Read Khumi Chin ISAIA 34 Bible Online

ISAIA 34 - Khumi Chin bible

ISAIA 34

¹Aw khumi cheng cheaungkhangchi awi, jeu u! jeu angym iy tangai u. Khaileaung pri verei y awm nai khumi ngiereichi ly hini meingtym y jeu iy tangai u ai nai tla.

²ARENG ly khumi cheng cheaungkhangchi i tlang tleaung y py, nichi i tavaimi kamkawm bawibawichi i tlang tleaung y py, kado theu nai deaungkho y phra hai ai nai pajeng bo.

³Nichi i veu ly up y naimy khaileaung y veaung tlawn iy, muieung ai. Mawichi py thichi hawi pasen jawn na ai.

⁴Kanito, lo, ka-si taukichi ly khaileaung y tla ai. Kani khusang ly taeang veng nai cha aeang kamta tama ai i, ka-sichi ly kreip keung, ti y baly thaidu keungra i ngam vui nai kamta vui ai.

⁵ARENG ly kani pri mang y haisau pa yb iy, taphra ai nai angchi yb nai Edom khumichi tlang tleaung y tym hai ai.

⁶Mymy i haisau ly apathyp nai beram mi-ichi i thi, thauchi hawimy kajeu kawi nai kamta, huni khumichi i thi, thauchi hawimy kajeu kawi ai. Hini apathyp nai pawi ai ARENG ly Bozarah mary y sa ai. Hini khumi ai tleh nai pawi pui ly Edom pri y sa hai ai.

⁷Mipuichi ly palawi cho y nai sichi, si katai beaungjeaungchi kamta atlym u ai. Khaileaung ly thichi pasen jawn iy, thauchi hawi paleung myn naimy awm ai.

⁸Hini neng ly Zion mary ai ARENG my atleu iy, huni mary i paleung ka-echi ai vawitheung tha ai nai neng ne.

⁹Edom pri i tavochi ly ketara katli kamta py, khaileaung kathau ly kan kamta py, amtlau vui ai. Huni pri verei ly ketara katli kamta, mai angveaung ai.

¹⁰Huni ly kanithun, vum mai angveaung naimy maikhyh theu jojo ai. Huni pri ly khumi cheng vuijeungrei savai tlang ai. Huni pri y mo mang y mana khala py, aleaung ali nai khumi awm ai ny y.

¹¹Huni pri ly beaungkuchi hawi o-achi awm naira lawm ai. Khaileaung palum y rai nai khala i kamta, ARENG ly huni pri ai khaileaung ka-keu pui lawm hai ai.

¹²Pri peang nai samrang hawi mipui lu sa nai keung bawibawichi py awm u ai ny y.

¹³Samrang yhmchi hawi lengseaung apai tapang nai mary bawibawichira y aleng keung cheaungkhangchi prau iy, khivachi hawi beaungkuchi awm naira lawm ai.

¹⁴Huni meingtym y daichi mawichi tlumtlai iy, mito namlichi py hang lengleang ai. Ka-jei awm nai vum i veuva[6]pui py huni meingtym y jeu iy, chym ai nai meingtym hau ai.

¹⁵Beaungkuchi ly tabuchi sa naimy kadui chum baly oh iy chochi ai kry ai. Langnachi py harei bo baly harei tym angym u ai.

¹⁶Heng nai amjychi satang tajiu nai ARENG i cha-iu theung y hau iy phain u cham. Huni heng nai amjy harei py tama ai ny y. Mani heng nai amjy ngiereichi py, nu kalo ka-bom by y nai awm ai ny y. Hina nai kamta tym hai ai nai ARENG my leu pei nai ne. Mymy ly nichi ai akachu hai ai.

¹⁷Huni heng nai amjy cheaungkhangchi ai khaileaung salo y khu ka-peang phy paji pi nai keung ly ARENG ne. Nichi ly cheng vuijeungrei huni khu ka-peangchira y awm u ai. Hunichi ai py peang jojo ai nai nga u ai.