y. Hini ly ati cheaungkhang sa thai nai keung kai, ARENG my thui pi nai leu ne,” napi.

¹⁵Ati cheaungkhang sa thai nai keung ARENG ly kai ai samrang yhm kalop pacheang nai keung Sebana i yhm y chei iy ni teng y,

¹⁶“Nang ly nangmy ai ati palawn mo? Lengseaung mawi para ra y nangmychi i vui tapreaung tapiu thiu ai nai, sa thai naira nang teng y awm a?

¹⁷Nang ly aly len nai khumi leaungrei ne py ne lym ai. Na i py ARENG ly nang ai syn iy patheu vui ai.

¹⁸Mymy ly nang ai lijai alyn kamta kalym vui iy, khri pa-rei kau parai nai pri mang y aphi vui ai. Nang ly huni pri y nangmy ai tahm apasang nai tavai ka-ri sahawi y dei ai. Nang ly nangmy yhmkeung i yhm y tahm anem hai ai.

¹⁹ARENG ly nang ai kalop patheu iy, kalop kalenra i nai pala vui ai,” nanai thui hai nai ne.

²⁰ARENG ly Sebana teng y, “Kai ly kaimy i miseaung Hilkia i chapo Eliakim ai palau iy,

²¹nangmy i kalop hawi ka-pu ateaung nai ateaung ly ni ai ateaung hai iy, nang i khobai akawm hai. Nang i nga nai sa thai naira ngiereichi ni teng y au ai. Huni khumi ly Jerusalem mary i khumichi hawi Juda pri khumichi i vui, ampo kamta lawm ai.

²²Kai ly ni ai Davida i katu chanau lawm nai keung, samrang i kalop sa ai nai sa thai naira au bebe ai. Ni ly kalop sa naira y aly len nai ne i, ni i sa nai kalopchi ai ami py sa palai vui thai ai ny y.

²³Kai ly amchyh lei y na pa-rei tahen thleng nai khangmui kamta, ni ai khaw pa-rei khai ai. Ni py my i yhm dengtheung bawibawichi i vui y tahm awm hai ai.

²⁴“Na i py amjo amnauchi hawi, ni teng y abyh anghawi naichi ly ni i vui y myn kaji lawm ai. Khangmuira y bang nai laawm sorachi kamta, nichi ly ni teng y anghawi u ai.

²⁵Hina nai tym nai khala y amchyh lei y na pa-rei tahen nai khangmui ly ahyn lengkau iy, atlym vui ai. Hunira y bang nai ngiereichi py phra pawn ai,” nanai ARENG my leu pei nai ne.