Read Khumi Chin ISAIA 30 Bible Online

ISAIA 30 - Khumi Chin bible

ISAIA 30

¹ARENG my, “Juda pri y peang nai khumichi ly taham si! Ati mana nai mo nabaly, nichi ly kai ai niu ngai y nai deaungkho y ne. Nichi ly kai i kangai hawi athli vui nai ka-dawnchi sa iy, kaimy pei y naimy amso amnaichi asa iy kamngo harei salo y harei panawira nai sa tamang u bo.

²Nichi ly kai teng i katau hnei y naimy, Aikupta pri y chei iy kasabawmra hnei u nai ne. Aikupta pri my ama hai naira ngai nai deaungkho y, nichi ly Aikupta samrang ai ym u bo.

³Na i py huni pri ly nichi ai ama hai pajau ai ny y. Aikupta pri i ama hai naira py, pri phra naira mang y atlum ai.

⁴Nichi i savaichi ly Aikupta pri Zoan mary hawi Hane mary mang y tym veng bo.

⁵Juda chengchi ly mychi kasabawmra nga u ai, nanai athang khai u teuni ly sabawm y nai khumi cheng, ka-ym by y nai huni khumi chengchi teng y, abyh lawh nai molam y uikheih u ai.

⁶Tameuh i hini leu pei nai ly tokalawi mang daichi ka-vymra y awm nai, daichi mawichi i vui ne. Mymy ly “Savaichi ly khrangsichi aeung nai meingtym, pavui kangsochi, naka kangkheangchi awm iy ka-jeira nawi nai meingtym y tako u prei nai ne. Huni khumichi ly mymychi ai ati kasabawmra py pei pajau y nai khumi cheng i vui y, vang kateng langseaungchi ai keaungngo kano kasauchi, kula-iuchi hawi tang iy syn u bo.

⁷Aikupta pri i pei nai kasabawmra ly ati sai py ny y leang. Hunai deaungkho y kai ly Aikupta pri ai ‘Thailai by y nai naka,’ nanai amyn pathi pi bo,” napi.

⁸Tameuh my, “Huni khumichi ly ati mana nai khumi cheng mo, nanai kangkhym y pany jo nai ka-ma-ra awm jo ai nai cha-iu harei theung y tajiu typ ba,” nanai kai ai ang thui pi nai ne.

⁹Nichi ly Tameuh ai avawrei tiu naimy, avawrei tapawp naimy, ARENG i leu ai avawrei akhi naimy awm u nai ne.

¹⁰Amochi ai py awm u pypy ai nai thui pi u bo. Nichi my, “Kaichi teng y leu kateng thui pi u moh. Kaichi thai ai ngai nai leu thui pi u. Kaichi ai kaimychi i tamang nai ka-dawnchi hawimy awm hai jo teu sy.

¹¹Kaichi lam i nai aheng u; kaichi i lam paka u moh. Nangchi my chiu iy Israela chengchi i chai parai nai Tameuh satang, kaichi thai ai nai ngai y,” nanai thui u bo.

¹²Na i py Israela chengchi i chai parai nai Tameuh my, “Nangchi ly kai i leu tahm khai u y naimy, khrukhra naira hawi tapawp naira naini a-ym u bo.

¹³Nangchi ly kamngo pajeng ai ataing naichi ne. Nangchi ly akoprei nanai lengseaung apai ka-sang pui kamta, vaimy anawi u ai.

¹⁴Laawm phei ka-kawi hawi mai-aichi akhui ai nai py, chy-y theung y pani iy tui vei ai nai py, ngo pajau y pa-rei kawi seaungkhrang nai alai laawm hawi atawm u ai.

¹⁵Israela chengchi i chai parai nai ARENG Tameuh my khumichi teng y, “Nangchi ly kai teng y vawi iy kajeaung kaji naimy kai ai ym u. Hunaibaly nangchi ly atho ham naira nga iy, atleu naira nga u ai,” napi. Na i py nangchi ly tangai u y!

¹⁶Huna nai tangai ai nai tleaung y ly rang parai nai keaungngochi atang iy, paleung ka-echi teng i dengdairei preang ai nai dawn pasym u nai ne. Nangchi i ka-dawn ly hawichy y! Ati mana nai mo nabaly nangchi ly preang u takengkei ai tla nai deaungkho y ne. Nangchi ly nangmychi i keaungngochi ai rang parai, nanai athang khai u teu i py, nangchi ai ang hui nai nichi i keaungngochi ly rang keh ai.

¹⁷Paleung ka-e leaungrei ai niu baly, nangchi teng i khumi leaung sangrei preang u ai. Paleung ka-e leaung pangrei nabaly, nangchi bawibawi malawn py preang u ai. Mawi saleung y tamkhawn my tlairei leng jo nai ny y baly, nangchi tavaimi theung i ati sai py awm jo ai ny y.

¹⁸Na i py ARENG ly nangchi ai pahen iy sabawm ai nai ajeng nai ne. Mymy ly ka-dyh ka-dawi sa pi jojo nai ne i, nangchi ai pahen pi ai nai ajeng rym bo. ARENG ai ym nai khumichi ly taham hawi nai ne.

¹⁹Jerusalem mary y awm nai khumichi awi, nangchi ly vo pi u ai ny y. ARENG ly pahen nai ne. Sabawm naira nga ai nai mymy teng y nangchi a-au u nai khala y, mymy ly tangai iy pathang pi ai.

²⁰Areng ly nangchi ai hawi y nairachi avum hai ai nai ne teu i py, mymy naimy nangchi hawi vanrei awm iy lam patei pi ai. Nangchi py mymy ai hau ai nai aly ngai y leang bo.

²¹Langvawi mang y, ti y baly lamtang mang y nangchi lam tamang u nai khala y, “Lam kateng ly hini ne; hini lam kataw tako u,” nanai nangchi nithun mang mymy i leu pei nai raawi thai u ai.

²²Nangchi ly tangka hawi sa nai mynchi, muku hawi paleaung nai mynchi la iy, “Kaichi mei keung i nai theu u la!,” nanai thui iy chainem y nai kamta aphi vui ai.

²³Nangchi amti amjangchi pati u nai neng tleirei y prau hai ai nai, Areng ly kani nai hai ai. Nangchi tyn ai nai amti amjangchi thawn hai iy, si, painochi py sui tlaira ka-leu nga ai.

²⁴Nangchi i li khaileaungchi thawn pi nai sichi, keaungngo kano kasauchi ly hawi keh, chai keh nai teichachi cha ai nai nga ai.

²⁵Nangchi ly paleung ka-echi i amtangrachi taphra vui iy, nichi ai padei pawn nai khala y, mawi hawi mawi aheung awm nai tleireira i micheaung tuichi ly leaung kathiu ai.

²⁶Lo ly kanito tanrei angvang naimy, kanito py kanito saryhrei vanrei theu nai kamta, kari tleaung y phy saryhrei angvang na ai. Mymy ly mymy i khumichi nga nai tamo kalemchi ai kanih hawi bam iy, tamochi ra y asi sa pi nai hawi nai khala y, hini atitichi ly tym ai.

²⁷ARENG i sa thai naira hawi nang parai naira ai kamlo mang my niu pajau nai ne. Mai kangvang hawi maikhyhchi ly mymy i kado theu nai sai patei pi bo. Mymy leu pei nai khala y labeaung mang theu nai leuchi ly mai kamta kang hai bo.

²⁸Mymy ly ali aho hai ai. Huni ali ly ati cheaungkhangchi ai amjau hai pawn nai tavo tui lem nai kamta, khumi cheng cheaungkhangchi ai tama hai pawn iy, nichi i hawi y nai katauchi phra hai ai.

²⁹Na i py Tameuh i khumichi awi, nangchi ly vum y sa nai reita pawi kamta, amo theu naimy khulym thui u ai. Nangchi ly Israela chengchi i abyh nai keung ARENG i Achura yhm mang y chei nai lam y, byhlyh katyn hawi kamlym tako u nai khumichi kamta amo theu u ai.

³⁰ARENG ly khumi bawibawichi teng y phum-ang angym nai raawi thai hai iy, mymy i kado theu nai haiho avum hai ai. Mai kadeu kangveaungchi, kani pajyh nai, ji amaichi tla nai hawi, khri pa-rei kani nai hai ai.

³¹Asuria chengchi ly ARENG i raawi thai nai khala y, jei hyn naimy mymy i pajeng nai avum u ai.

³²ARENG my nichi ai avawsadym pakhau nai khala y, mymy i khumichi ly taro teaungteng katyn, pengpeng katynchi kamlym beu u ai. Tameuh mymy kypkyp py Asuria chengchi ai tiu ai.

³³Jangni khala y my Asuria samrang ai mai hawi patawi ai nai, patawira yhm sa yb nai ne. Huni patawira yhm ly tamdo thiu iy kau bo. Huni meingtym y thengheaung pui ka-sang harei py awm. ARENG ly labeaung mang dengdairei mai kangveaung patheu iy, huni thengheaung ai mai amtawi i, kang hai ai.