Read Khumi Chin ISAIA 23 Bible Online

ISAIA 23 - Khumi Chin bible

ISAIA 23

¹Hini leu pei nai ly Turu mary i vui ne. Pangli mang y tym u nai nangchi samphora y kalop sa u naichi awi, paleung si naimy vo tangam u! Nangchi i khuteng lawm nai sampho khenra Turu mary ly phra veng bo. Hunira i yhmchi hawi tuivumchi ly phra pawn bo. Huni satang ai nangchi ly Kuparu pri i nai vawi ali teang nai khala thai u nai ne.

²Pangli y ka-pai sa nai Sidon ka-pai sa nai keungchi awi, vo hang u! Nangchi ly nichi ai

³pangli vai takhra mang y pato iy, Aikupta pri i theu nai amti amjangchi ka-jo ka-van sa iy khumi cheng cheaungkhangchi hawi ka-sum ka-pai sa hai u bo.

⁴Aw Sidon mary, nang ly tahm anem veng bo! Pangli hawi suida pangli puichi i thiu parai nai meingtym my, “Kai ly mana khala py cho chanauchi by y. Kai ly mana mo khala py, chapochi py chaniuchi py tapen vai y, kapacho vai y,” nanai thui naimy, nang ai kang khai su nai ne.

⁵Turu mary phra nai satang thai nai khala y, Aikupta chengchi malawn py, athengra nai ne.

⁶Aw Phoenisia mipuichi awi, paleung si naimy vo tangam u! Spain pri mang y preang ai nai atho so u!

⁷Hini mary ly jangni khala y sa nai mary, amo theu nai Turu mary lawm na a? Hini mary ly koloni mary palawn ai nai, pangli vai mang y khumichi awm ai nai pato nai mary ny y a?

⁸Khaileaung pri y tahm awm keh nai samrang i chapo ka-sum ka-pai sa nai empara pri, Turu mary pui ai hina nai kamta lawm hai vui ai nai dawn pasym yb nai keung ly ami ne ai mo?

⁹Ati cheaungkhang sa thai nai keung ARENG ne na a. Mymy ly nichi i paleung len nai sai nau hai vui ai ngai nai deaungkho y, nichi theung y tahm awm nai khumichi ai tahm pasang vui ai ngai nai deaungkho y, hina nai sa nai ne.

¹⁰Spain pri y awm nai koloni prichira i khumichi awi, nangchi chei iy li hlauchi so u! Nangchi ai ama hai ai nai khumi leaungrei py by y leang bo.

¹¹ARENG ly pangli salo y kiu pheu iy, huni prichi ai phra hai pawn bo. Phoenisiachi i ka-sum ka-pai sa nai meingtymchi taphra pawn ai nai py, leu pei pi veng bo.

¹²Aw Sidon mary, nang ly amo theu naira awm bi ai ny y. Nang i khumichi py ana naira avum u bo. Nichi ly Kuparu pri mang y preang iy tleaung u lawh teu i py, phrumai by y naimy awm u ai ny y.

¹³(Turu mary ai daichi mawichi awm naira lawm hai nai khumichi ly Asuria chengchi ny y, Babulon chengchi ne. Nichi ly amtangra mary, angdeangrachi sa chum baly, amtangrachi ai panawi naimy Turu mary ai taphra iy khai su bo.)

¹⁴Suida panglira y tym nai khumi, samphora y kalop sa naichi awi, paleung si naimy vo tangam u! Nangmychi ka-ym awm nai mary ly anawi veng bo.

¹⁵Samrang leaungrei i deungrei, saneng vuisaryh khrairei, Turu mary ai khumichi my tami veng nai neng tym ai. Sanengchi tlum dudu nai khala y Turu mary ly

¹⁶“Pahen ai nai hawi parai i, khumichi my pany pacha y vui nai bimanu, nangmy i taro teaungteng la iy mary amki ba! Nang i khrei nai khumichi vawi u ali teang ai nai taro teaungteng beu iy khulymchi thui rai ba,” napi nai khulym theung i bimanu hawi atawm ai.

¹⁷Saneng vuisaryhrei dym nai khala y, ARENG ly Turu mary ai jangni khala i ka-tawm, ka-sum ka-pai sa ali teang ai nai pei ai. Huni mary ly khaileaung pri y awm nai pri neangneangchi i miseaung lawm ai.

¹⁸Ka-sum ka-pai sa naira i nga nai tangkachi ai ARENG teng y talam ai. Hunichi ai pakym achu iy khai ai ny y. ARENG ai chiu nai khumichi py, huni tangkachi hawi mychi i ngai nai teicha teineichi, ateaungchi van u ai.