Read Khumi Chin ISAIA 26 Bible Online

ISAIA 26 - Khumi Chin bible

ISAIA 26

¹Anui mang i khulym ai Juda pri i khumichi my thui u nai neng kani tym ai. Nichi my, “Kaichi i mary ly khaw parai! Atleu pi nai molam y mary apaichi ai ly Tameuh mymy kypkyp my ama hai bo!

²Mary apai katheuchi paeaung chum baly kahawi sa nai khumi cheng, ka-ym awm nai khumi cheng kun ai nai pei u.

³Aw ARENG, nang ly paleung meitang ne i nang ai ym nai khumichi teng y tlamsa naira tatang pei pi bo.

⁴ARENG ai ly ym u jojo; mymy ly achi ai ama hai jojo ai.

⁵Mymy ly paleung len amlyh nai khumichi ai tahm panem vui chum baly, nichi i awm nai khaw parai nai mary taphra vui iy, mary apaichi ai speungra y anawi hai ai.

⁶Ana naira avum u nai khumichi py, vai ly huni mary ai kheu hawi chiu iy tako u ai.

⁷Aw ARENG, nang ly khumi kahawichi i lam taw hai bo; nichi i tako nai khuleaung lam py, adyh parai nai ne.

⁸Kaichi ly nang i ngai nai kamta sa iy, nang ai athang khai naimy awm; nang ai naini kakadeaung u bo.

⁹Vum y kai ly nang ai paleung hawi verei kadeaung bo; khaileaung hawi khaileaung pri i khumichi ai nang ly tara chih nai khala y, adyh adawi naira, nanai ly ati mo, nanai nichi pany u ai.

¹⁰Nang ly khumi hawi y naichi ai pahen teu i py, nichi ly kateng sa ai nai pany u y. Khumi kahawichi i awm nai hini pri y malawn py, nichi ly hawi y naichi sa u. Nang i nang parai nai ai py, dawn dang u y nai ne.

¹¹Paleung ka-echi ly mychi ai nangmy pajeng ai, nanai pany u y. Aw ARENG, nichi ai kangji ngo hai ba. Patang naira tym hai ba. Nangmy sa pi yb nai pajeng naira avum hai ba. Nang ly nangmy i khumichi ai mana tanrei tamen mo, nanai nichi ai pany hai ba.

¹²Aw ARENG, nang ly kaichi ai nang chawn ai nai pei ai. Kaichi i eaung nai ngiereichi ly nang i sa pi naichira i hawi naira ne.

¹³Kaichi i ARENG Tameuh, kaichi ly amichi my ang peang nai avum u ai. Na i py nang leaungrei naini kaichi i ARENG ne.

¹⁴Huni khumichi ly vai i neng y, dei u pawn veng bo; heng u ali bi ai ny y. Nang ly nichi ai pajeng iy tamyh pawn veng nai deaungkho y, nichi i phailochi py, tapreaung i nai ang thau u ai ny y. Nichi ai ami my py pany u y leang bo.

¹⁵Aw ARENG, nang ly kaichi i pri lo-pa hai bo; lo-pa hai bo. Huni i khu ka-peangchi py nidym nisi, tosyh tokalawi kau haira bo. Hina nai kamta sa nai deaungkho y, nang ly tahm awm nai ne.

¹⁶Aw ARENG, nang ly nangmy i khumichi ai pajeng nai deaungkho y, nichi ly khri pa-rei paleung bi naimy, nang teng y chiu sa u nai ne.

¹⁷Aw ARENG, nang ly kaichi ai deaungdi tapen nai neampachy kamta, no patang naimy aeu hai bo.

¹⁸Kaichi ly no patang naira ka-vum u bo; na i py ati sai py tym hai y. Kaichi ly kaimychi pri i vui ati sai py eaung naira ngo u y. Ati kalop py chawn-pa thai ai nai pa-rei, sa pajau nai by y.

¹⁹Kaichi khumichi theung i dei chum naichi ly heng u ali teang ai! Nichi i ngan tlangchi ly heng teang ai. Tapreaung angawm y aseaung nai khumi kadeichi ly amo theu naimy khulym thui u ai. Reaung amchang nai kadamchi ly khaileaung y apu hai ali teang nai kamta, neng kra parai nai khala i dei chum nai khumichi ai, ARENG ly heng hai ali teang ai.

²⁰Kai i khumichi awi, nangchi ly nangmychi i yhm theung y kun iy, katheuchi akho u. Tameuh i kado theu nai rym nai ryrei, neng tanareichy aheu u daw.

²¹ARENG ly khaileaung pri i khumichi ai, kamngo pajeng ai nai mymy i awm naira dengdairei ang jeu ai. Khaileaung salo y kangviu y khumi padei nai tamang nairachi ly pheaungrang ai. Tleh naira avum nai khumichi ai khaileaung my ly apha pi vui ai ny y.