Read Khumi Chin ISAIA 24 Bible Online

ISAIA 24 - Khumi Chin bible

ISAIA 24

¹ARENG ly khaileaung pri phra hai iy, khumi angso savai tlang nai lawm hai ai. Mymy ly khaileaung adym a-i-eih hai iy, khumichi ai ahei hai ai.

²Pathyp pi nai keung hawi khumi mipui, miseaung hawi yhmkeung, vang nai khumi hawi jo nai khumi, kalai la nai khumi hawi alai pi nai khumi, khumi kanang hawi khumi kamawn, khumi bawibawichi ly khym taham harei hawi avum u ai.

³Khaileaung ly ahei seaungkhrang naimy phra ai. Hini ly ARENG i leu pei nai ne i, hina nai kamta lawm ai.

⁴Khaileaung ly jeng rawm naimy awm bo. Tahm pasang naira avum nai khaileaung pri i khumi bawibawichi ly atho bai u bo. Kani khusang py khaileaung hawi vanrei rawp nai ne.

⁵Khumichi ly Tameuh i reita leu pei naichi khai su nai molam py, mymy i deungtasa Leu Maikawm ngai y nai molam py, khaileaung ai chai hai y nai ne.

⁶Hunai deaungkho y Tameuh ly khaileaung y vaineng lawi hai bo. Khaileaung i khumi bawibawichi py, mychi i sa tamang nai kamngo vang amtym u bo. Dei kamthumchi py di tleaung dira nai ne.

⁷Kreip keungchi ly jeirui nai deaungkho y, kreip hang takang nai ne. Vaichi khala y khesere naimy awm u nai khumi bawibawichi ly vai ly paleung atho di naimy awm u bo.

⁸Nichi i tarochi, atymchi ra i tangai ai hawi nai khulym raawichi py tama veng bo.

⁹Nichi ly kreip hang nei iy khulymchi thui u y leang bo. Ami py kreip hang i hawi nai sai avum u y leang bo.

¹⁰Mary theung y ati cheaungkhang ahei seaungkhrang na bo. Khumichi kun thai y ai nai yhm tleireichi py, katheu akho typ veng bo.

¹¹Khumichi ly lamchira y angdo iy, kreip hang kadaeung nai aeu u bo. Amotheu nairachi ly deungtasarei tama veng bo. Huni ai pri theung i dengdairei, paryh u pawn veng bo.

¹²Mary ly anawi seaungkhrang naimy awm bo. Mary apai katheu pa-khochi py tleu pawn veng bo.

¹³Khaileaung pri verei i pri ngiereichira y, hina nai kamta tym ai. Hina nai kamta tym nai neng ly olive keung awm nai ngiereichi ra i athaichi pakhau pawn iy, kreip athai kamthumchi py, kreip angjynchira i jaw pajau nai neng, amti amjangchi pakym pajau nai neng hawi atawm ai.

¹⁴Dei kamthum khumichi ly amo theu naimy khulym thui u ai. Nidym mang i khumichi ly ARENG i nang parai nai sai pany hai iy,

¹⁵nisi mang i khumichi my, mymy ai palo u ai. Pangli peang y awm u nai khumichi py, Israela chengchi i ARENG Tameuh ai palo u ai.

¹⁶Achi ly leu meitang teaung nai Israela chengchi ai, khaileaung khuteng takira y awm nai khumichi my palo nai khulym raawichi thai u ai. Na i py kai ly athang khai naira by y i, bengtlairei kaawm nai khyh bo ly! Ka-ym by y nai khumichi ly leu tangai y jojo i, tamangra tamangra nai ne.

¹⁷Aw khaileaung pri khumichi awi, ka-jei awm nai patang nairachi, humchi hawi deaungchi ly nangchi ai ajeng rym bo.

¹⁸Ka-jeira awm nai patangra i nai lawira nga ai nai atho sa nai khumi ly humra y tla ai. Humra i tleaung nai khumi ly deaungra y man ai. Kani mang dengdairei khri pa-rei kani nai iy, khaileaung i langdengchi anghyn ai.

¹⁹Khaileaung ly ako iy sei nyhrei am-eaung thla vui ai.

²⁰Khaileaung ly ali kamchai chawm nai tai kamta py, nei cha ala nai khumi kamta py, atlym khikha ai. Khaileaung pri ly kamngo mynji my tei nai deaungkho y, anawi vui ai; ang thau ali teang pajau ai ny y.

²¹Kani khusang ai peang nai vawinamchi hawi khaileaung y peang nai samrangchi ai, ARENG my pajeng nai neng tym ai.

²²Tameuh ly samrangchi ai theaung tla naichi kamta, angawm hareira y ake chi-u na pa-rei paeung cheng ai. Pajeng ai nai neng tym y ryrei ly nichi ai, mymy ly theaung y paeung jo ai.

²³Ati cheaungkhang sa thai nai keung ARENG ly samrang lyn ai bo i, lo ly avang y ai; kanito py angvang bi ai ny y. Mymy ly Jerusalem mary Zion mawi salo y peang ai. Khumi mipuichi ai pahawi nai lu sa nai keungchi py, mymy i nang parai nai sai niu u ai.