Read Khumi Chin ISAIA 27 Bible Online

ISAIA 27 - Khumi Chin bible

ISAIA 27

¹Huni neng khala y ARENG ly chiu parai nai haisau hawi a-ieih naimy awm nai pavui pui tuireng nam (Levithan) ai pajeng iy, pangli Naka pui[5] ai py padei ai.

²Huni neng khala ARENG ly mymy i apu parai nai kreip akho molam y,

³“Kai ly hini akho ai avawrei khen iy tui kaleih pi. Ami my py taphra pajau y ai nai vum kanithun kry pi nai ne.

⁴Kreip akho ai ly kai kado theu y leang bo. Aleng keung cheaungkhang prau lawh teu i khyly, kaimy tiu iy hunichi ai mai hawi leng pawn ai.

⁵Na i py kai i khumichi i paleung ka-echi ly kai i ama hai nai ngai lawh teu baly, kai hawi aly naira nga ai nai sa u ai nai tla. Nichi ly kai hawi aly naira nga ai nai, meitang khyp sa u ai nai tla,” nanai leu pei ai.

⁶Huni kani y Jakob i katu chanauchi napi nai Israela chengchi ly dengkeaung keung kamta, tangjyn pala iy pau ai. Khaileaung ly thengthaichi hawimy kawi na ai.

⁷Israela chengchi ly mychi i paleung ka-echi tanrei, ARENG i pajeng naira khri pa-rei avum u y, paleung ka-echi tanrei py dei u y.

⁸ARENG ly mymy i khumichi ai pri pala iy pajeng nai ne. Mymy ly nichi ai nisi mang dengdairei aho nai ali kamchai theung y pakheang vui nai kamta, mychi pri dengdairei kamlo y tha vui bo.

⁹Myn chiu naira maicham lengseaung ngierei ly lengseaung kangleung kamta, deng piupa iy, Aser tameuh nu i mynchi, ti y baly mui katuichi leng patlum nai maichamchi pipi by y na pa-rei khei pi pawn nai khala, Israela chengchi ly mychi kamngora i nai law tleaung naira nga u ai.

¹⁰Khaw parai pa-rei apai tapang nai mary ly phra seaungkhrang nai ne. Huni mary ly khumi angso by y nai daichi ka-vym kamta, savai tlang na veng bo. Huni ly si, painochi teicha cha iy anawn nai sui tlai naira meingtym lawm bo.

¹¹Dengkeaung changpichi ly aheng iy deirawm nai deaungkho y, neampachychi ly chei i, theng ei u nai ne. Khumichi ly pany thai naira by y nai deaungkho y, nichi ai sa nai keung Tameuh ly nichi ai pahen nai, tamen nai awm ai ny y.

¹²Huni neng khala y ARENG mymy kypkyp ly Euphrat tavo dengdai Aikupta pri khujyh tym pa-rei, mymy i khumichi ai leaungrei bo y leaungrei ai lathli iy, choh kahawi hawi choh hawi y nai ai khai takhra nai kamta, khai takhra ai.

¹³Huni neng kani tym nai khala y Asuria pri hawi Aikupta pri y pri pala nai avum nai Israela cheng bawibawichi ai palau nai baw eng ai. Nichi py Jerusalem mary y awm nai, mymy i mawi kachai salo y ARENG teng jeu iy chiu ai.