Read Khumi Chin ISAIA 25 Bible Online

ISAIA 25 - Khumi Chin bible

ISAIA 25

¹Aw ARENG, nang ly kai i Tameuh ne. Kai ly nang ai tahm pasang iy, nang i amyn palo ai. Nang ly rengrang nairachi sa nai ne. Jangni khala i dengdairei pasym pi yb nai ka-dawnchi ai meitang khyp sa pi bo.

²Nang ly marychi ai phra seaungkhrang hai iy, mary apai katheuchi ai py taphra pawn bo. Kaichi i paleung ka-echi my sa pi nai samrang yhmchi ly deungtasarei tama veng nai ne.

³Sathai naira haiho len nai khumichi ly nang ai palo u ai. Pahyp y naimy ana nai khumichi awm nai marychi py, nang ai jei naimy awm u ai.

⁴Khumi kamawnchi hawi jeaungmang nai khumichi ly nangmy teng y abyh u nai deaungkho y, patang naira tym nai neng khala y chymme naira nga u nai ne. Nang ly nichi ai alipui khupuira i nai ama hai nai py, khri pa-rei kabi ango naira i abyh ai nai ka-khui ka-ji py pei bo. Pahyp y naimy ana nai khumichi i tiu naira y kaseih ali kaho hawi py,

⁵khutaha meingtymra y kani khang nai hawi py, atawm nai ne. Na i py aw ARENG, nang ly kaichi i paleung ka-echi raawi anawn hai bo. Khupanym ly bi pahui nai kanito ai savai hai nai kamta, nang ly pahyp y naimy ana nai khumichi i aeu nai katyn anawn hai bo.

⁶Ati cheaungkhang sa thai nai keung ARENG ly Zion mawi salo y, khaileaung pri y awm nai khumi cheng cheaungkhangchi i vui, hawi keh nai teicha teineichi hawi, hawi keh nai kreip hangchi hawi, dym biu cha pawi pui sa pi ai.

⁷Huni meingtym y mymy ly vengkhiu nanai paleung ka-mawn khupanym ly khumi cheng cheaungkhangchi salo i nai paheng pi vui ai.

⁸ARENG ly dei naira ai deungtasarei taphra vui ai. Khumi cheng cheaungkhangchi i mei katuichi tamui pi iy, khaileaung pri verei y mymy i khumichi avum nai kangji kangaichi ai py, tama hai vui ai. Hini ly ARENG mymy kypkyp my thui nai leu ne!

⁹Hini atitichi tym nai khala y khumi bawibawichi my, “Mymy ly kaichi i Tameuh ne lawh ly! Kaichi ly mymy ai ym nai deaungkho y, mymy py kaichi ai atleu bo. Mymy ly ARENG ne. Kaichi ly mymy ai kaym u nai ne. Mymy ly kaichi ai atleu pi nai ne i, vai kaichi ly amo theu seu naimy atho kanga u bo,” nanai thui u ai.

¹⁰ARENG ly Zion mawi ai ama hai ai. Na i py Moba pri khumichi ly sieichi hawi angtlen nai chohphi kamta, ati piupa nai avum ai.

¹¹Nichi ly tui jau nai kamta kiuchi hawi atho sa naimy kalai na teu i py, Tameuh ly nichi i paleung len nai panem vui nai deaungkho y, kiuchi jitang naimy awm hai ai.

¹²Tameuh ly asang parai nai Moba mary apai, amtangrachi ai taphra iy, spryh theung y anawi hai ai.